1 Tesalonika
Sasuri Paulus ka èci
hia dhèu sarani ètu kota Tesalonika
Lii maho'o nèti Paulus si
1
Lii maho'o nèti ja'a Paulus, dènge angalai ja'a Silas dènge Timotius.Sasuri ne, ji'i pa'adhu hia miu dhèu sarani aa'i-aa'i mi ètu kota Tesalonika. Miu ka dhu pama'ète mere le, ho madhutu Ama Lamatua èdhi, dènge Kètu èdhi, Yesus Kristus.
Ji'i manèngi, sèna ka Ama Lamatua pad'elo d'ara hua iia Na hia miu, ho miu mamuri dènge mera-milu.a
Paulus manèngi makasi lula dhèu Tesalonika parcaya taruu
2 Ji'i loe boe manèngi makasi mi Ama Lamatua, lula parcaya miu. Mèu-mèda ji'i sabaj'a hia miu aa'i-aa'i mi. 3 Ji'i sanèd'e sasab'a dhu miu sab'a, lula miu parcaya Ama Lamatua, aa sue Ne. Miu loe boe nèti j'ara èèna, lula era sarai miu ka Lamatua Yesus. Ji'i loe boe kahèi ngèti j'ara se'e aa'i-aa'i asa katanga madha Ama Lamatua.
4 A'ari aa'i-aa'i! Ji'i nge'a Ama Lamatua sue miu. Nèti èèna ka, Na hag'e nare miu j'aj'i dhèu Nèngu. 5 Uru èèna, lod'o ji'i dhiu asa Tesalonika, ji'i peka-padhai dènge miu Lii Lolo Be'a Ama Lamatua. Lod'o èèna, miu pasa dhilu paie-iie ho nanene lii padhai lii ji'i. Miu mesa boe dhoka nanene lii ji'i di, te ngaa miu mèdhi unu mi kahèi koasa Ama Lamatua nèti Roh Na dhu Mola-Mèci èèna. J'ara èèna ka dhu tao miu tare'a-re'a sèmi mere Lii Lolo Be'a èèna. Lod'o èèna, miu mèdhi unu mi j'ara mamuri ji'i dhu tasa mera mia, sèna ka me'a tare'a-re'a, j'ara-j'ara Lamatua. 6 Lula miu pama'ète mere le ho madhutu dad'èi Lamatua, nèti èèna ka miu mamuri madhutu tatao ji'i, aa madhutu j'ara mamuri Lamatua Yesus kahèi. Te ngaa lod'o miu heka sèmi mere Lii Lolo Be'a èèna, abhu dhèu dhu pasusa miu. Masi ka sèmi èèna, te ngaa d'ara miu kalau boe-karèto boe, lula Roh Lamatua dhu Mola-Mèci pakarej'e d'ara miu.b
7 Dènge sèmi èèna, miu pad'elo j'ara hia dhèu parcaya aa'i-aa'i ètu propensi Makedonia dènge propensi Akaya. 8 Mesa boe ètu sèi di. Te Lii Lolo Be'a Lamatua dhu pale-lème le Tesalonika nèti miu se'e ka toke mia-mia. De ji'i peka ngaa hari, lula dhèu aa'i-aa'i tadèngi le lalèka miu mi Lamatua. 9 Ètu mia-mia dhèu palolo, peka na, miu uru na sèmi mere ji'i dènge d'ara kateme. Ka miu core eele mèdha-mèdha sogo-tagu mi, hèia mai madhutu Lamatua dhu tare'a-re'a. Te miu me'a le, na, Lamatua èèna nuka Ama Lamatua dhu mamuri. Nèti èèna ka, èdhi aa'i-aa'i ti madhutu Ne. 10 Rèngu palolo kahèi, na, miu tatae mamai Ana Ama Lamatua nèti sorga, nuka Yesus. Uru èèna dhèu pamadhe Ne, te ngaa Ama Lamatua ka dhu pamamuri hari Ne. Lod'o Ama Lamatua huku dhèu rai-haha ne, na, Lamatua Yesus ka dhu pakaj'èu èdhi nèti nanasa Ama Lamatua.