2b Timotius! Aj'a aa'i-aa'i se, aa pa'èra d'ara dhèu sarani sèra, sèna ka tao madhutu aa'i-aa'i ra. 3 Lii aj'a-nori èdhi dhu lèke èèna, j'aj'i kapua nèti d'ara mamuri èdhi dhu pakarej'e d'ara Lamatua. Te ngaa dhèu dhu nori leo nèti lii aj'a se'e, dhèu sèra dhu core eele le lii Lamatua Yesus Kristus dhu lèke. 4 Dhèu sèmi èèna, padedha iisi, te ngaa goa. Papèd'a rèngu ka d'èi dhoka tenge lii langu, aa pab'ala d'ara lii. J'ara se'e se ka dhu tao dhèu ho: tèka d'ara, patao-palaha, pa'ele iie kolongara dhèu leo, aa pangee dhu lèke boe mi dhèu leo. 5 Dhèu sèmi se'e, loe boe patao-palaha. Ngangee ra karehe bia. Re'a heka mia ka dhu be'a.

Rèngu ngee, ladhe rèngu maj'èni dènge j'ara-j'ara agama, rèngu bisa j'aj'i dhèu kaja-su'i.

6 Mema, agama bisa hia a'oto mi dhèu. Te mamuri dènge Lamatua èèna ka dhu hia dhèu karej'e nèti ngaa dhu rèngu unu. Èèna, heka agama dhu lèke kèna. 7 Sanèd'e paie-iie! Lod'o rara iisi èdhi, èdhi tèti boe ngaa-ngaa èci sa asa rai-haha ne. Aa ladhe lod'o madhe, tèti boe ngaa-ngaa èci sa kahèi nèti rai-haha ne. 8 De sad'i dènge nganga'a, mèdha-papake sèra sa nia le!

9 Te ngaa dhèu dhu neo kaja, mud'a titu kèna lèke dadugu-rariu rupa-rupa, aa lèke sasii g'ana-kariu, lula rèngu pangee dhoka mèdha-panyau di. J'ara se'e se ka dhu pa'ele iie mamuri rèngu. 10 Te sue doi-dhari, èèna j'aj'i mi amo nèti rupa-rupa bhabhelu. Abhu dhèu cahag'e magèle dhoka doi-dhari di, toke ra pakaj'èu nèti parcaya ra dhu lèke. Hèia rèngu mesa ra pa'ele iie mamuri ra.

11 Timotius! Èu ne, dhèu unu Ama Lamatua. De pakaj'èu iisi nèti bhabhelu-katub'a aa'i-aa'i. Mamuri mola-mèci. Mamuri madhutu dad'èi Lamatua ètu madha j'ara aa'i-aa'i ra. Parcaya taruu mi Yesus Kristus. Sue dhèu aa'i-aa'i ra. Pa'èra ètu d'ara j'aj'èra. Mamuri d'ara be'a dènge dhèu aa'i-aa'i ra. 12 Sab'a pa'èra-èra dènge d'ara kateme, sèna ka pakako lii holo-nori aa'i-aa'i dhu èdhi parcaya. Lamatua paroa le èu, ho abhu mamuri taa-taa. De liku pa'èra-èra mamuri èèna, baku patalale eele. Aa èu dhu peka le ètu madha dhèu ae, lula-nèti parcaya èu mi Lamatua Yesus. 13-14 De nèti deo ne'e, ja'a manèngi èu pa'èki lii pajaji sèmi ne'e: tao madhutu lii paredha aa'i-aa'i nèti Lamatua Yesus. Baku sisu èci sa hèi, sèna ka dhèu baku rèdhi sasala èu. Tao madhutu aa'i-aa'i ra dènge mola-mola toke lod'o mamai hari Kètu èdhi, Yesus Kristus. Ja'a manèngi èu jaji sèmi èèna ètu madha Ama Lamatua. Nèngu ka dhu hia le samanga mi dhu mamuri aa'i-aa'i ra. Ja'a manèngi kahèi èu jaji sèmi èèna ètu madha Yesus Kristus. Nèngu dhu peka paled'a le, lula-nèti ngi'u Nèngu, ètu madha gubernur Pontius Pilatus.^a

17 Peka mi dhèu kaja ètu rai-haha ne, ho rèngu baku padedha iisi, aa baku dhoka maena mèdha-panyau rèngu di. Te mèdha-panyau sèra, bèli-camèd'a èla aa'i. De dhu lèke ka, maena dhoka mi Ama Lamatua dhu mamuri di. Te Nèngu ka dhu pala-bagi èdhi ngaa-ngaa dhu èdhi parluu, sèna ka èdhi mamuri dènge karej'e. 18 Peka dènge ra, ho pake kakaja sèra sèna ka tao dhu be'a. Rèngu hud'i maj'èni tao dhu be'a. Rèngu hud'i bhoke kacui-aai ho soru-bara dhèu leo, aa d'èi pala-bagi mèngi-nale dhu rèngu abhu nèti Lamatua. 19 Hèia ra pakaboko mèdha-panyau ho j'aj'i mi kapua dhu èra, hia mamuri ra bèli-camèd'a. Ka rèngu unu mamuri dhu dènge kab'ua.

20 Timotius! J'aga paie aa'i-aa'i dhu Ama Lamatua pangèd'u le mi èu. Baku lamu padhai lii dhu dènge boe kolo-kapua. Baku padhai lii kaj'alu dhu pakab'ua boe Ama Lamatua. Sanèd'e, ee! Te abhu dhèu dhu pangee, na, rèngu dhèu d'èlu-mèu. Te ngaa ‘mamèu’ rèngu sèra dhu hèb'a hua. Baku lamu pab'ala lii padhai dènge ra. 21 Abhu dhèu cahag'e lèka lii aj'a-nori dhu kapod'e-kabèli sèra, toke ra sero eele nèti parcaya ra dhu lèke mi Ama Lamatua.

Ja'a manèngi sèna ka Ama Lamatua pad'elo d'ara hua iia Na mi dedha èu dènge angalai mu si aa'i-aa'i ra.