Tatao Timotius mi dhèu sarani
5
Baku tao lii sakaa dènge dhèu mone dhu heka risi nèti èu. Te ngaa dènge lii mako, nuka sèmi èu padhai lii dènge ama mu. Aa mi dhèu dhu ngèru risi, pa'èra d'ara si, tao nuka sèmi ari mu. 2 Sèmi èèna kahèi mi dhèu bhèni dhu heka risi sèra. Padhai lii dènge rèngu, nuka sèmi èu padhai lii dènge ina mu. Aa ladhe padhai lii dènge ana bhèni ngèru, tao si nuka sèmi ana hèni èu. D'ara èu hud'i mola dènge si.Bhèni balu
3-5 Dhèu sarani hud'i soru-bara bhèni balu dhu dènge heka a'ari sèna ka ladhe-leru si. Te ngaa bhèni balu dhu ana-èpu era, na, rèngu ka dhu hud'i ladhe-leru ne. Aj'a si, sèna ka re'a b'ala sasue ina ra dhu rèngu abhu sèra. Dènge sèmi èèna ka, rèngu sab'a hia Ama Lamatua, ho pakarej'e d'ara Na. Te ngaa bhèni balu dhu tare'a-re'a mamuri mesa di, nèngu dènge boe ca dhèu sa dhu ladhe-leru ne. Nèngu dhoka maena mi Ama Lamatua di. Mèu-mèda na manèngi sasue Ama Lamatua. Dhèu sarani hud'i ladhe-leru ku bhèni balu sèmi sèra sa.
6 Te ngaa bhèni balu dhu d'èi dhoka mamuri na karej'e-karae di, masi ka na mamuri era, te ngaa dènge heka kab'ua, sama sèmi dhèu dhu madhe le.
7 Pasanèd'e j'ara se'e aa'i-aa'i mi dhèu sarani sèra, sèna ka dhèu leo baku pa'ele iie kolongara rèngu.
8 Aa ladhe abhu dhèu dhu ro'o boe ladhe-leru a'ari na, risi-risi hari isi èmu na, èèna sama sèmi nèngu pèci eele lalèka nèngu mi Lamatua. Nèngu bhelu risi nèti dhèu dhu tadhe boe Ama Lamatua.
9 Ladhe neo ded'e bhèni balu ho soru-bara kètu juma'at, j'ara na sèmi ne'e ka: umur nèngu bisa boe kura nèti 60 tèu; uru na nèngu satia dènge dhèu èmu na ca dhèu di; 10 dhèu re'a, na, nèngu ca dhèu dhu tema tao babe'a mi dhèu; dhu ladhe-leru ana-ana na dènge be'a; dhu bhoke tèke kacui-aai ho leru dhèu leo; dhu soru-bara dhèu parcaya sèra ètu d'ara sasab'a, masi ka dhu samaa èèna ka; dhu d'èi soru dhèu ètu d'ara sasusa; aa dhu bhori mema ho soru-bara ètu madha j'ara dhu be'a.
11 Baku pili bhèni balu dhu ngèru era, ho sab'a ètu d'ara juma'at. Te mage dhoka cèu ètu d'ara na, ho neo hari leo-èmu. Ladhe sèmi èèna, rèngu se abhu heka lod'o dhu taleo, ho lalau dhèu sarani dènge be'a. 12 Te ladhe lod'o dhu rèngu pake hia juma'at èèna kura, èci èèna ka dènge rèngu pa'ele iie lii pajaji rèngu ètu katanga madha Lamatua. Èèna na, dhèu pasala si. 13 Mage dhoka rèngu bai-eed'a, aa maso-kalua èmu dhèu, padhai-kaked'u pa'ele iie kolongara dhèu. Aa dhu karehe risi eele hari, rèngu soro iisi asa d'ara lii langu dhèu leo, dènge padhai dhu lèke boe. 14 Be'a risi eele, bhèni balu dhu ngèru era leo hari èmu, sèna ka rara iisi, aa ladhe-leru d'ara èmu rèngu. Dènge sèmi èèna, dhèu dhu pamusu dènge èdhi abhu boe j'ara ho pa'ele iie kolongara èdhi. 15 Abhu bhèni balu ngèru cahag'e dhu kako sala j'ara. Rèngu se madhutu j'ara dhèu aae nidhu.
16 Ladhe abhu bhèni dhu parcaya Lamatua, dhu a'ari ra j'aj'i le bhèni balu, na, bhèni ne hud'i ladhe-leru ku bhèni balu èèna. Baku soro tèke hia juma'at ladhe-leru. Dènge j'ara sèmi èèna juma'at bisa ladhe-leru bhèni balu dhu leo, dhu tare'a-re'a dènge heka a'ari.
Tatao dhu pakab'ua kètu juma'at
17 Dhèu dhu ladhe-leru juma'at dènge be'a, miu hud'i pakab'ua risi ne, aa b'ae gaji dènge be'a. Risi-risi rèngu dhu sab'a dènge d'ara kateme, ho lole pataraa Lii Holo-Nori Lamatua, aa aj'a j'ara mamuri dhu lèke. 18 Te dhu suri ètu d'ara Sasuri Mola-Mèci Lamatua, peka na, “Ladhe pake sapi j'èli puru are nèti huri, mage mi kape hèb'a na kahèi, sèna ka bisa na'a.” Aa dhu suri kahèi, peka na, “Cee ka dhu sab'a, na, nèngu hud'i abhu gaji ku.”a
19 Ladhe abhu dhèu dhu galaa kètu juma'at, baku sad'i sèmi mere di! Hud'i abhu ku dua do tèlu sakasii dhu lii èci, heka mi sèmi mere ho parisa ne.b 20 Ladhe miu kai ne, te ngaa na mamuri taruu madhutu d'ara sasala èèna, kai hari ne ètu madha juma'at. Dènge j'ara sèmi èèna, dhèu leo bani boe madhutu tatao èèna.
21 Pakako aa'i atora se'e mi juma'at dhu hag'e boe, aa baku bia cabèka. Ja'a pangèd'u sasab'a ne'e mi d'ara kacui-aai èu, ètu katanga madha Ama Lamatua dènge Yesus Kristus. Ana pajuu dhu Ama Lamatua hag'e nare ètu sorga, j'aj'i sakasii kahèi!
22 Baku pamèri ded'e dhèu j'aj'i kètu juma'at. Ladhe uuru ku paie-iie ne. Te ladhe miu ded'e sad'i ngara di, hèia dhèu ne tao sala, na, miu pasae sasala èèna kahèi, lula tatao na. J'aga paie ngi'u èu sèna ka mamuri mola taruu.
23 Ja'a tadèngi èu kabake pèd'a taruu. Be'a risi nèti deo ne'e, èu pab'ali èi dènge anggor ciki tao sèmi èi na'i. Baku minu dhoka èi iia di.
24 Ladhe paie-iie! Abhu sasala dhèu dhu cèu mema. Rèngu d'ai mèka madha hakim, te ngaa dhèu aa'i-aa'i dhu re'a le èèna. Te ngaa abhu dhèu leo kahèi dhu nèbhu-nèbhu ku, heka sasala ra cèu kèna. 25 Sèmi èèna kahèi dènge dhèu dhu tao be'a sèra. Abhu mema dhu led'a. Te ngaa cahag'e pahuni-pahuni tao dhu be'a. Te ngaa masi ka sèmi èèna, ngaa dhu rèngu tao sèra, nèbhu-nèbhu cèu asa li'u kahèi. Bisa boe pahuni tatao dhu be'a.