5
Dhèu dhu ded'e rare j'aj'i kètu kapai risi agama, sasab'a na, hud'i soru-bara dhèu, sèna ka rèngu pabe'a dènge Ama Lamatua. Nèngu hud'i sèmi nare ku mèdha persembahan dènge badha korban, ho saraka asa Lamatua. Nèngu kahèi hia badha korban, sèna ka Lamatua saku eele sasala-sasigo dhèu. 2 Ladhe abhu dhèu dhu re'a boe j'ara mamuri dhu lèke, do dhèu dhu rai eele nèti j'ara èèna, kètu agama ne pasusa boe rèngu. Nèti d'ara hua iia na, nèngu lii mako dènge ra, lula nèngu kahèi dhèu rai-haha dhu mud'a manahu, sama sèmi rèngu. 3 Lula nèngu kahèi dhèu rai-haha sama sèmi rèngu, nèti èèna ka kètu agama ne hud'i hia badha korban, ho Lamatua saku pamèu sasala nèngu mesa na.a 4 Dhèu bisa boe ded'e iisi na, sèna ka j'aj'i kètu kapai risi agama. Te dhoka Ama Lamatua di dhu dènge hak, sèna ka hag'e nare dhèu sèmi èèna, nuka sèmi uru-uru sèra Na ded'e Harun, a'a Musa.b5 Sèmi èèna kahèi dènge Kristus. Na ded'e boe iisi Na, ho j'aj'i kètu kapai risi agama. Te uru èèna, Ama Lamatua mesa Na ka dhu ded'e Ne, peka na,
“Èu ne, Ana Ja'a,
Doe ne'e, Ja'a ded'e Èu ho mèd'u paredha.”c
6 Ètu era leo nèti Sasuri Lamatua dhu Mola-Mèci, dhu suri kahèi, peka na,
“Èu j'aj'i kètu agama dhu ca ropa dènge ca dhèu dhu mamuri uru èèna, nuka Melkisedek,
te ngaa Èu j'aj'i kètu agama toke d'ai mia-mia.”d
7 Ètu lod'o oe èle mamuri Yesus ètu rai-haha ne, Na loe boe sabaj'a dènge tangi d'ara pèd'a, manèngi Ama Lamatua sèna ka hia Ne a'èra. Te ne'a, na, koasa Lamatua bisa hia Ne mamuri. Hèia Ama Lamatua sèmi nare lii manèngi Yesus, lula Na madhutu mola-mola dad'èi Lamatua.e 8 Te Yesus ne, Ana Ama Lamatua. Masi ka sèmi èèna, te ngaa Nèngu hud'i pasae ku j'aj'èra, ho ne'a madhutu dad'èi Ama Lamatua. 9 Èle èèna ka, Na tao madhutu mola-mola dad'èi Lamatua aa'i-aa'i. Nèti èèna ka, Nèngu j'aj'i le Kapua Mamuri bagi dhèu aa'i-aa'i dhu parcaya Ne, ho mamuri taruu dènge Ama Lamatua. 10 Te Lamatua ded'e nare le Yesus j'aj'i kètu kapai risi agama, ca ropa dènge Melkisedek, dhu j'aj'i kètu kapai risi agama uru sèra.
Baku tèke eele parcaya miu mi Kristus
11 J'ara ae era dhu ja'a neo lole dènge miu lula-nèti Kristus dènge Melkisedek, te ngaa ako carui paled'a j'ara se'e, lula miu nuka sèmi ana iiki dhu me'a mèu mèka dènge be'a. 12 Aa te ngaa, miu dhu parcaya nèbhu le. Madhutu iia-iia na, miu j'aj'i le mese ho aj'a-nori dhèu leo. Te ngaa te'a boe na, miu cakaraa ana rara iisi hiu, dhu ne'a mèka na'a, te ne'a dhoka ninu susu di. Miu parluu dhèu era ho aj'a miu lula-nèti j'ara-j'ara dhu carui mèka nèti Sasuri Lamatua dhu Mola-Mèci. 13 Ja'a pakasame miu dènge ana rara iisi hiu, lula miu me'a mèka j'ara-j'ara dhu carui boe nèti Kristus, sèna ka miu bisa mamuri mola.f 14 Te ngaa lod'o ana iiki ne kapai, nèngu ninu heka susu, te ngaa na'a nganga'a dhu sakaa. Èèna èci èèna ka, dènge dhèu aj'a ne toke ne'a mèu a'aj'a Lamatua, sèna ka ne'a mia ka dhu be'a, aa mia ka dhu karehe.