Ana Ama Lamatua kapai risi nèti Musa
3
De sèmi ne'e, a'ari! Ama Lamatua hag'e nare le miu, aa cap miu dhèu d'ara mola, sèna ka èèna na miu mamuri bera-bera dènge Ne ètu sorga. Nèti èèna ka, miu hud'i pangee ku pabe'a-be'a lula-nèti Yesus ne. Te èdhi dhu mangaku le, na, Nèngu ne Dhèu Pajuu-paleha Ama Lamatua, aa Nèngu kahèi Kètu Kapai Risi Agama èdhi. 2 Lod'o Ama Lamatua pua Yesus mai, Yesus tao madhutu aa'i dad'èi Lamatua. Dènge j'ara ne, Nèngu nuka sèmi Musa. Te Musa tao madhutu dad'èi Lamatua kahèi, lod'o na ladhe-leru bèi-baki èdhi uru sèra.a 3 Masi ka sèmi èèna, te ngaa Yesus kapai risi nèti Musa. Te Yesus sama sèmi lamatua èmu. Aa mema lèke, lula lamatua èmu kapai risi nèti ana pua-paleha ètu d'ara èmu. 4 Dhèu èci-èci ka pa'uri d'ara èmu na. Te ngaa Ama Lamatua ka dhu uri aa'i mèu-mèu. 5 De Musa tao madhutu dad'èi Ama Lamatua, lod'o na j'aj'i ana pua-paleha nèti isi èmu Lamatua. Te lod'o èèna, na peka mema le ngaa dhu bèli-camèd'a Ama Lamatua neo tao. 6 Masi ka Yesus madhutu kahèi dad'èi Ama Lamatua, te ngaa Nèngu ana pua-paleha dhu sama boe sèmi Musa. Lula Nèngu ne, Kristus, Ana Ama Lamatua dhu Ama Lamatua hag'e nare le karèi nèti uru ka, sèna ka pua mai asa rai-haha ne. Aa Kristus ne'a mèu uri isi èmu Ama Na. De ladhe èdhi kèpe pa'èra-èra lalèka èdhi, aa ma'ète boe sanao-maena èdhi mi Kristus, èdhi bisa j'aj'i isi èmu Na kahèi.Baku tèke eele parcaya miu sama sèmi bèi-baki miu, lula rèngu bisa boe ae rare d'ara ra ètu rai dhu Ama Lamatua pajaji tèke le
7 Nèti èèna ka, miu hud'i pasa dhilu paie-iie, ho nanene pabe'a ngaa dhu Roh Ama Lamatua dhu Mola-Mèci peka, na,
“Doe ne'e, ropa miu tadèngi lii Ama Lamatua,
8 mage miu kètu hadhu,
sama sèmi dhèu sèra,
dhu lasi-mai èpa nguru tèu ètu pad'a sod'a.
Te rèngu ro'o heka puai-pahae Musa,
toke Ama Lamatua mesa Na
oe taha nare heka d'ara Na.
9-10 Pangee ku laa!
Èpa nguru tèu kateme Ja'a tao rupa-rupa tadha malaa
ètu katanga madha ra!
Te ngaa ra loe boe sèku Ja'a.
Nèti èèna ka, Ja'a nasa dènge ra, peka na,
‘Miu se, seli-kolane!
Te miu soro kabodho tèke eele j'ara Ja'a,
ho madhutu j'ara miu dhu koe-kapengo!’
11 Ropa kèdhi bhabhelu miu, Ja'a ru'a.
Nèti èèna ka, Ja'a dhoo miu, peka na,
‘Miu bisa boe mai ho ae mere d'ara mi, sama-sama dènge Ja'a.”’b
12 De a'ari aa'i-aa'i! Mage nèti miu abhu ca dhèu dhu tao bhelu, toke nèngu parcaya heka, hèia na soro kabodho mi Ama Lamatua dhu mamuri toke d'ai mia-mia. 13 Be'a risi bèli-bèli miu pa'èra d'ara, èci dènge èci. Baku pamata ia ka! Lula miu dhu malai lèke tipu ka tao sasala, toke miu kètu hadhu aa pusi-pahae boe Ama Lamatua. 14 Èdhi bisa pa'angalai dènge Yesus Kristus, sad'i baku pama'ète sanao mi Nèngu, nuka sèmi ropa èdhi heka parcaya Nèngu.
15 Te Roh Ama Lamatua dhu Mola-Mèci, peka le kahèi, na,
“Doe ne'e, ladhe miu tadèngi lii Ama Lamatua,
miu baku kètu hadhu sama sèmi dhèu se'e se,
dhu lasi-mai toke èpa nguru tèu ètu pad'a sod'a,
te rèngu lab'a Musa.”c
16 De ja'a neo karèi sèmi ne'e: cee ka dhu uru èèna nanene Musa, hèia ra pusi-pahae heka ne? Dhèu sèra nuka bèi-baki èdhi dhu Musa lere si nèti rai Masir. 17 Aa dhèu cee ka dhu tao d'ara Ama Lamatua pana magoro d'ai èpa nguru tèu èèna? Dhèu sèra nuka bèi-baki èdhi. Te mamuri ra koe-kapengo ètu d'ara pad'a sod'a, toke ra madhe, ka padhane si ètu nèi. 18 Aa cee ka dhu lèke kutuk nèti Ama Lamatua, toke bisa boe maso asa rai èèna, sèna ka ae rare d'ara ra sama-sama dènge Lamatua? Dhèu sèra nuka bèi-baki èdhi. Te rèngu se ro'o boe nanene Ama Lamatua.”d 19 De me'a le, si? Bèi-baki èdhi bisa boe maso asa d'ara rai èèna, ho ae rare d'ara ra sama-sama dènge Ama Lamatua, lula ra parcaya boe Ne.