Baku tule eele lii holo-nori Ama Lamatua dhu nèti mamuri
2
Nèti èèna ka, èdhi hud'i kèpe ku pa'èra-èra ngaa dhu èdhi tadèngi le nèti j'ara-j'ara Ana Ama Lamatua, sèna ka èdhi baku bhèlu eele. 2 Lod'o uru-uru sèra, Lamatua pake ana pajuu Na nèti sorga, ho lole lii moa Na mi bèi-baki èdhi. Te'a boe na, lii moa sèra aa'i-aa'i ra lèke. Ladhe ra sisu paredha Na, rèngu tatu abhu huku dhu palèke dènge tatao ra. 3 Mema uru èèna, sèmi èèna ka. Te ngaa limuri ne, Ana Ama Lamatua bhoke le j'ara hiu, sèna ka hia mamuri mi dhèu rai-haha. Na peka le j'ara mamuri dhu be'a aae ne mi dhèu unu Na dhu pakako sasab'a Na ètu rai-haha ne. Hèia ra peka dènge èdhi, sèna ka èdhi parcaya. Te ngaa ladhe èdhi pusi-pahae boe, dui tare pala ti! 4 Te Ama Lamatua pangèd'u si koasa kahèi, sèna ka ra tao rupa-rupa tadha malaa. Na papuru Roh Na mi rèngu kahèi, ho ra ad'u-ue j'ara-j'ara leo dhu madhutu dad'èi Na. Nèti èèna ka èdhi te'a, na, aa'i-aa'i se j'ara mamuri dhu lèke tare'a-re'a.Nga tao ka Ana Ama Lamatua pahaha iisi Na ho j'aj'i dhèu rai-haha?
5 Ja'a lole lula-nèti rai-haha rupa hiu dhu bèli-camèd'a j'aj'i. Te ngaa Ama Lamatua peka nèdhi boe dènge ana-ana pajuu Na ètu sorga, na, pe rèngu ka dhu ator rai-haha hiu èèna. Te dhu lalau ka, dhèu rai-haha. 6 Ètu d'ara Sasuri Mola-Mèci Ama Lamatua, na, Daud dhu karèi nèdhi le kab'ua nèti dhèu rai-haha, aku nèngu na,
“Ama Lamatua!
Nga tao ka Ama tao madha-dhilu mi dhèu rai-haha?
Nga tao ka Ama sue si?
Te rèngu dhoka dhèu rai-haha biasa di!
7 Te ngaa Lamatua pangèd'u si koasa,
ka rèngu oe sèmi ana pajuu ètu sorga.
Lamatua pakab'ua si hèi,
aa ded'e si,
8 ho ra paredha aa'i dhu Lamatua paj'aj'i.”a
De madhutu sasuri Daud, Ama Lamatua ded'e dhèu rai-haha j'aj'i kètu, sèna ka ra uri aa'i-aa'i dhu Na paj'aj'i. Te ngaa èdhi tèdhi mèka na, dhèu rai-haha èci sa dhu paredha aa'i-aa'i sèmi èèna.
9 Te ngaa abhu ca Dhèu dhu bisa paredha aa'i-aa'i se. Nèngu èèna, nuka Yesus. Na mai pea taha ètu rai-haha ne, sèna ka j'aj'i dhèu rai-haha dhu pasae j'aj'èra, ka Na madhe hia mi èdhi. Nèti mamadhe Na, Ama Lamatua pad'elo d'ara hua iia Na mi dhèu rai-haha. Èle èèna ka, Ama Lamatua koa-kad'iri Ne, aa ded'e Ne padedha-dedha, sèna ka Na paredha aa'i-aa'i dhu Ama Lamatua paj'aj'i nare sèra. 10 De lèke, ladhe Ama Lamatua hia Yesus pasae j'aj'èra, ho Yesus bisa bhoke j'ara mamuri pala mi dhèu rai-haha. Te Ama Lamatua neo sèna ka dhèu ae bisa mamuri bera-bera dènge Nèngu ètu sorga. Ama Lamatua ka dhu paj'aj'i aa'i mèu-mèu. Aa aa'i-aa'i dhu mamuri, mamuri lula Nèngu ka.
11 Ama Lamatua tatu sèmi nare si dènge be'a dhèu dhu Yesus tao mola-mèci, ho j'aj'i ana-ana Na. Ama Lamatua èèna, Ama nèti Yesus. Dènge sèmi èèna, Yesus dènge rèngu, ca Ama. Nèti èèna ka, Yesus makae boe paroa mi dhèu se'e, na,
“Miu se, a'ari Ja'a.”
12 Te Yesus peka le dènge Ama Na,
“Ja'a neo peka dènge a'ari Ja'a,
lula-nèti babe'a Ama!
Ja'a neo sod'a ètu talora aae rèngu,
lula-nèti dadedha Ama!”b
13 Yesus tuhu hari lii padhai Na, aku Nèngu na,
“Ja'a sarai-maena mi Ama Lamatua toke d'ai mia-mia.”
Hèia Yesus peka hari, na,
“Ladhe ku! Ja'a ka ne'e,
sama-sama dènge ana-ana Ama Lamatua,
dhu Na pangèd'u le mi Ja'a, ho uri si.”c
14 Lula ana-ana Lamatua se, dhèu rai-haha biasa, nèti èèna ka Yesus hud'i j'aj'i ku dhèu rai-haha sama sèmi rèngu kahèi. Te Nèngu hud'i j'aj'i uuru ku dhèu rai-haha, heka Na bisa madhe. Ho nèti mamadhe Na, heka Nèngu bisa parame nare koasa nèti dhèu aae nidhu. Te dhèu aae bhabhelu-katub'a ne'e ka dhu nèd'u koasa, ho uri j'ara-j'ara dhu pa'èki dènge mamadhe. 15 Aa nèngu kahèi tao dhèu rai-haha madha'u dènge mamadhe, toke ra madhutu dad'èi na, nuka sèmi ènu sa. Te ngaa limuri ne, Yesus bisa patalale le dhèu rai-haha nèti d'ara madha'u. 16 Te dhu lèke, nuka Yesus mai boe ho soru-bara ana-ana pajuu ètu sorga. Te ngaa Na mai sèna ka soru nare èdhi, nuka ana-èpu Abraham. 17 Nèti èèna ka, Yesus j'aj'i sama sèmi èdhi, dhu j'aj'i le a'ari Na. Dènge j'ara ne'e Nèngu j'aj'i mi kètu agama èdhi dhu kapai risi eele, ho soru-bara èdhi sèna ka madhutu dad'èi Ama Lamatua. Yesus pad'elo d'ara hua iia Na kahèi mi èdhi. Aa ladhe Na peka ngaa, Na tao madhutu sèmi èèna kahèi. Uru èèna, bèi-baki èdhi manèngi kètu kapai risi agama Yahudi, sèna ka tao korban, ho Lamatua saku eele sasala-sasigo rèngu. Limuri ne, Yesus mesa Na ka dhu j'aj'i korban, sèna ka Lamatua saku eele sasala èdhi. 18 Lod'o Yesus mamuri ètu rai-haha ne, Na abhu j'aj'èra ae-ae. Abhu kahèi dhu dadugu Ne, sèna ka ad'u-ue sasala. Masi ka sèmi èèna, te ngaa Nèngu manahu boe. Nèti èèna ka, ladhe abhu dhu dadugu-rariu èdhi, sèna ka tao sasala, Yesus ka dhu bisa soru-bara èdhi ho baku manahu.