Èdhi hud'i mamuri ku nuka sèmi sordad'u dhu parai eela boe dènge komedhaa
2
Ana Timotius dhu ja'a sue! Yesus Kristus d'ara hua iia titu kèna. Limuri ne, èu èci le dènge Nèngu. Na pa'èra èu. De èu me'a dhoka sèmi more di! 2 Uru èèna, ja'a aj'a le èu ètu madha dhèu ae lula-nèti j'ara mamuri Lamatua dhu mola. De limuri ne ja'a manèngi èu, ho aa'i-aa'i dhu èu tadèngi nèti ja'a, lamu aj'a hari hia dhèu dhu èu bisa lèka si. Dhèu sèra hud'i bisa lasi aj'a hari sèmi èèna kahèi mi dhèu leo.3 Èdhi aa'i-aa'i ti, nuka sèmi sordad'u Yesus Kristus. De èdhi pasae j'aj'èra sèmi Nèngu kahèi. Lula èu ne sordad'u dhu be'a, èu hud'i pasae more ku pala unu mu. 4 Sordad'u dhu pakako sasab'a bisa boe sab'a pab'ali dènge sasab'a dhu leo. Dènge j'ara sèmi ne'e, nèngu ne'a pakarej'e d'ara komedhaa na.
5 Tare conto leo sèmi olaraga. Ladhe madhutu lomba, hud'i madhutu ku atora na. Te ladhe aad'o, na, kalua! Bisa boe abhu juara. Sèmi èèna kahèi, ladhe neo pakako sasab'a Lamatua, madhutu ku atora Na.
6 Ladhe kahèi dhèu sab'a oka-tedhe. Na sab'a dènge tèku rui na ètu d'ara oka na. De nèngu ka dhu uru tèka abhu hua-hela. 7 Pangee paie-iie conto sèra. Pe Ama Lamatua hia me'a mèu j'ara sèra aa'i-aa'i ra.
8 Pangee pabe'a-be'a mi Yesus Kristus. Nèngu èèna ana-èpu dhèu aae Daud. Na madhe, te ngaa Ama Lamatua pamamuri Ne. Èèna ka j'aj'i Lii Lolo Be'a dhu ja'a laku peka-padhai ètu mia-mia. 9 Lula ja'a lole Lii Lolo Be'a, èèna ka ja'a j'èra sèmi ne'e ne. Risi-risi hari ra èki-karadhe ja'a dènge rate, tao ja'a sèmi dhèu bhelu-katub'a sa. Te ngaa rèngu taha rare boe Lii Lolo Be'a Ama Lamatua. 10 De ja'a sadia pasae rupa-rupa j'aj'èra. Sad'i dhèu unu Lamatua dhu Na hag'e nare sèra abhu mamuri. Pe Ama Lamatua ded'e si padedha-dedha, lula rèngu j'aj'i dhèu unu Yesus Kristus. 11 Aa lii se'e mema lèke tare'a:
“Ladhe èdhi mangaku, na, Kristus madhe ho gati èdhi,
èci èèna ka èdhi madhe tèke eele mamuri dhui,
hèia èdhi kahèi mamuri bera-bera dènge Ne.
12 Ladhe èdhi taha ètu d'ara j'aj'èra,
èdhi tèd'u paredha sama-sama dènge Nèngu kahèi.
Te ngaa ladhe èdhi pasili Ne,
Nèngu pasili èdhi kahèi.a
13 Masi ka d'ara èdhi satia boe,
te ngaa Nèngu satia taa-taa,
lula Nèngu bisa boe leko-monya. Ngaa dhu Na peka, èèna ka dhu Na tao.”
