J'ara mamuri dhu pamaho'o d'ara Ama Lamatua
4
De a'ari, sèmi ne'e ka! Ji'i pamako miu sèna ka miu mamuri pamaho'o d'ara Ama Lamatua, sèmi dhu ji'i aj'a le miu. Mema mamuri miu madhutu le j'ara sèra aa'i-aa'i, te ngaa lula èdhi j'aj'i le dhèu unu Lamatua Yesus, ka ji'i manèngi miu ho tenge j'ara dhu be'a risi hari. 2 Miu aa'i-aa'i mi me'a le ngaa dhu ji'i aj'a miu, pake koasa nèti Lamatua Yesus. 3 Dad'èi Ama Lamatua nuka: mamuri mola-mèci! Baku mamuri kaj'alu ètu d'ara pa'èci bhèni-mone. 4 Miu hud'i me'a lalau ngi'u miu unu mi, sèna ka mamuri mola-mèci ho dhèu pakab'ua miu.a 5 Baku mamuri madhutu dad'èi d'ara mi, sèmi dhèu dhu dhae tadhe mèka Ama Lamatua. 6 Mage abhu dhèu dhu neo tao karehe, aa neo tenge oto dhu risi nèti dhèu dhu sama-sama parcaya Ama Lamatua. Te Ama Lamatua ka, Kètu dhu èèna na b'ala bhabhelu-katub'a aa'i-aa'i sèra. J'ara se'e, ji'i peka le dènge miu pèri-pèri hari, aa pasanèd'e le miu karèi nèti uru ka. 7 Te Ama Lamatua paroa nare le èdhi sèna ka j'aj'i mi dhèu unu Na. Madhutu dad'èi Na, èdhi hud'i mamuri dènge mola-mèci, baku dènge kaj'alu, sèmi dhèu dhu tao j'ara makae. Baku sèmi èèna! 8 Nèti èèna ka, dhèu cee ka dhu madhutu boe lii holo-nori ne, nèngu èèna sèmi boe ji'i, aa tule eele Ama Lamatua kahèi dhu hia le miu Roh Na dhu Mola-Mèci.9 Madhutu ngangee ja'a, suri hari ia ka hia miu j'ara-j'ara pasue a'ari dènge a'ari, lula Ama Lamatua mesa Na ka dhu peka le, na, miu hud'i pasue ku èci dènge èci. 10 Ji'i tadèngi le, miu sue a'ari aa'i-aa'i ètu propensi Makedonia nèi. Te ngaa a'ari aa'i-aa'i! Ji'i manèngi sèna ka miu sue dhèu leo risi eele hari. 11 Tenge j'ara sèna ka miu mamuri dènge mera-milu. Baku soro iisi sa d'ara lii langu dhèu leo, te ngaa èci-èci ka laladhe mamuri na. Miu hud'i sab'a tenge nganga'a-nganginu dènge kacui-aai miu mesa mi. Baku maena dhèu leo. Se'e se ji'i pasanèd'e le miu, karèi nèti uru ka. 12 Ladhe miu mamuri sèmi èèna, miu pabia boe dhèu leo. Ladhe dhèu dhu lèka boe Kristus rèdhi miu mamuri sèmi èèna, tatu ra peka na, “Waa! Dhèu dhu madhutu Lamatua Yesus sèra, mamuri ra mola tare'a, nga!”
Mamai hari Lamatua Yesus
13 A'ari! Limuri ne, ja'a neo peka ngaa èci, sèna ka miu me'a mèu, j'ara-j'ara lula-nèti dhèu madhe. Èdhi te'a, na, dhèu dhu madhe le, bèli-camèd'a, na mamuri hari. De ladhe nèti dhèu unu Lamatua èci madhe, miu baku tao ngi'u mi j'èra nuka sèmi dhèu leo dhu re'a boe j'ara èèna. 14 Te èdhi te'a, na, Yesus dhu madhe le, ka Ama Lamatua pamamuri hari Ne. De ladhe sèmi èèna, tatu Ama Lamatua pamamuri hari kahèi dhèu parcaya dhu madhe sèra, aa oru nare si aa'i-aa'i ra bera-bera dènge Lamatua Yesus.
15-17 De ladhe Lamatua Yesus mai hari, Na puru nèti sorga asa rai-haha ne, èèna na dènge paredha dhu lii mèdhu aae. Ka kètu kapai nèti ana-ana pajuu ètu sorga hia paredha ho tiu tèbhe. Hèia dhèu unu Lamatua dhu madhe sèra, mamuri hari. Ka rèngu dènge èdhi dhu mamuri era, lèke ded'e asa ra'i-liru, ho aa'i-aa'i ti soru mamai Lamatua Yesus. Èle èèna na, èdhi aa'i-aa'i ti mamuri pa'èci dènge Ne taa-taa.b