Sasuri ne'e nèti ja'a, Paulus, ana pua-paleha Ama Lamatua, aa dhèu pajuu-paleha Yesus Kristus. Na pua ja'a sèna ka pa'èra parcaya dhèu dhu Na hag'e nare sèra. Na pua ja'a ho pad'elo j'ara mola kahèi, sèna ka ra mamuri madhutu dad'èi Lamatua. Dènge sèmi èèna, dhèu unu Ama Lamatua re'a, na, bèli-camèd'a rèngu mamuri taa-taa dènge Ne. Lod'o Ama Lamatua paj'aj'i mèka rai-haha ne, te ngaa Na moa mema, bèli-camèd'a dhèu unu Na mamuri taa-taa dènge Ne. Nèngu ne'a boe leko-monya. D'ai lod'o na, ka Ama Lamatua peka paled'a, na, Nèngu saku eele sasala-sigo dhèu, sèna ka ra mamuri taa-taa dènge Ne. Aa Na paredha ja'a ho laku peka Lii Lolo Be'a hia dhèu aa'i-aa'i ètu mia-mia.

Titus! Èu ne nuka sèmi ana d'èlu ja'a sa, lula èu dènge ja'a ne sama-sama parcaya Kristus. De ja'a sabaj'a mi Ama Lamatua dènge Yesus Kristus dhu hia mamuri mi èdhi, sèna ka Ra pad'elo d'ara hua iia Ra mi èu, ho èu mamuri dènge mera-milu.^a

5 Ca hari ni, ja'a pama'ète kore le, ho èu pea ètu pulu Kreta, sèna ka uri pèri-pèri j'ara dhu èdhi parluu era ètu èèna. Aa hud'i laa èu ded'e dhèu dhu re'a lalau-lalo'o juma'at ètu d'ara rae-rae. Baku bhèlu atora dhu ja'a peka le dènge èu, lula-nèti dhèu dhu j'aj'i kètu juma'at. Peka na: 6 Ladhe neo ded'e dhèu ho j'aj'i kètu juma'at, nèngu hud'i mamuri ku dènge boe sasala. Nèngu hud'i satia dènge dhèu èmu na ca dhèu di. Ana-ana na parcaya kahèi Yesus Kristus. Mage dhoka dhèu peka, na, rèngu sèra ana-ana dhu tenge patao-palaha di, aa palab'a dènge dhèu. 7 Lula kètu juma'at sèra pakako sasab'a Lamatua, de rèngu hud'i mamuri dènge mola, aa dènge kolongara hua iia. Baku ded'e dhèu dhu d'èi padedha iisi; dhu nasa malai, d'èi mahu, dhu d'èi pagama, aa dhu manga'a doi-dhari. 8 Dhèu dhu j'aj'i kètu juma'at sèra hud'i d'èi sèmi rare dhèu asa d'ara èmu ra. Dhu d'èi j'ara-j'ara dhu be'a, dhu taha rare d'ara, dhu bia boe cabèka, dhu d'ara mola-mèci, aa dhu re'a taha rare ngi'u. 9 Rèngu hud'i kèpe pa'èra-èra ku Lii Holo-Nori Ama Lamatua, dhu uru èèna èdhi nori si. Dènge sèmi èèna, rèngu pad'elo j'ara Lamatua dhu mola hia dhèu leo, aa bisa pamola lii lolo dhu lèke boe j'ara sèra.^b

10 Te abhu dhèu ae dhu d'èi palab'a a'aj'a dhu lèke. Abhu dhu peka-padhai dènge boe kolo-kapua. Aa abhu kahèi dhu d'èi kapod'e-kabèli. Risi-risi dhèu Yahudi dhu peka, na, dhèu aa'i-aa'i dhu neo abhu mamuri hud'i suna ku. 11 Ra pake a'aj'a rèngu dhu sala ho nuni rèti a'ari èdhi pakaj'èu nèti lii holo-nori Lamatua dhu lèke. Rèngu sèra d'èi dhoka tenge doi-dhari dènge j'ara kapod'e-kabèli di! Kai dhèu sèmi sèra sa, sèna ka ra loe nèti aj'a j'ara-j'ara dhu lèke boe. 12 Ca tèka, dhèu èci nèti pulu Kreta, dhu tema padhai pake lii hini, lole dhèu nèngu unu na, aku nèngu na,

13 Mamuri dhèu sèra mema sèmi èèna ka! De èu hud'i lamu ère more hari dhèu dhu lèke kapod'e-kabèli sèra, ho pa'èra hari parcaya ra mi Lamatua. 14 Èle èèna, ra nanene ia ka nanuku nèti dhèu Yahudi sèra, aa rèngu hud'i ae eele ku nèti lii paredha dhèu-dhèu dhu tule eele lii holo-nori dhu lèke.

15 Sanèd'e paie-iie! Bagi dhèu dhu d'ara mola-mèci, aa'i-aa'i mola-mèci. Te ngaa bagi dhu d'ara kaj'alu aa dhu parcaya boe Lamatua, abhu boe ngaa èci sa dhu mola-mèci. Lula d'ara dènge ngangee rèngu dhu kaj'alu mema le. 16 Rèngu mangaku tadhe Ama Lamatua. Te ngaa mamuri ra nuka sèmi dhèu dhu tadhe boe Ne. Rèngu padhai lii leo, tao leo. Rèngu mema tare'a-re'a dhèu karehe di! Rèngu ro'o boe madhutu dad'èi Lamatua. Baku maena dhèu sèmi sèra re'a tao dhu be'a!