Lamu peka Lii Holo-Nori Ama Lamatua
4
1-2 Bèli-camèd'a Yesus Kristus mai hari asa rai-haha ne, ho nèd'u paredha nuka sèmi Dhèu Aae. Masi ka dhèu dhu mamuri era, do dhèu dhu madhe le, aa'i-aa'i ra lasi asa katanga madha Na, sèna ka Na pama'ète lii langu ra èci-èci. Nèti èèna ka, ètu madha Ama Lamatua dènge Yesus Kristus, ja'a manèngi mi èu ho lamu peka-padhai dènge dhèu-dhèu, Lii Holo-Nori Ama Lamatua. Èu pa'èra taruu! Baku pangee, na, lod'o dhu be'a, do aad'o. Pad'elo sasala dhèu, te ngaa kai si pabe'a-be'a dènge lii mako. Pa'èra d'ara dhèu pake lii holo-nori dhu lèke.3 Te bèli-camèd'a, dhèu ro'o heka nanene lii holo-nori dhu lèke. Pe ra kaboko rare mese-mese dhu d'èlu-mèu padhue-padhai madhutu dad'èi ra, sèna ka pabe'a ro'a dhilu ra. 4 Ra hutu dhilu ra ho tule eele lii holo-nori dhu lèke. Te ngaa pasa dhilu ra, ho nanene lii lolo nanuku dhu leko-monya sèra!
5 Masi ka tasamia èèna ka, èu hud'i taha d'ara. Pa'èra ètu d'ara j'aj'èra. Lamu lole Lii Lolo Be'a, sèna ka dhèu sèmi rare Yesus Kristus. Soru-bara dhèu dènge d'ara kateme, toke pa'èle sasab'a. Baku dènge d'ara cabèka.
6 Baku pusi dènge ngi'u ja'a ne, te lod'o mamadhe ja'a dètu le. Èci èèna ka dènge galaa dhu isi na oe èle kèna.a 7 Te ngaa ja'a segi le ètu d'ara pa'uji èèna dènge be'a. Ja'a rai d'ai le lane. Ja'a madhutu taruu le Yesus Kristus dènge be'a. 8 De ne'e ne, di èci ka dhu ja'a tatae. Nuka piala juara dhu Lamatua tao tèke le hia dhèu aa'i-aa'i dhu mamuri mola. Lamatua èdhi èèna, nuka Dhèu pama'ète lii langu dhu mola. Dhu ne'a boe bia cabèka. Ladhe d'ai ka lod'o na, Na pangèd'u mi ja'a piala juara èèna. Te ngaa mesa boe ja'a di. Dhèu aa'i-aa'i dhu sue Ne, aa dhu mate mamai Na, rèngu sèra abhu piala sèmi èèna kahèi.
Paulus moa pèri-pèri j'ara
9 Timotius! Mai ka lai-lai ngad'o ja'a! 10 Te limuri ne ja'a kaliu bia. Krekes la'e le asa propensi Galati. Aa Titus la'e le asa rai Dalmatia. Aa Demas sue risi j'ara-j'ara dhu lèke boe ètu rai-haha ne, la'e le sa kota Tesalonika.b 11 Dhodhoka Lukas di dhu pea dènge ja'a ètu ne'e. Tenge more Markus sèna ka dua mi mai palere-lere. Te nèngu èèna bisa ladhe-leru ja'a ètu ne'e.c 12 Ja'a hia le Tikikus la'e asa kota Epesus.d 13 Ladhe èu mai, baku bhèlu mèti kodho pana ja'a dhu tèke eele ètu èmu Karpus ètu kota Troas. Aa baku bhèlu mèti dènge sasuri ja'a sèra, risi-risi dhu ja'a suri ètu ka'uri badha.e
14 Aleksander, tuka tabaga èèna, tao bhelu dhu ciki boe mi dedha ja'a. Hud'i nèngu sène, te bèli-camèd'a, Lamatua ka dhu b'ala ne, sèmi dhu nèngu tao mi dedha ja'a.f 15 Èu hud'i mage-mage ku dènge dhèu èèna, lula nèngu na d'èi palab'a lii-lii dhu èdhi aj'a-nori.
16 Lod'o hiu-hiu ja'a titu ètu madha hakim ho siri iisi ja'a, abhu boe ca dhèu sa dhu re ja'a. Rèngu aa'i-aa'i ra kako tèke eele ja'a mesa ku. Te ngaa hud'i rèngu sène! Pe Lamatua pabhèlu eele sasala ra. 17 Masi ka sèmi èèna, te ngaa Ama Lamatua tèke eele boe ja'a. Na pa'èra ja'a, sèna ka ja'a bisa peka-padhai Lii Lolo Be'a Na dhu pakura boe ciki sa. Ja'a lolo sèmi èèna ka mi dhèu Yahudi boe, ho ra nanene Lii Lolo Be'a. Aa pakaj'èu le nèti mamadhe-mamopo. 18 Aa èèna na Ama Lamatua pakaj'èu ja'a nèti bhabhelu-katub'a aa'i-aa'i ra. Aa lere nèti ja'a dènge sod'a-mole laku asa sorga. Ètu era nèi, Nèngu ka dhu nèd'u paredha.
Lamatua èèna, kapai seli eele! Ja'a koa-kio ded'e padedha-dedha Ne, dhu ma'ète boe! Tare'a sèmi èèna.
Paulus katange sasuri na
19 Baku bhelu mèti lii maho'o ja'a mi ina Priskila dènge dhèu èmu na Akila. Sèmi èèna kahèi, mi a'ari Onesiforus.g 20 Erastus pea ètu kota Korintus. Ca hari ni, ja'a tèke eele Trofimus ètu kota Miletus, lula na pèd'a aae.h 21 Tenge j'ara sèna ka lod'o d'ai mèka hèru pacuhi, èu dhu d'ai le ne'e. Angalai ètu se'e se, nuka: Ebolus, Pudes, Linus dènge ina Klaudia pa'adhu lii maho'o hia miu. Sèmi èèna kahèi, dènge a'ari dhèu Kristen dhu leo sèra.
22 Ja'a sanao sèna ka Ama Lamatua sama-sama dènge èu taruu. Sèna ka Lamatua pad'elo d'ara hua iia Na mi miu aa'i-aa'i mi.
D'ai sange ne'e ka,
Paulus