Baku pamud'e dènge dhèu dhu aj'a pakapod'e dhèu sarani
4
Te ngaa ne'e ne, Roh Ama Lamatua dhu peka paled'a le, na, bèli-camèd'a dhèu sarani cahag'e patalale eele ngaa dhu èdhi parcaya. Ho lasi madhutu roh-roh dhu sala aa dhu leko-monya, aa lasi madhutu lii holo-nori nidhu bhelu sèra. 2 Dhèu dhu mai nori sèmi sèra, padhai lii leo, tao leo. Dhèu sèra mema dhèu dhu kapod'e-kabèli! Dhèu sèra sa, d'ara iiki ra dhu bèdhu le. 3 Ra aj'a dhèu, baku paleo èmu. Aa ra aj'a dhèu luri rupa-rupa nganga'a. Te ngaa Ama Lamatua ka dhu tao nganga'a-nganginu sèra, ho ladhe dhèu parcaya ra'a, rèngu manèngi makasi mi Nèngu. Te rèngu re'a mia dhu lèke. 4 Ngaa aa'i-aa'i dhu Ama Lamatua tao sèra, tare'a-re'a be'a. De baku luri rupa-rupa. Dhèu hud'i sèmi rare aa'i-aa'i sèra dènge manèngi makasi mi Lamatua. 5 Te èdhi te'a, na, Lii Holo-Nori Ama Lamatua dènge lii manèngi-mangaj'i èdhi sèra ka pamèu si.Dhèu sab'a dhu be'a nèti Lamatua Yesus
6 Timotius! Pasanèd'e j'ara se'e aa'i-aa'i mi a'ari èdhi dhèu parcaya sèra. Ladhe èu tao madhutu sèmi èèna, èu j'aj'i dhèu sab'a dhu be'a nèti Yesus Kristus. Lii Holo-Nori Ama Lamatua sèra ka dhu tao èu parcaya Ne, aa hia me'a mèu, mia ka lii holo-nori dhu lèke. Èu kèpe pa'èra-èra le Lii Holo-Nori Lamatua sèra! Sèra nuka sèmi nganga'a dhu pa'èra ngi'u èu. 7 Baku core eele lod'o iia d'ara dènge palolo omo koso dhu lèke boe dènge dad'èi Ama Lamatua. Baku pusi-pahae dènge lii lolo bhèni heka dhu nèti laluri rupa-rupa. Be'a risi pa'èra taruu ngi'u dènge d'ara èu pabe'a-be'a, sèna ka mamuri madhutu dad'èi Lamatua ètu madha j'ara aa'i-aa'i.
8 Olaraga pa'èra ngi'u na, be'a.
Masi ka babe'a na ciki oo'e di.
Te ngaa pa'èra ngi'u dènge d'ara ho mamuri madhutu dad'èi Lamatua ètu j'ara aa'i-aa'i sèra,
babe'a na ae seli eele.
Babe'a na
mesa boe mamuri ètu rai-haha deo ne'e di,
te ngaa mamuri lèpa limuri kahèi.
9 Lii se'e se, lèke tare'a-re'a! De tèke paie mi d'ara, ho baku bhèlu eele. 10 Èdhi tao era maena mi Ama Lamatua dhu mamuri. Nèngu na ka dhu hia mamuri mi dhèu aa'i-aa'i, risi-risi mi èdhi dhu parcaya Na. Nèti èèna ka, èdhi sab'a dènge d'ara kateme.
11 Nori lii se'e aa'i-aa'i. Aa pua dhèu sèra ho madhutu lii holo-nori sèra. 12 Baku soro tèka dhèu sèra pahae boe èu, lula èu ana ngèru era. Èu hud'i j'aj'i conto hia dhèu parcaya sèra, nèti lii padhai èu, nèti kakako èu, nèti d'ara sasue èu mi dedha dhèu, nèti parcaya èu mi Yesus Kristus, dènge mamuri èu dhu mola-mèci. 13 Ètu d'ara miu tatae mamai ja'a, baku bhèlu baca Lii Holo-Nori Lamatua hia mi dhèu parcaya sèra. Pa'èra d'ara si, aa nori si paie-iie.
14 Pake pabe'a-be'a karunya dhu Lamatua pangèd'u le mi èu, dhu èu sèmi lod'o kètu-kètu juma'at sabaj'a dènge tao kacui-aai mi dedha kètu èu. Lod'o èèna, rèngu peka lii moa Lamatua kahèi lula-nèti j'ara mamuri dènge sab'a-la'a èu. De baku soro tèke karunya dhu èu abhu èèna. 15 Pakako dènge maj'èni j'ara sèra. Sèna ka dhèu aa'i-aa'i ra ladhe rèdhi mamuri dènge sab'a-la'a èu asa be'a. 16 J'aga sèna ka èu mamuri dènge mola. Aa j'aga sèna ka èu loe boe aj'a dhu lèke j'ara. Ladhe èu pa'èra dènge j'ara sèra, pe Lamatua bhoke j'ara hia èu, dènge dhèu-dhèu dhu nanene lii padhai èu, sèna ka miu pakaj'èu nèti bhabhelu-katub'a.