Paulus sanèd'e sasab'a na ètu Tesalonika
2
A'ari aa'i-aa'i! Miu aa'i-aa'i mi me'a le lod'o ji'i dhiu sab'a ètu Tesalonika, èi kabhèsu ji'i suti boe iia d'ara. 2 Miu sanèd'e kahèi lod'o ji'i dhiu mèka asa Tesalonika, dhèu nèti kota Pilipi dhu tao le pasusa dènge paj'èra ji'i. Te ngaa lula Lamatua pa'èra d'ara ji'i, ka ji'i bani lole Lii Lolo Be'a Lamatua dènge miu, masi ka dhèu ae dhu pamusu dènge ji'i.a 3 Lod'o èèna, ji'i ngèti Lii Lolo Be'a hia miu asa Tesalonika, ngèti boe lii aj'a-nori dhu koe-kapengo. Te ji'i dhiu tao boe pagoa dènge pakapod'e-kabèli miu.4 Aad'o! Uru èèna ji'i dhiu dènge d'ara mola. Ama Lamatua mesa Na dhu paj'uj'u ji'i, ho ngèti Lii Lolo Be'a Na asa miu. Ji'i se neo boe pakarej'e d'ara dhèu rai-haha, te ngaa pakarej'e d'ara Lamatua, te Nèngu ka dhu patigi nèdhi d'ara ji'i, sèna ka ne'a, mola do koe.
5 Miu me'a kahèi, na, ji'i se hèb'a mènyi boe, ngaa hari tenge leto ca doi sa nèti miu. Ama Lamatua dhu ne'a d'ara ji'i. 6 Sasab'a ji'i ne tenge boe lii koa-kad'iri nèti dhèu rai-haha, do nèti miu, aa nèti dhèu leo kara kahèi. 7 Ji'i se dhèu pajuu-paleha Kristus. Ji'i dènge hak kahèi, tao ngi'u sama sèmi dhèu aae-dhèu kapai, te ngaa ji'i ngo'o boe padedha iisi sèmi èèna. Lod'o sèra, ji'i tao ngi'u ji'i èci èèna ka dènge ana iiki ètu talora aae miu. Ji'i pad'elo sasue mi dedha miu kahèi, nuka sèmi ina dhu pasusu ana na. 8 Ji'i dhiu ho mesa boe dhoka ngèti Lii Lolo Be'a hia miu di, te ngaa ji'i soro iisi kateme aae kahèi, lula ji'i sue miu seli eele.
9 A'ari aa'i-aa'i! Ele boe miu sanèd'e era, ji'i sab'a dhu nge'a boe j'èra mèu-mèda, ho abhu unu mi nganga'a-nganginu. Te ji'i d'èi boe paj'èra miu lod'o ngèti Lii Lolo Be'a asa miu. 10 Miu mèdhi unu mi, sèmi èèna kahèi Ama Lamatua, ropa dhu ji'i bera-bera dènge miu aa'i-aa'i mi dhu parcaya le, ji'i mamuri dènge d'ara mola, dhu tao boe sala ngaa-ngaa. 11 Miu me'a kahèi, ji'i lalau-lalo'o miu, èci èèna ka dènge ama matana ladhe-leru ana-ana na, 12 nuka sèmi: pa'èra d'ara miu aa'i-aa'i mi, pasanèd'e dènge pamako miu sèna ka mamuri dhu mèci, ho pakarej'e d'ara Lamatua. Te Nèngu ka j'aj'i Dhèu Aae, dhu paroa le miu sèna ka j'aj'i ana kabarai Na, aa abhu pakab'ua bera-bera dènge Nèngu.
Lamatua sab'a ètu d'ara miu
13 Ji'i ma'ète boe manèngi makasi mi Ama Lamatua, lula lod'o miu tadèngi lii lolo nèti ji'i, miu sèmi mere boe lii holo-nori nèti dhèu rai-haha, te ngaa Lii Holo-Nori èèna kapua na nèti Ama Lamatua. Nèngu unu Na ka dhu sab'a ètu d'ara miu dhèu parcaya.
14 A'ari aa'i-aa'i! Miu heka madhutu j'ara Lamatua kèna, te ngaa dhèu-dhèu miu pasusa le miu. De miu se abhu j'aj'èra èci èèna ka dènge dhèu parcaya ètu propensi Yudea, dhu dhèu Yahudi rèngu mesa ra paj'èra rèngu lula ra lèka Yesus Kristus.b
15 Abhu dhèu Yahudi dhu pusi-pahae boe dad'èi Ama Lamatua. Nèti èèna ka, ropa Ama Lamatua pua dhèu rèti lii padhai Na mai asa rèngu, ka rèngu paj'èra dènge hake pamadhe si. Ra pamadhe Lamatua Yesus dènge j'ara sèmi èèna kahèi. Limuri ne, ra tenge j'ara ho babèga eele ji'i kahèi. Rèngu pamusu dènge dhèu aa'i-aa'i ra, ka Ama Lamatua d'èi boe rèngu.c 16 Ngaa hari, ra tenge j'ara ae-ae sèna ka ji'i pakako ia ka Lii Lolo Be'a hia dhèu leo. Dhèu Yahudi se ro'o boe ho Lamatua pala-bagi mamuri hia dhèu leo kara kahèi. Dènge j'ara èèna ka, sasala rèngu sèmi tao udhu sa. Hèia Ama Lamatua nasa, ka huku si.
Paulus neo paraga hari dènge dhèu sarani ètu Tesalonika
17 A'ari aa'i-aa'i! Masi ka èdhi pakaj'èu, te ngaa pakaj'èu boe ètu d'ara. Ji'i tenge-tenge j'ara, ho ladhe abhu lod'o dhu taleo, ji'i dhiu hari pa'asu-pareo dènge miu, te d'ara ji'i neo ae le. 18 Ja'a mesa ku neo ae le kahèi dhiu pangad'o dènge miu, te ngaa dhèu aae nidhu loe boe bhabhae ja'a. 19 Miu me'a, nga tao ka ji'i neo dhiu paraga dènge miu, sina ma? Lula ji'i maena miu. Miu ka dhu pakarej'e dènge pa'adhu d'ara ji'i. Ladhe miu aad'o, cee hari ka dhu kèpe pa'èra kolongara Lamatua Yesus! Ladhe Lamatua lèpa hari mai, d'ara ji'i taleo, lula miu se'e ka. 20 Mema tare'a! Miu se'e se ka dhu pakab'ua sasab'a ji'i aa pataleo d'ara ji'i.