Paulus pama'ète sèna ka Timotius la'e asa Tesalonika
3
1-2 Sèna ka miu me'a, ca hari ni ji'i kako tèke eele miu èèna, madhutu boe dad'èi ji'i. Ji'i neo ae le dhiu paraga dènge miu, te ngaa bisa mèka. Lula ji'i ngo'o heka mate panèbhu, hèia ji'i pama'ète le ho pua Timotius dhiu. Te ngaa ja'a dènge Silas pea ètu kota Atena. Timotius ne a'ari ji'i. Nèngu ne angalai ji'i ètu d'ara sasab'a-la'a, dhu bera-bera pakako Lii Lolo Be'a Lamatua Yesus. Ji'i pua na dhiu, ho na aj'a miu aa pa'èra d'ara miu, sèna ka miu asa parcaya èra Ama Lamatua.a 3 Dènge j'ara ne'e, ladhe miu paraga dènge sasusa, d'ara miu roe boe. Kèpe pa'èra-èra lalèka miu. Te miu me'a le, dhèu cee dhu parcaya Kristus, tatu na paraga dènge j'aj'èra. 4 Ca hari ni, lod'o ji'i dènge miu era, ji'i pasanèd'e le miu, peka na, dhèu cee dhu parcaya Lamatua Yesus, bèli-camèd'a paraga dènge rupa-rupa sasusa. Limuri ne j'aj'i le, si!5 Lula ja'a susa titu kèna nèti j'aj'èra miu se'e ka, nèti èèna ka ja'a pua Timotius dhiu asa Tesalonika, ho ji'i nge'a mèu kèna, miu parcaya era Lamatua, do aad'o. Te ja'a mage-mage, dhèu aae nidhu dadugu miu, ho miu soro kabodho mi Lamatua. Ladhe j'aj'i ka sèmi èèna, sasab'a ji'i uru sèra, ele iie d'ara!
Timotius lèpa nèti Tesalonika
6 Lai-lai ne, Timotius lèpa hari mai nèti Tesalonika. Ka nèti lii dhu pakarej'e d'ara ji'i. Na lolo, na, miu parcaya Kristus era, aa miu èci pasue dènge èci. Na peka kahèi, na, miu ngee ji'i sèmi mia dhu ji'i sanèd'e miu kahèi.b
7-8 A'ari aa'i-aa'i! Masi ka ètu ne'e ji'i ako rasa bia, lula abhu susa ae nèti mia-mia, te ngaa ropa tadèngi lii lolo Timotius, ka d'ara ji'i tare'a-re'a abhu karej'e. Lula limuri ne ji'i nge'a le miu parcaya Lamatua era.
Paulus sabaj'a hia dhèu sarani ètu Tesalonika
9 De ji'i manèngi makasi ae-ae mi Lamatua dènge d'ara dhu karej'e titu kèna, lula miu madhutu Ne taruu. 10 Mèu-mèda ji'i loe boe sabaj'a sèna ka catèka sa èdhi paraga hari. Ji'i neo aj'a miu sèna ka pamèci d'ara miu ètu j'ara mamuri Lamatua.
11 Ji'i sanao sèna ka Ama Lamatua èdhi, aa Kètu èdhi, Yesus Kristus, bhoke j'ara sèna ka ji'i dhiu paraga hari dènge miu. 12 Ji'i manèngi sèna ka Lamatua hia miu asa pasue risi eele hari. Nuka sèmi èèna kahèi miu dènge dhèu aa'i-aa'i ra asa pasue, sèmi dhu ji'i sue miu. 13 Dènge sèmi èèna Lamatua pa'èra d'ara miu, ho mamuri mola dènge mera-milu, toke bèli-camèd'a Lamatua Yesus lèpa hari mai dènge dhèu unu Na, miu bisa titu kahèi ètu katanga madha Ama Lamatua èdhi, dènge dui heka sasala-sasigo.