Atora ho ded'e ca dhèu kètu juma'at
3
Mema tare'a sèmi lii dhèu, dhu peka na, “Dhèu dhu neo j'aj'i kètu juma'at, nèngu hag'e nare le sasab'a èci dhu hua iia titu kèna.” 2 Kètu juma'at èèna, hud'i dhèu dhu kolongara be'a. Nèngu hud'i satia dènge dhèu èmu na ca dhèu di. Nèngu hud'i taha nare d'ara na, dhèu dhu patao-palaha boe, dhu dhèu pakab'ua ne, dhu d'èi bhoke babèdho èmu ho dhèu lasi pangad'o dènge ne, aa bisa aj'a-nori dhèu leo. 3 Baku dhèu dhu tema mahu, baku dhèu dhu nasa dènge kacui-aai malai. Dhu lèke ka, dhèu dhu d'ara hua iia, dhu d'èi tenge dame, aa dhu manga'a boe doi-dhari. 4 Nèngu hud'i ne'a uri d'ara èmu na dènge be'a. Ana-ana na re'a pakab'ua dènge d'èi nanene ne. 5 Te ladhe dhèu èèna ne'a boe lalau-lalo'o d'ara èmu na, na, tasa mera mia nèngu bisa ladhe-leru juma'at Lamatua.6 Be'a risi, pili dhèu dhu mamuri palèke dènge dad'èi Kristus. De baku ded'e kètu juma'at nèti dhèu dhu parcaya nèbhu mèka mi Yesus. Te èèna na, rèngu sèra bisa padedha iisi malai. Mage dhoka Lamatua huku si, sama sèmi Lamatua huku dhèu aae nidhu. 7 Dhèu dhu j'aj'i kètu juma'at sèra hud'i dhèu dhu rai lesa re'a pakab'ua ne kahèi. Dènge sèmi èèna nèngu makae boe. Aa dhèu aae nidhu bisa boe pabèbhe ne kahèi.a
Dhèu dhu soru-bara kètu juma'at
8 Sèmi èèna kahèi dènge dhèu dhu soru-bara kètu juma'at. Rèngu sèra hud'i dhèu dhu dènge kolongara be'a, dhèu dhu he'o kajari boe, dhu tema boe rinu mahu, aa dhu d'èi boe ra'e a'oto ae-ae. 9 D'ara rèngu hud'i mola-mèci, aa rèngu hud'i kèpe pa'èra ku Lii Holo-Nori dhu Lamatua bhoke pasaraa hia èdhi, dhèu parcaya se'e. 10 Ladhe paie-iie mamuri dènge sasab'a ra. Ladhe abhu boe sasala si, heka ded'e si ho soru-bara kètu juma'at sèra.
11 Sèmi èèna kahèi dènge dhèu èmu ra. Rèngu sèra hud'i bhèni dhu mamuri madhutu madha j'ara dènge tatao dhu be'a. Mage dhèu dhu tema padhai-kakoli pa'ele iie kolongara dhèu leo. Rèngu hud'i dhèu dhu re'a taha rare d'ara, aa dhèu lèka si kahèi.
12 Aa dhu soru-bara kètu juma'at sèra hud'i mone dhu satia dènge dhèu èmu na ca dhèu di. Nèngu èèna hud'i ne'a uri d'ara èmu na, aa uri ana-ana na dènge be'a. 13 Rèngu dhu lalau-lalo'o dhèu sarani dènge be'a, tatu dhèu asa pakab'ua si. Aa rèngu asa bani, dènge boe madha'u lole parcaya rèngu mi Yesus Kristus.
Kapua nèti lalèka èdhi
14-15 Timotius! Ja'a sanao sèna ka nèbhu boe ja'a dhiu ngad'o èu. Ladhe ja'a pakai, do ako nena ciki, na, ele boe sasuri ne d'ai uuru èu. Sasuri ne ja'a suri ho peka dènge èu, na, dhèu unu Lamatua sèra hud'i ra mamuri tasa mera mia ku. Baku bhèlu, peka na, Lamatua èèna, Ama Lamatua dhu mamuri. Dhèu unu Na nuka sèmi èmu dhu dènge era padhèdi, aa dènge agarii talora dhu èra. Èmu sèmi èèna ka dhu titu èra, sama sèmi dhèu unu Lamatua dhu kèpe pa'èra Lii Holo-Nori Ama Lamatua dhu tare'a, aa rèngu bisa bara ho pakako dènge be'a.
16 Lamatua pasabhoka le rahasia dhu kapai nèti lalèka èdhi. Kapua na sèmi ne'e ka:
Kristus èèna, ca Dhèu dhu Ama Lamatua hag'e nare le karèi nèti uru ka.
Aa Kristus èèna mai le asa rai-haha ne, pake rupa dhèu rai-haha sèmi èdhi.
Roh Lamatua ka dhu j'aj'i sakasii, peka na, Yesus èèna, nuka Kristus.
Aa ana pajuu Lamatua ètu sorga sèra rèdhi Na kahèi.
Ama Lamatua dhu ded'e nèti le asa sorga,
ka nedhe padedha-dedha Ne.
Lii Lolo Na pale-lème le suku-suku ètu rai-haha ne.
Ètu mia-mia ètu rai-haha ne, dhèu aa'i-aa'i parcaya le Nèngu.
Kapua lalèka èdhi sèmi èèna ka!