2 Timotius
Sasuri Paulus ka dua
hia angalai na Timotius
Lii maho'o
1
1-2 Timotius dhu be'a!Sasuri ne nèti ja'a, Paulus, dhu Ama Lamatua mesa Na hag'e nare j'aj'i dhèu pajuu-paleha Yesus Kristus. Ra pua ja'a ho laku lole nèti mamuri dhu lèke, dhu Lamatua moa le hia dhèu aa'i-aa'i dhu parcaya Yesus Kristus.
Timotius! Èu dhu j'aj'i le sèmi ana ja'a. De ja'a manèngi sèna ka Ama Lamatua dènge Kètu èdhi, Yesus Kristus, sue èu, pad'elo d'ara hua iia Ra mi èu, aa hia èu mamuri dènge mera-milu.a
Paulus manèngi makasi mi Ama Lamatua
3 Mèu-mèda ja'a sabaj'a hia èu. Ja'a manèngi taruu makasi mi Ama Lamatua, lula èu madhutu taruu Ne. Èu me'a! Ja'a sab'a hia Nèngu dènge d'ara mola-mèci, èci èèna ka dhu bèi-baki èdhi sèra sab'a hia Ne. 4 Ja'a sanèd'e lod'o èdhi pacèri uru èèna, èu pahaa èi madha. Nèti èèna ka, ja'a neo titu kèna paraga hari dènge èu, sèna ka d'ara ja'a karej'e.
5 Ja'a ngee kèdhi uru èèna, lod'o èu heka parcaya tare'a Lamatua Yesus. Parcaya sèmi èèna na dhu amo le ètu d'ara bèi mu Luisa dènge ina mu Yunike. Aa ja'a ke'a mèu, na, parcaya sèmi èèna muri le ètu d'ara èu kahèi.b
Paulus manèngi Timotius sèna ka pake karunya dhu Lamatua hia
6 Uru èèna, lod'o dhu ja'a bane ai ètu kètu èu aa sabaj'a hia èu, lod'o èèna kahèi Lamatua hia karunya mi èu, sèna ka èu bisa sab'a hia Ne. De ne'e ne, ja'a manèngi sèna ka èu pakaroo hari karunya èu dhu nuka sèmi ai dhu oe madhe sa. 7 Te Roh Ama Lamatua tao boe èdhi j'aj'i dhèu madha'u. Te ngaa Na tao, sèna ka èdhi j'aj'i dhèu dhu d'ara èra, dhu te'a pasue, aa te'a taha tare d'ara. 8 De baku makae peka-padhai j'ara-j'ara lula-nèti Lamatua èdhi. Aa baku makae lula ja'a ne ana bèdho. Te ja'a maso bui lula ja'a pakako sasab'a Na. De ladhe lamu lole Lii Lolo Be'a, èu hud'i pa'èra ku iisi, ho dui j'aj'èra nuka sèmi ji'i dui. Ladhe èu paraga dènge j'aj'èra sèmi èèna, èèna na Lamatua pa'èra d'ara èu.
9-10 Lula Lamatua ka dhu patabuli èdhi nèti koasa sasala-sasigo èdhi.
Aa Na hag'e nare èdhi ho j'aj'i dhèu unu Na dhu mola-mèci.
Na pad'elo d'ara hua iia Na mi èdhi, lula Na sue èdhi,
masi ka èdhi tao boe ngaa-ngaa ho nia sèmi babe'a Na.
Lod'o Lamatua paj'aj'i mèka rai-haha ne, te ngaa pama'ète nare le ho hia Yesus Kristus mai,
sèna ka Na pad'elo d'ara hua iia Na, aa pala mamuri hia èdhi.
Ka Yesus Kristus mai le, aa bhoke paled'a ngaa dhu uru èèna Ama Lamatua nelu tao,
aa pad'elo d'ara hua iia Nèngu mi èdhi.
Na palaho le koasa mamadhe!
Ne'e ka dhu j'aj'i Lii Lolo Be'a!
De cee dhu parcaya Lamatua Yesus, madhe heka taa-taa, te ngaa mamuri manèro toke d'ai mia-mia dènge Ama Lamatua.
11 Nèti èèna ka, Ama Lamatua ded'e nare ja'a j'aj'i dhèu pajuu-paleha Yesus Kristus, sèna ka ja'a lole Lii Lolo Be'a Na, aa aj'a-nori dhèu ètu mia-mia.c 12 Sèra sa ka dhu paj'èra ja'a ètu d'ara èmu bèdho ne. Te ngaa ja'a makae boe! Lula ja'a ke'a le cee ka dhu ja'a parcaya, nuka Lamatua Yesus. Aa ja'a ke'a kahèi, peka na, Nèngu ka dhu pangèd'u sasab'a ne'e mi adhe-aai ja'a, Nèngu ka dhu bisa j'aga sasab'a ne'e, aa Nèngu ka dhu pa'èra ja'a sèna ka pakako sasab'a ne'e, toke Nèngu mai hari. 13 De madhutu ka, j'ara mamuri nèti a'aj'a dhu lèke dhu ja'a pad'elo le dènge èu. Ladhe èu parcaya taruu, aa sue dhèu aa'i-aa'i sèmi èèna, ne'e peka na, èu j'aj'i le èci dènge Yesus Kristus. 14 Ama Lamatua pangèd'u le ètu d'ara adhe-aai èu kakaja èci dhu kab'ua, nuka a'aj'a dhu lèke. De ladhe-leru pabe'a kakaja èèna! Pake Roh Ama Lamatua dhu Mola-Mèci dhu ètu d'ara èdhi, sèna ka hud'i laa Na pa'èra èu ho ladhe-leru kakaja èèna paie-iie.
Onesiforus ladhe-leru Paulus ètu d'ara èmu bèdho
15 Ele boe èu tadèngi le, na, Figelus, Hermogenes dènge dhèu leo nèti propensi Asia sèra,d pusi-pahae heka ja'a. 16-18 Te ngaa Onesiforus leko-leo nèti rèngu. Na pakaj'èu boe nèti ja'a. Èu mesa mu me'a, lod'o ja'a ètu kota Epesus era, nèngu ka dhu ladhe-leru ja'a. Limuri ne, na pea ètu kota Roma ne'e. Ropa na d'ai ne'e, na patangi-tenge ja'a ètu mia-mia. Ka na abhu ja'a ètu d'ara èmu bèdho ne. Te ngaa na makae boe. Na mai taruu ngad'o ja'a ho pa'èra d'ara ja'a.
De ja'a manèngi sèna ka Ama Lamatua pad'elo d'ara hua iia Na mi Onesiforus dènge a'ari na aa'i-aa'i ra. Ladhe lod'o èle rai-haha ne, ho Lamatua pama'ète lii langu dhèu rai-haha, ja'a sanao ho Lamatua pama'ète dhu be'a hia mi Onesiforus si.