Pa'èra ho sèmi mamai Lamatua
5
De a'ari aa'i-aa'i! Ji'i suri ia ka laa, peka na, mamai Lamatua lèke hake pèri, do tanggal pèri. 2 Lula miu aa'i-aa'i mi me'a, na, mamai Na dènge sahèka, sèmi dhèu mana'u dhu mai re mèda.a 3 Lod'o èèna, dhèu ae dhu madhèdi mau-mau, te ngaa cag'ag'a laa paraga dènge j'aj'èra. Mamai Na sama kahèi dènge dhèu bhèni dhu cag'ag'a laa kabake pèd'a neo nara iisi. Ladhe paraga le j'ara ne'e, èdhi pakaj'èu iisi tasamia hari! Èci èèna ka dènge mamai Lamatua.4-6 A'ari aa'i-aa'i! Mage dhoka mamai Na nuka sèmi dhèu mana'u dhu mai re talora mèda, lèke dènge miu dhu bhèj'i luu. Mage lèke miu sèmi èèna kahèi! Èdhi mamuri heka ètu d'ara maroga, sèmi dhèu leo dhu bhèj'i luu era. De èdhi dhu lèka le Lamatua Yesus, mamuri le ètu d'ara saraa, ti pa'èra soru mamai Ne, aa j'aga paie mamuri èdhi. J'ara se'e aa'i-aa'i miu me'a le! 7 Te dhèu dhu bhèj'i, na, bhèj'i re mèda. Aa dhèu dhu mahu, na, mahu re mèda. 8 Te ngaa miu baku sèmi èèna, lula èdhi dhu mamuri le ètu d'ara saraa. Miu hud'i j'aga paie mamuri miu. Ladhe miu parcaya taruu Lamatua aa mamuri pasue, èèna sama sèmi sordad'u dhu pake kodho bèsi dhu pa'abhe kakara. Aa ladhe miu maena taruu mi Lamatua Yesus dhu hia miu pakaj'èu nèti nanasa Ama Lamatua, èci èèna ka dènge sordad'u dhu pa'abhe kètu na dènge solo bèsi.b
9 Ama Lamatua hag'e boe èdhi ho Na huku ti. Te ngaa Na hag'e èdhi sèna ka abhu mamuri, sad'i èdhi lèka Kètu èdhi, Yesus Kristus. 10 Te Na madhe le gati èdhi. De ladhe Na lèpa hari mai, èdhi mamuri taa-taa dènge Ne, masi ka èdhi madhe le, do mamuri era. 11 Nèti èèna ka, pake lii-lii ja'a se'e, sèna ka hia karej'e dènge pa'èra èci dènge èci, sèmi dhu miu tao le karèi nèti uru èèna ka.
Paulus aj'a-nori dhèu sarani ètu Tesalonika
12 A'ari aa'i-aa'i! Sanèd'e ho pakab'ua ina-ama dhu j'aj'i kètu ètu juma'at. Te rèngu sèra sab'a dhu re'a boe j'èra hia miu, aa pasanèd'e miu, sèna ka miu baku manahu asa d'ara sasala. 13 Pad'elo sasue miu dènge ra, sèna ka re'a, na, miu pakab'ua si, lula rèngu sab'a bia hia miu. Mamuri dame èci dènge èci.
14 A'ari aa'i-aa'i! Abhu pèri-pèri j'ara era dhu ji'i neo pasanèd'e miu: dhèu dhu bai-eed'a sèra, peka si sèna ka ra sab'a dènge d'ara maj'èni. Dhu d'ara roe, pa'èra si. Dhu haha, sarimu mere si. Taha d'ara aa lii mako mi dhèu aa'i-aa'i ra.
15 Sanèd'e, bhabhelu baku b'ala dènge bhabhelu. Te ngaa tenge j'ara sèna ka tao be'a dènge dhèu aa'i-aa'i ra. Baku tao be'a dhoka dènge dhèu èdhi di, te ngaa dènge dhèu leo kara kahèi.
16 Pakarej'e d'ara taruu. 17 Sabaj'a mèu-mèda. 18 Sad'i paraga dènge ngaa èèna ka, j'aj'èra, do karej'e-karae, manèngi makasi mi Lamatua. Te Ama Lamatua d'èi dhèu aa'i-aa'i dhu madhutu Yesus Kristus tao sèmi èèna.
19 Baku magee sasab'a Roh Lamatua. 20 Ladhe abhu ca dhèu nèti talora dhèu parcaya dhu peka na, nèngu abhu le lii moa nèti Ama Lamatua, mage miu pusi-pahae boe lii padhai na! 21 Te ngaa miu hud'i kanucu ku paie-iie lii èèna mai tare'a nèti Lamatua, do aad'o. Ladhe tare'a, na, madhutu. 22 Te ngaa pakaj'èu nèti ngaa-ngaa dhu karehe.
Paulus pa'èle sasuri na
23-24 Ja'a sabaj'a manèngi Ama Lamatua ho pamèu d'ara dènge mamuri miu aa'i-aa'i mi. Nèngu èèna ka dhu uri ho èdhi bisa mamuri dame èci dènge èci. Dènge j'ara sèmi èèna, ladhe d'ai lod'o mamai hari Lamatua èdhi, Yesus Kristus, miu bisa titu ètu katanga madha Na dènge ngi'u aae miu, d'ara miu, dènge samanga miu dhu dènge boe sasala ngaa-ngaa. J'ara na sèmi èèna ka! Te Lamatua Yesus dhu paroa miu j'aj'i dhèu unu Na, dhu monya boe. Ngaa dhu Na peka, Na tao madhutu sama sèmi èèna ka. De èèna na, Na lere nèti miu dènge mola-mèci asa katanga madha Ama Lamatua.
25 A'ari aa'i-aa'i! Baku bhèlu manèngi-mangaj'i hia ji'i ètu ne'e.
26 Ja'a manèngi sèna ka miu hia lii maho'o ji'i kahèi mi dhèu sarani aa'i-aa'i ètu sèra!
27 Ja'a manèngi dènge kolongara Lamatua Yesus, ho miu baca hia juma'at aa'i-aa'i ra isi sasuri ja'a ne.
28 Ja'a manèngi sèna ka Kètu èdhi, Yesus Kristus, pad'elo d'ara hua iia Na mi dedha miu aa'i-aa'i mi.
D'ai sange ne'e ka.
Saloom,
Paulus