2 Tesalonika
Sasuri Paulus ka dua
hia dhèu sarani ètu kota Tesalonika
Lii maho'o
1
Lii maho'o nèti ja'a Paulus, aa angalai ja'a, Silas dènge Timotius.Sasuri ne'e, ji'i pa'adhu hia miu dhèu sarani aa'i-aa'i ètu kota Tesalonika. Miu ka dhu pama'ète mere le, ho madhutu Ama Lamatua èdhi, dènge Kètu èdhi, Yesus Kristus.a 2 Ji'i manèngi sèna ka Rèngu pad'elo d'ara hua iia Ra hia miu, ho miu mamuri dènge mera-milu.
Paulus manèngi makasi mi Ama Lamatua
3 A'ari aa'i-aa'i! Dhu lèke, ladhe èdhi loe boe manèngi makasi mi Ama Lamatua, lula miu asa parcaya Ne, aa asa pasue èci dènge èci. 4 Nèti èèna ka, ji'i palolo dènge dhèu sarani ètu mia-mia, lula-nèti mamuri miu. Ji'i palolo, peka na, masi ka dhèu leo paj'èra miu, te ngaa miu rai boe nèti parcaya mi.
5 Se'e se peka na, bèli-camèd'a Ama Lamatua j'ue lii langu miu dènge mola. Te j'aj'èra dhu miu pasae èèna ka, hia miu nia j'aj'i mi dhèu unu Na. Aa Nèngu èèna, Dhèu Aae miu. 6 Baku madha'u, te Lamatua pama'ète lii langu dènge boe bia cabèka. Mi ladhe, ee! Bèli-camèd'a Na b'ala mi dhèu dhu paj'èra miu. 7 Aa Nèngu hia miu ae mere d'ara nèti j'aj'èra dhu mi pasae kahèi. Sèmi èèna mi dedha ji'i kahèi.
Se'e se j'aj'i, lod'o Lamatua Yesus puru mai nèti sorga, palere-lere dènge ana pajuu Na sèra dhu èra titu kèna. 8 Rèngu puru mai dènge ai dhu heo robhe-robhe. Hèia Na b'ala mi dhèu aa'i-aa'i dhu ro'o boe tadhe Ama Lamatua, aa dhu madhutu boe Lii Lolo Be'a nèti Lamatua Yesus. 9 Na hia huku dhu bia titu kèna mi rèngu aa'i-aa'i ra, ka palaho si taa-taa. Na babège si nèti katanga madha Na, ka ra rasa heka koasa Lamatua dhu kapai.b 10 Lod'o Na mai èèna, dhèu parcaya aa'i-aa'i ra paca'e padedha-dedha kolongara Na, aa ra pakab'ua Ne. Bèli-camèd'a miu ètu talora aae dhèu-dhèu parcaya sèra kahèi, lula miu sèmi mere le Lii Lolo Be'a dhu uru èèna ji'i peka le dènge miu.
11 Nèti èèna ka, mèu-mèda ji'i ma'ète boe manèngi-mangaj'i hia miu, sèna ka madhutu a'abhu Ama Lamatua, na, miu nia j'aj'i dhèu unu Na. Ji'i manèngi sèna ka Na hia koasa Na mi miu kahèi, ho miu bisa tao madha j'ara aa'i-aa'i dhu be'a madhutu ngaa dhu miu parcaya, aa madhutu ngaa dhu miu neo tao. 12 Ladhe miu mamuri dènge j'ara sèmi èèna, dhèu ded'e padedha-dedha kolongara Lamatua Yesus. Aa miu abhu koa-kad'iri kahèi, lula miu madhutu Ne. Se'e aa'i-aa'i ra, mai nèti babe'a d'ara Ama Lamatua èdhi, dènge Kètu èdhi, Yesus Kristus.