D'ai lod'o èle rai-haha, dhèu rai-haha j'aj'i sèmi ngaa sa?
3
Timotius! Ladhe dètu dènge lod'o èle rai-haha ne, j'aj'èra na ae titu kèna. Ja'a peka mema dènge èu sèmi èèna. 2 Dhèu dhoka sue ngi'u ra, aa manga'a doi-dhari. Rèngu padedha iisi, aa d'èi pahaha dhèu leo, d'èi pakarehe kolongara Lamatua, d'èi boe nanene ina-ama ra, re'a boe manèngi makasi, kètu hadhu, d'èi boe madha j'ara Lamatua, 3 re'a boe sue dhèu, d'èi boe mamuri padame, d'èi pa'ele iie kolongara dhèu, taha rare boe iisi ra, bhelu-katub'a dhu risi eele, d'èi boe dhu be'a, 4 d'èi pahie mone aanga-angalai ra, ngangee bab'a, aa tao ngi'u ra d'èlu-mèu risi, madhutu dhoka dad'èi d'ara risi nèti dad'èi Lamatua. 5 Rèngu tao iisi ra dhèu d'èlu-mèu, te ngaa dhu mola-mèu lao. Koasa Lamatua abhu boe ètu d'ara ra. Baku padètu dènge dhèu sèmi sèra kahèi!6 Rèngu maso asa d'ara èmu dhèu dènge rèhu mare, ho lasi kakèj'i d'ara dhèu bhèni dhu èra boe, aa mud'a lèke god'a. Dhèu bhèni sèmi sèra sa, mamuri ètu d'ara sasala-sasigo dhu udhu sobhu-sobhu, aa madhutu dhoka rupa-rupa dad'èi d'ara ra. 7 Ropa ra tadèngi mese hiu mai nori j'ara dhu hiu, na, rèngu madhutu rii. Te ngaa re'a boe hag'e mia ka dhu lèke, aa mia dhu sale. 8 Èu sanèd'e era lii lolo Yanes dènge Yamres, si?a Lod'o èèna, dua ra palab'a dènge Musa. Mese taa limuri se'e, tatao ra èci èèna ka. Rèngu palab'a dènge lii holo-nori dhu be'a. Ngangee ra ele iie le, aa parcaya rèngu lèke boe. 9 Mese dhu lèke boe sèmi sèra sa, bisa boe taha rare nèbhu. Nèbhu-nèbhu dhèu aa'i-aa'i re'a gagoa rèngu! Nuka sèmi uru èèna dhèu re'a kapod'e-kabèli lula-nèti Yanes dènge Yamres.
Kèpe pa'èra-èra lii holo-nori dhu èu sèmi more le
10 Timotius! Èu me'a aa'i le mamuri ja'a. Èu me'a aa'i ngaa dhu ja'a aj'a. Èu me'a j'ara mamuri ja'a. Èu me'a d'ara dad'èi ja'a. Èu me'a ngaa dhu ja'a parcaya. Èu mèdhi unu mu le, ja'a taha kore d'ara, aa sasue ja'a mi dhèu. Aa èu me'a tasamia ja'a taha ètu d'ara j'aj'èra dènge be'a. 11 Èu me'a kahèi ra hake-paparu ja'a, aa dui rupa-rupa j'aj'èra. Ja'a abhu j'aj'èra sèmi èèna ètu kota Antiokia, Ikonium, dènge Listra. Te ngaa Ama Lamatua patalale eele ja'a nèti j'ara sèra aa'i-aa'i.b 12 Mema dhèu aa'i-aa'i dhu parcaya Yesus Kristus, aa neo mamuri mola-mèci madhutu dad'èi Ama Lamatua, tatu dhèu paj'èra rèngu. 13 Ngaa hari, dhèu bhelu dènge dhèu kapod'e-kabèli sèra, asa tabha bhelu. Rèngu kapod'e-kabhèli ho pamanahu dhèu leo, te ngaa rèngu sèra lèke kapod'e kahèi.
14 Te ngaa èu hud'i kèpe pa'èra-èra lii holo-nori dhu èu abhu le. Aa ngaa dhu èu parcaya èèna, madhutu taruu. Te èèna ka dhu lèke! Èu me'a mèu cee ka dhu aj'a aa'i-aa'i sèra mi èu! Èu bisa lèka si!c 15 Karèi nèti èu ana iiki era, èu abhu a'aj'a le isi nèti Sasuri Mola-Mèci Ama Lamatua. Nèti Sasuri se'e, èu me'a rahasia mamuri dhu lèke, dhu tao èu me'a mèu j'ara mamuri. Nèti èèna ka, èu parcaya Yesus Kristus. 16 Aa'i-aa'i dhu ra suri ètu d'ara Sasuri Mola-Mèci, mema Ama Lamatua ka dhu uri ho dhèu suri sèra. Gaguna Sasuri èèna, nuka: aj'a dhèu ngaa dhu lèke, pad'elo sasala dhèu, ère hari dhèu asa j'ara dhu mola, aa nori dhèu ho bèli-bèli mamuri madhutu dad'èi Lamatua. 17 Dènge sèmi èèna, Sasuri Mola-Mèci èèna bisa tao pamèci dhèu unu Lamatua sèra, sèna ka rèngu re'a sasab'a dhu be'a aa'i-aa'i.