Dhèu bhelu-katub'a hud'i mai uuru ku, heka Lamatua Yesus lèpa hari kèna
2
A'ari aa'i-aa'i! Ne'e ne ji'i neo peka dènge miu pèri lod'o Kètu èdhi, Yesus Kristus puru mai, aa dènge j'ara tasamia èdhi bisa pa'èci dènge Ne.a 2 Dhèu baku pagoa miu ho mi ele ngangee ropa tadèngi dhèu peka, na, Lamatua dhu mai hari le. Masi ka ra peka, na, rèngu tadèngi nèti Roh Lamatua, do nèti dhèu, do abhu sasuri nèti ji'i, mage miu lèka kahèi. Te sèra sa ra leko-monya! 3 Baku soro tèka dhèu pagoa miu. Te bèli-camèd'a ca dhèu dhu bhelu-katub'a cèu uuru mai, heka Lamatua Yesus lèpa hari kèna. Dhèu ne'e ne, palab'a dènge Lamatua, toke dhèu ae madhutu ne ho palab'a dènge Lamatua kahèi. Dhèu ne'e ne mema seli-kolane! Nèti èèna ka, nèngu hud'i maso ku asa d'ara naraka. 4 Na padedha iisi na risi nèti dewa aa'i-aa'i ra, aa palab'a aa'i-aa'i dhu dhèu sogo-tagu. Toke na maso asa d'ara Èmu Kapua Manèngi-Mangaj'i Ama Lamatua, ka na padedha iisi, aku nèngu na, “Ja'a ne, Lamatua!”b5 Miu sanèd'e, do aad'o? Uru èèna ja'a dhu peka le dènge miu, lula dhèu èèna, lod'o dhu ja'a bera-bera dènge miu era, si?
6 Limuri ne, d'ai mèka lod'o ho dhèu bhelu-katub'a èèna pacèu iisi na, lula abhu dhu pahèb'e ne era. Aa miu me'a kahèi ngaa ka dhu pahèb'e ne! 7 Limuri ne dhèu bhelu èèna sab'a pahuni-pahuni era, lula abhu dhu pahèb'e ne. Te ngaa ladhe bèli-camèd'a dhu pahèb'e na, patabuli ka ai na, 8 hèia dhèu bhelu ne cèu mai dènge pahuni heka sasab'a na. Te ngaa lèke dènge lod'o kapai mamai Lamatua Yesus, ka Na palaho dhèu bhelu-katub'a ne dènge pake lii ca hèb'a doko di.c
9 Te ngaa lod'o Lamatua Yesus dhae d'ai mèka, dhèu aae nidhu hia koasa kapai hia mi dhèu bhelu ne, sèna ka bisa na tao tadha malaa rupa-rupa, hèia dhèu pangee, na, nèngu ne pake koasa nèti Ama Lamatua.d 10 Dènge sèmi èèna, dhèu ae ka dhu lèke tipu nèti dhèu bhelu-katub'a ne. Rèngu se'e ka dhu d'èi palaho iisi ra. Ama Lamatua dhu bhoke j'ara hia si mamuri, te ngaa ro'o boe sèmi dad'èi Na dhu hua iia èèna, aa ro'o boe parcaya ngaa dhu lèke. 11 Nèti èèna ka, Ama Lamatua pabèdhu d'ara ra nèti ngaa dhu lèke, sèna ka hud'i laa ra parcaya mi kapod'e-kabèli sèra. 12 Dènge j'ara ne'e ka, Ama Lamatua hia si huku dhu bia, lula rèngu lèka boe ngaa dhu tare'a. Te rèngu d'èi risi tao dhu karehe.
Dhèu parcaya hud'i pa'èra ku d'ara
13 A'ari aa'i-aa'i! Ji'i loe boe manèngi makasi mi Ama Lamatua, lula Na sue miu. Te lod'o Na paj'aj'i mèka rai-haha ne, Nèngu pama'ète nare le, sèna ka hia miu mamuri. Ka Na hia Roh Na ho pamèu miu, lula miu parcaya ngaa dhu tare'a. 14 Lod'o ji'i lole Lii Lolo Be'a dènge miu, Ama Lamatua pake Lii Lolo Be'a Na ho ère miu, sèna ka miu me'a dadedha dènge kapai nèti Lamatua Yesus Kristus.
15 A'ari aa'i-aa'i! Taha d'ara dènge kèpe pa'ère-ère lii holo-nori dhu ji'i peka le dènge miu. Sanèd'e kahèi aa'i-aa'i dhu ji'i suri tèke ètu d'ara sasuri ji'i.
16-17 Ji'i manèngi-mangaj'i taruu mi Ama Lamatua èdhi, dènge Kètu èdhi, Yesus Kristus. Ji'i manèngi sèna ka Rèngu pa'èra d'ara miu, ho miu bisa tao j'ara-j'ara dhu be'a. Ji'i manèngi sèmi èèna, lula ji'i nge'a Ama Lamatua sue titu kèna mi èdhi aa'i-aa'i ti. Lula d'ara Na hua iia, nèti èèna ka Nèngu loe boe pa'èra d'ara èdhi. Dènge j'ara ne'e, èdhi bisa sanao-maena taruu mi Nèngu.