Atora pakaboko dhèu sarani
2
Dhu uru tèka miu tao: ja'a manèngi miu sabaj'a hia dhèu aa'i-aa'i. Ladhe miu mangaj'i mi Ama Lamatua, manèngi sèna ka Na ladhe-leru dhèu aa'i-aa'i ètu d'ara j'aj'èra. Aa manèngi makasi, lula Na tao le babe'a mi rèngu aa'i-aa'i ra. 2 Sabaj'a sèmi èèna kahèi hia dhèu aae-dhèu aae, dènge dhèu dhu rèd'u paredha. Dènge j'ara ne'e èdhi bisa mamuri mera-milu, dènge dame, madhutu dad'èi Lamatua, mamuri pamèci dènge dhèu dhu pahaha iisi mi Lamatua. 3 Manèngi-mangaj'i sèmi èèna ka dhu be'a. J'ara ne'e ne ka pakarej'e d'ara Lamatua, dhu hia èdhi mamuri. 4 Dad'èi Lamatua ka dhèu aa'i-aa'i ra abhu mamuri, aa re'a mia ka dhu lèke. Nuka sèmi:5 Ama Lamatua èèna, dhoka èci di.
Aa kalete dhoka èci di dhu padame èdhi dhèu rai-haha dènge Ama Lamatua, nuka, Yesus Kristus.
Aa Yesus tare'a-re'a dhèu rai-haha.
6 Na soro iisi Na, ho sui èdhi aa'i-aa'i ti nèti sasala-sasigo èdhi.
Lèke dènge lod'o na, ka Ama Lamatua bhoke le pasaraa lii lolo be'a èèna hia dhèu aa'i-aa'i. 7 Hèia Ama Lamatua hag'e nare ja'a j'aj'i dhèu pajuu-paleha Na, sèna ka laku peka-padhai dènge dhèu Yahudi boe ètu mia-mia, aa nori si sèna ka ra parcaya Lamatua Yesus, dènge mamuri madhutu j'ara dhu lèke. Ngaa dhu ja'a peka ne, tare'a-re'a sèmi èèna. Ja'a leko-monya boe.a
8 Dad'èi ja'a sèmi ne'e ka: ladhe ètu mia-mia miu pakaboko ho manèngi-mangaj'i, hud'i dènge ku d'ara dhu mola-mèci. Baku panasa. Baku patao-palaha. Ladhe sabaj'a, bisa ded'e kacui-aai asa Ama Lamatua, ho j'aj'i mi tadha, peka na, d'ara miu mola-mèci tare'a-re'a.
9-10 Dad'èi ja'a kahèi ladhe dhèu-dhèu bhèni re'a lalau iisi ra pake mèdha-papake dhu pantas. Dhu tao bhèni j'aj'i bhèni iia, lula boe nèti pasaraga rèu kètu, do pake mèdha-papake dhu kab'ua aae dhu nèti makae, do pake risi eele mèdha hualaa, doi pudhi dènge mutiara.b Te dhu tao bhèni sèra j'aj'i bhèni iia, nuka d'ara dhu hua iia, aa rèngu tao dhoka j'ara dhu be'a. Èèna ka pamèci dènge dhèu bhèni dhu pahaha iisi mi Ama Lamatua. 11 Ladhe dhèu sarani pakaboko ho nanene lii holo-nori, na, bhèni sa kahèi madhutu atora, sèna ka pasa dhilu ra be'a-be'a ho nanene lii holo-nori dènge d'ara kateme. Baku pagagai sèna ka tao maruru. 12 Madhutu ngangee ja'a, lèke boe ladhe dhèu bhèni ded'e ngi'u ra ho paredha aa aj'a dhèu mone. Be'a risi bhèni sèra taha d'ara. 13 Te Ama Lamatua paj'aj'i uuru Adam, heka Hawa kèna.c 14 Aa Adam dhu uru boe lèke ag'o nèti dhèu aae nidhu, te ngaa dhèu bhèni. Karèi nèti lod'o èèna, dhèu rai-haha mulai lab'a paredha Ama Lamatua.d 15 Masi ka sèmi èèna, te ngaa dhèu bhèni abhu mamuri lula rèngu rara iisi ana. Sad'i rèngu parcaya tare'a-re'a mi Kristus, mamuri pasue, mamuri dènge d'ara mola-mèci, aa mamuri madhutu j'ara dhu lèke.