Lii maho'o nèti ja'a, Paulus. Ama Lamatua ded'e le ja'a j'aj'i dhèu pajuu-paleha Yesus Kristus. Aa Lamatua Yesus, era sanao-maena dhu hia èdhi mamuri taa-taa dènge Nèngu, lula Ama Lamatua pakaj'èu èdhi nèti koasa sasala-sasigo.

Timotius! Èu ne, nuka sèmi ana matana ja'a, lula ja'a ka dhu pad'elo j'ara ka èu parcaya Kristus. Ja'a sabaj'a sèna ka Ama Lamatua èdhi, dènge Kètu èdhi, Yesus Kristus, pad'elo d'ara hua iia Rèngu, aa hia èu mamuri dènge mera-milu.^a

3 Uru èèna, dua ti ètu kota Epesus. Lod'o ja'a neo laku asa propensi Makedonia, ja'a manèngi èu ho pea ètu Epesus. Te lod'o èèna, abhu dhèu dhu pab'ingu dhèu sarani sèra dènge aj'a j'ara-j'ara dhu lèke boe. De ja'a manèngi sèna ka èu lamu kai si, ho ra loe eele ka. 4 Aa dhèu sèra core eele lod'o iia d'ara kahèi lasi palolo nanuku, pab'ala lii dènge kapod'e-kabèli nèti bèi-baki toke lai ana lai èpu. J'ara sèmi sèra, dhoka hia dhèu patao-palaha, aa hia boe ra mamuri dènge parcaya mi Ama Lamatua.

5 Ja'a holo èu, sèna ka èu aj'a dhèu parcaya sèra ho mamuri pasue èci dènge èci kahèi. Sasue ra hud'i mai nèti d'ara dhu mèu, nèti ngangee dhu mola, aa nèti parcaya dhu koe-kapengo boe. 6 Te ngaa abhu mese cahag'e dhu kako sala le j'ara, ra tèke eele lii holo-nori. Hèia lasi core eele lod'o iia d'ara dènge padhue-padhai j'ara-j'ara dhu dènge boe kolo-kapua. 7 Rèngu padedha iisi ra, peka na, rèngu mese dhu aj'a madhutu atora Musa. Ra tao iisi ra sèmi mese aae, te ngaa re'a boe ngaa dhu rèngu aj'a-nori èèna.

8 Èdhi aa'i-aa'i ti te'a, huku Musa èèna be'a, sad'i èdhi pake ne madhutu dad'èi Ama Lamatua. 9 Atora sèra suri boe hia mi dhèu dhu mamuri mola le. Te ngaa pala mi dhèu palab'a, dhu d'èi boe nanene paredha, dhu mamuri pakaj'èu nèti Lamatua, dhu d'èi ad'u-ue bhelu-katub'a, dhu pusi-pahae boe Lamatua, dhu pamud'e j'ara-j'ara dhu hua iia, dhu tuka pamadhe dhèu, dènge dhu pamadhe ina dènge ama ra. 10 Atora sèra suri kahèi hia dhèu kajeo dènge bhèni do dènge mone, aa mone dhu tao j'ara makae dènge mone, dhu rai rèti dhèu ho sui dènge doi-dhari, dhèu dhu kapod'e-kabèli, dhu j'aj'i sakasii omo koso, aa hia dhèu aa'i-aa'i dhu d'èi palab'a lii aj'a dhu lèke. 11 A'aj'a dhu lèke sèra, mai nèti Lii Lolo Be'a Ama Lamatua dhu Na pangèd'u mi ja'a. Aa Lamatua èèna, Ama Lamatua dhu kapai risi eele. Nèti èèna ka, dhèu ded'e Ne padedha-dedha.

12 Ja'a manèngi makasi ae-ae mi Kètu èdhi, Yesus Kristus, lula Na lèka ja'a, ka Na hia ja'a bisa pakako sasab'a Na. 13-14 Masi ka uru èèna, ja'a d'èi padhai pa'ele iie kolongara Yesus, aa paj'èra dhèu-dhèu dhu madhutu j'ara mamuri Na. Ja'a d'èi ènyi raruri si. Bhabhelu ja'a sèmi èèna, lula uru èèna, ja'a ke'a boe ngaa dhu ja'a tao, aa parcaya mèka Yesus Kristus. Te ngaa Ama Lamatua core eele boe ja'a. Ka Na pad'elo sasue Na mi ja'a.^b Mia hari Kètu èdhi, Yesus Kristus, loe boe pad'elo d'ara hua iia Na mi ja'a! Nèngu hia mèngi-nale dhu ae hia ja'a, sèna ka ja'a bisa parcaya Ne, aa ja'a bisa sue dhèu leo kahèi nuka sèmi Nèngu sue ja'a.

15 Èdhi biasa tadèngi le, peka na, “Yesus Kristus mai le asa rai-haha, ho pala-bagi mamuri mi dhèu dhu ad'u-ue sasala.” Mema tare'a sèmi èèna! Nèti dhèu aa'i-aa'i ra dhu ad'u-ue sasala, ja'a ka dhu bhelu risi eele. 16 Masi ka ja'a bhelu sèmi èèna, te ngaa Ama Lamatua huku boe ja'a. Te nare ja'a j'aj'i mi tadha sena ka pad'elo sasue Yesus Kristus mi dhèu dhu bhelu risi eele, nuka sèmi ja'a ne'e ne. Dènge j'ara ne'e ka, dhèu leo dhu tao sala sèra bisa parcaya Ne kahèi, ka ra abhu mamuri taa-taa dènge Ne.

18 Ana Timotius dhu be'a! Ja'a neo peka dènge èu ngaa dhu hud'i èu tao ku ètu d'ara sasab'a-la'a èu. Aa'i-aa'i se, madhutu ngaa dhu dhèu rèti lii padhai Lamatua peka tèke le lula-nèti èu ne. Ladhe èu madhutu lii se'e dènge mola-mola, èu sèmi ca dhèu sordad'u dhu bisa pamusu dènge be'a, ho lab'a bhabhelu-katub'a. 19 Kèpe pa'èra-èra lalèka èu mi Yesus Kristus. Aa j'aga paie, sèna ka d'ara èu mola taruu. Te abhu kahèi dhèu leo dhu ro'o heka nanene d'ara iiki ra, dhu pa'ele iie parcaya rèngu, nuka sèmi kapa rage nare hadhu aae. 20 Himeneus dènge Aleksander si, ra sèmi èèna ka! Nèti èèna ka, ja'a soro le rèngu asa dhèu aae nidhu. Ja'a tao sèmi èèna, sèna ka aj'a si loe eele pakarehe kolongara Lamatua,