3 Te uru èèna, lod'o èdhi tadhe mèka Lamatua Yesus, èdhi te'a boe ngaa-ngaa, aa dènge mud'a lèke tipu. Èdhi to'o boe nanene dhèu leo. Èdhi dhoka mamuri madhutu d'ara bhelu di, ka èki ngi'u èdhi dènge rupa-rupa dad'èi d'ara ti. Èdhi d'ara karehe dènge dhèu leo. Èdhi mamuri dhoka dènge jeluus. Èdhi d'èi tèka d'ara mi dhèu leo, hèia ra kab'èli tèka d'ara dènge èdhi.

4 Masi ka mamuri èdhi ne ele iie le, te ngaa Ama Lamatua dhu hia mamuri mi èdhi, pad'elo le sasue dènge d'ara hua iia Na mi dedha èdhi. 5 Na hia èdhi mamuri lula boe nèti tatao èdhi dhu be'a, te ngaa lula sasue Na mi èdhi. Nèngu rase pamèu-mèu sasala èdhi sèra pake Roh Na dhu Mola-Mèci, sèna ka pahiu mamuri èdhi, nuka sèmi rara iisi hari èdhi. 6 Lula Yesus Kristus madhe le ho pakaj'èu èdhi nèti koasa sasala sèra, nèti èèna ka Ama Lamatua hia dènge boe too-lane Roh Na dhu Mola-Mèci mi èdhi. 7 Lula d'ara hua iia Yesus, ka Na pabe'a pa'èci èdhi dènge Ama Lamatua, nuka sèmi ana Na. Hèia èdhi te'a, na, bèli-camèd'a èdhi mamuri taa-taa dènge Ne. Se'e se j'aj'i mi pusaka èdhi! 8 Dhu ja'a peka ne, lèke tare'a.

Ngaa dhu ja'a aj'a ne, dènge kab'ua hia mi dhèu aa'i-aa'i. Nèti èèna ka, èu hud'i pasanèd'e dhèu ho madhutu lii aj'a dhu mola. Dhèu aa'i-aa'i dhu parcaya Lamatua, loe boe tenge j'ara sèna ka tao j'ara dhu be'a. 9 Baku soro iisi asa d'ara lii langu dhu leko-monya, nuka sèmi: pasibha d'ara lii langu dhu dènge boe kolo-kapua, patao iia d'ara dènge dhèu leo, patula-pajuku nèti j'aj'aj'i mia dhu dedha risi, aa patao nèti atora ad'a Yahudi. Tao ngaa? Sèra sa aa'i-aa'i, èci sa gaguna na aad'o. Pèci eele lod'o iia d'ara! 10 Lamu holo dhèu dhu tema pamae juma'at sèra. Ladhe nèngu tao taruu, kai ne. Aa ladhe na loe boe, soro tèke ne sène. 11 Dhèu sèmi èèna, ngangee na mola heka. Nèti tatao unu na ka, dhèu aa'i-aa'i ra re'a mèu sasala na.

12 Ja'a neo hia Artemas do Tikikus, dhiu paraga dènge èu asa pulu Kreta. Ladhe na d'ai, èu tenge j'ara sèna ka mai lai-lai paraga dènge ja'a ètu kota Nikopolis. Te ja'a neo pea ètu nèi d'ara hèru pacuhi ne.^a 13 Èu tadhe le dhèu dhu d'èlu-mèu hukum, ngara na Senas, aa angalai na Apolos, do? Ra neo lasi asa era kaj'èu. De mu bara si, sèna ka ra baku kura ngaa-ngaa ètu talora j'ara.^b 14 Te dhèu dhu madhutu Lamatua Yesus baku madhèdi iia d'ara di. Rèngu hud'i maj'èni tao dhu be'a, aa bara dhèu dhu tare'a-re'a parluu. Dènge sèmi èèna, mamuri ra dènge kab'ua.

15 Titus. Ji'i aa'i-aa'i ètu ne'e pa'adhu lii maho'o hia èu. Aa hia kahèi mi angalai ji'i dhu sama-sama parcaya Lamatua Yesus.

Ja'a sabaj'a manèngi sèna ka Lamatua pad'elo d'ara hua iia Na mi dedha miu aa'i-aa'i mi.