Ladhe èdhi parcaya Yesus Kristus, èdhi bisa mamuri padame dènge Ama Lamatua, nuka sèmi èdhi ae tare d'ara dènge Ne
4
Te ngaa èdhi hud'i pangee madhera ku, lula Lamatua dhu pajaji era, na, dhèu unu Na bisa ae rare d'ara ra sama-sama dènge Nèngu. De mage dhoka abhu nèti miu dhu tule eele lii pajaji Lamatua ne. 2 Te èdhi dhu tadèngi le Lii Lolo Be'a, sama sèmi bèi-baki èdhi uru sèra tadèngi. Te ngaa, lula rèngu lèka boe lii èèna, rèngu abhu boe oto ngaa-ngaa. 3 Te ngaa ladhe èdhi parcaya, èdhi bisa ae tare d'ara bera-bera dènge Ama Lamatua. Te uru èèna, Nèngu dhu pajaji le dènge bèi-baki èdhi, te ngaa lula Na nasa, hèia Na peka dènge ra, na,“Ja'a taha heka ladhe kèdhi tatao bhabhelu miu ne.
Nèti èèna ka, Ja'a dhoo miu, peka na,
‘Miu bisa boe maso,
ho ae mere d'ara sama-sama dènge Ja'a.”’
Aa te ngaa èdhi te'a le, na, lod'o Ama Lamatua paj'aj'i liru dènge rai-haha, Nèngu ator nare le, sèna ka dhèu-dhèu unu Na bisa ae rare d'ara, ho mamuri bera-bera dènge Ne.a 4 Ètu lii lolo nèti Ama Lamatua paj'aj'i liru dènge rai-haha, dhu suri, Ama Lamatua ae nare d'ara, peka na,
“Lamatua sab'a nare aa'i le,
hèia asa bèli èèna, lèke dènge lod'o ka pidhu,
Na ae nare d'ara.”b
5 Aa dhu suri ètu era leo hari, Ama Lamatua peka dènge bèi-baki èdhi, na,
“Miu bisa heka maso,
ho ae mere d'ara mi sama-sama dènge Ja'a.”c
6 De dad'èi Ama Lamatua ka, dhèu unu Na ae rare d'ara ra sèna ka mamuri sama-sama dènge Ne. Te ngaa bèi-baki èdhi dhu tadèngi uuru lii lolo be'a ne, rèngu bisa boe maso, lula rèngu tao boe madhutu dad'èi Lamatua. 7 Te ngaa nèbhu-nèbhu, Lamatua hag'e nare lod'o èci, sèna ka dhèu unu Na bisa ae rare d'ara ra sama-sama dènge Nèngu. Te Na pake Daud ho padhai lii, peka na,
“Doe ne'e, ladhe miu tadèngi lii Ama Lamatua,
mage miu tao d'ara mi adhu sèmi hadhu,
te ngaa nanene paie-iie.”d
8 Lod'o Daud peka na, “doe ne'e”, nèngu paj'uj'u boe asa lod'o dhu Yosua lere ana-èpu nèti bèi-baki se asa rai Kana'an. Te lod'o Daud padhai lii ne, rèngu aa'i-aa'i dhu madhe nèbhu le.e 9 Nèti èèna ka èdhi te'a, na, Lamatua ator le lod'o dhu leo èci, sèna ka dhèu-dhèu unu Na bisa ae rare d'ara ra, ho mamuri pa'èci dènge Ne. 10 Aa dhèu dhu maso le sèna ka ae nare d'ara na sama-sama dènge Ama Lamatua, nèngu dhu ae nare le nèti sasab'a-la'a na, sama sèmi Lamatua kahèi ae nèti sasab'a-la'a Na, lèke dènge lod'o ka pidhu.f 11 De bori pa'èra ho miu bisa maso ae mere d'ara, sèna ka mamuri sama-sama dènge Ama Lamatua. Mage dhoka abhu dhu j'aj'i boe maso, lula nèngu nanene boe Lii Holo-Nori Lamatua, cakaraa bèi-baki èdhi sèra.
12 Te Lii Holo-Nori Ama Lamatua ka dhu paj'uj'u j'ara mamuri dhu lèke. Lii se'e dhu dènge koasa ho maso asa d'ara èdhi, sèna ka pasoro ngangee dènge dad'èi èdhi aa'i-aa'i. Te Lii Holo-Nori se, dhu madèka titu kèna, risi nèti hela madèka dhu bisa sabhi eele isi, aa j'ue eele kalua dènge sèg'i rui, sèna ka pasabhoka aa'i. 13 Ètu dedha-liru dènge rai-haha, abhu boe èci sa dhu pahuni nèti Ama Lamatua, te Nèngu bisa nèdhi aa'i mèu-mèu. Aa bèli-camèd'a èdhi hud'i lati asa katanga madha Na, sèna ka ti dhaa aa'i, ngaa dhu èdhi ad'u-ue.
Yesus j'aj'i le kètu kapai risi agama dhu risi nèti ama agama dhu uru sèra
14 Èdhi hud'i kèpe ku pa'èra-èra lalèka èdhi, lula Ana Ama Lamatua, Yesus, dhu j'aj'i le kètu kapai risi agama èdhi. Te Nèngu ètu le madha Ama Lamatua ètu sorga, sèna ka sarii èdhi. 15 Na bisa sarii èdhi dènge be'a, lula ne'a, èdhi dhèu rai-haha biasa. Ladhe abhu dhu dadugu-rariu èdhi ho tao sala, na, èdhi manahu malai. Yesus abhu dadugu-rariu kahèi sama sèmi èdhi, te ngaa Na manahu nèdhi boe. 16 Nèti èèna ka, mai ti pabani d'ara ho ara lati asa madha Ama Lamatua dhu ètu kadera paredha Na. Te Nèngu ne, d'ara hua iia. De ladhe èdhi sabaj'a mi Nèngu, tatu Na neo pad'elo rasa kasia Na, ho soru-bara èdhi lèke dènge lod'o na.