Dhèu sab'a dhu Lamatua pakab'ua
14 Pasanèd'e dhèu parcaya, sèna ka rèngu baku bhèlu j'ara se'e aa'i-aa'i ra. Kai si dènge kolongara Ama Lamatua, ho ra loe eele ka nèti pa'uji lii padhai lii. Te aa'i-aa'i sèra guna boe ngaa-ngaa. Dhodhoka pa'ele iie ngangee nèti dhèu dhu nanene. 15 Tenge j'ara dhu be'a, sèna ka tao iisi èu nuka sèmi dhèu sab'a dhu nia abhu koa nèti Ama Lamatua. Dhèu sèmi èèna parluu boe makae, lula nèngu èèna sab'a sasab'a na dènge be'a. Èu hud'i j'aj'i dhèu dhu aj'a dènge mola Lii Holo-Nori Lamatua mi dhèu, aa baku dènge koe-kapengo. Lula Lii Holo-Nori Na, mola! 16 Pakaj'èu nèti lii padhue dhu dènge boe kolo-kapua, aa nèti lii padhai dhu pakab'ua boe Lamatua. Te sèra sa dhoka tao dhèu asa bhelu-katub'a. 17 Lii padhai dhu bhelu-katub'a sèra paj'ala sèmi èi papèd'a kangker. Lii padhai Himeneus dènge Filetus sèmi sèra ka! 18 Dua ra aj'a sala, peka na, dhèu madhe mamuri aa'i hari le. Te ngaa èèna lèke boe! Dènge j'ara sèmi èèna, rèngu se piku eele nèti ngaa dhu lèke. Ngaa dhu rèngu aj'a se'e, pa'ele iie parcaya nèti dhèu cahag'e.
19 Te ngaa kapua dhu Ama Lamatua padhèdi nare èèna, kalau-karèto boe. Ètu kapua èèna, dhu suri peka na, “Lamatua tadhe mèu dhèu unu Na,” aa, “Dhèu cee dhu pahaha iisi mi Ama Lamatua, hud'i pakaj'èu ku nèti bhelu-katub'a.” Kapua èèna, dhèu unu Lamatua.b
20-21 Ètu d'ara èmu dhèu kaja, abhu rupa-rupa mèdha-panyau. Abhu dhu tao nèti hualaa iia dènge hualaa pudhi. Te ngaa abhu kahèi dhu tao nèti aj'u dènge rai kalili. Mèdha dhu kab'ua, lamatua èmu na d'èi pake ètu d'ara iia-aala. Te ngaa mèdha dhu biasa sèra, lamatua èmu makae pake ètu madha dhèu. Sèmi èèna kahèi dènge dhèu rai-haha. Ladhe abhu dhu pakaj'èu iisi ra nèti bhelu-katub'a, nèngu èci èèna ka dènge mèdha-panyau dhu kab'ua sèra. Lamatua èmu d'èi pake ne, lula nèngu dènge gaguna sèna ka tao rupa-rupa sasab'a dhu be'a.
22 Ana ngèru sèra manahu malai lula madhutu dad'èi ra. Te ngaa èu, Timotius, hud'i j'aga ngi'u mu paie-iie, ho baku madhutu dad'èi d'ara sèmi èèna. Tenge j'ara ho tao dhu be'a taruu. Parcaya taruu Lamatua. Mamuri pasue aa padame dènge dhèu leo. Dhèu aa'i-aa'i dhu parcaya Lamatua, dhu mamuri dènge d'ara mola-mèci, rèngu d'èi dhoka tao j'ara dhu be'a. De èu, Timotius, hud'i mamuri ku sama sèmi rèngu sèra! 23 Ja'a pasanèd'e hari èu ca tèka! Baku lamu soro iisi asa d'ara lii langu dhu dènge boe kolo-kapua. Te sèra sa dhodhoka tao dhèu ho patao-palaha di. 24 Dhèu dhu sab'a hia Lamatua nia boe j'aj'i dhèu dhu tenge lii langu, sina ma? Te ngaa rèngu sèra hud'i d'ara be'a dènge dhèu aa'i-aa'i ra, dhu d'èlu-mèu aj'a-nori dhèu, dhu taha rare d'ara ropa paraga dènge dhèu dhu tema tenge lii langu. 25 Rèngu hud'i holo paie-iie dhèu dhu palab'a sèra. Dènge sèmi èèna, ele boe Lamatua hia si ele-ho'a, hèia ra sèmi rare ngaa dhu lèke. 26 Hèia ra mase'a, ka ra rai nèti kacui-aai dhèu aae nidhu, dhu uru èèna èki si ho madhutu dad'èi na.