3 Sèmi èèna kahèi dènge ina-ina dhu heka sèra. Peka dènge ra j'aga paie kakako dènge lii padhai ra, aa mamuri taruu madhutu dad'èi Lamatua. Baku padhai-kakoli kolongara dhèu. Baku j'aj'i ènu dhua ara-dhua pèd'u. Te ngaa rèngu hud'i aj'a dhèu, sèna ka ra mamuri dènge mola. 4 Dènge j'ara sèmi èèna, rèngu j'aj'i dhèu pad'elo j'ara mi ina-ina dhu ngèru era, sèna ka ra sue dhèu èmu-kamali dènge ana-ana ra. 5 Rèngu hud'i aj'a kahèi dhèu ho ra mamuri dènge taha rare d'ara, mola-mèci, re'a lalau d'ara èmu, re'a pahae dhèu èmu ra, aa d'èi nanene lii dhèu èmu ra. Ladhe mamuri rèngu sèmi èèna, dhèu bisa heka padhai lii pahaha Lii Holo-Nori Ama Lamatua.

6 Sèmi èèna kahèi, holo mone ngèru sèra, sèna ka ra mamuri dènge taha rare d'ara.

7 Titus! Èu ne hud'i mamuri dènge be'a ku, ho bisa j'aj'i dhèu pad'elo j'ara mi dhèu leo. Sad'i èu tao ngaa èci sa, sab'a dènge be'a, sama sèmi dhu èu aj'a dhèu sèra. Ladhe èu aj'a ngaa sa èci, na, tao madhutu ngaa dhu èu aj'a sèra. Mage pamud'e dènge sasab'a èu. 8 Ladhe èu nori dhèu, pake lii holo-nori dhu lèke, sèna ka dhèu abhu boe j'ara ho pamanahu èu. Dènge j'ara sèmi ne'e, dhèu-dhèu dhu lab'a èdhi ra'e makae, lula rèngu abhu boe j'ara ho segi èdhi.

9 Aj'a ènu sèra ho ra nanene lamatua rèngu ètu j'ara ngaa èèna ka, aa pakarej'e d'ara lamatua ra. Baku ra pab'ala lii padhai dènge lamatua ra. 10 Rèngu baku mana'u mèdha-panyau lamatua ra. Rèngu hud'i pad'elo ku dhu peka, na, lamatua ra bisa parcaya rèngu tare'a-re'a. Rèngu sèra hud'i j'aj'i dhèu dhu be'a aa satia. Ladhe dhèu leo neo pakasame mamuri ènu rèngu dènge aa'i-aa'i dhu èdhi aj'a, tatu ra dhaa, peka na, lii a'aj'a èdhi be'a titu kèna. Te a'aj'a èdhi se'e, madhutu j'ara-j'ara Ama Lamatua dhu hia le mamuri mi èdhi.

11 Te Ama Lamatua pad'elo le babe'a d'ara Na mi dhèu aa'i-aa'i ra, aa bhoke j'ara ho patabuli dhèu nèti koasa sasala-sasigo ra. 12 Nèti èèna ka, mamuri dhu pamèci boe, aa dad'èi dhu karehe, ti core eele si. Èdhi mamuri ètu rai-haha ne, hud'i te'a taha tare d'ara, mamuri dènge mola-mèci, aa satia dènge Ama Lamatua. 13 Limuri ne èdhi sanao-maena mamai hari Yesus Kristus dhu kapai risi eele! Èèna j'aj'i mèngi-nale mi èdhi aa'i-aa'i ti. Nèngu èèna, Lamatua èdhi dhu kapai risi dhu pala-bagi le mamuri mi èdhi. 14 Nèngu hia le ngi'u aae Na j'aj'i mi korban, sèna ka patabuli eele èdhi nèti koasa sasala-sasigo èdhi aa'i-aa'i ti, sèna ka tao èdhi j'aj'i dhèu unu Na dhu mamuri mola-mèci, dhu d'èi dhoka tao j'ara hua iia di.^a

15 De Titus, aj'a aa'i-aa'i se mi dhèu sarani sèra. Pa'èra d'ara si, sèna ka madhutu a'aj'a sèra. Dhèu cee dhu tao sala, na, pad'elo j'ara be'a hia ne. Dhèu bisa boe pahaha èu, lula èu dènge hak ho tao paie rèngu.