2 Miu hud'i maj'èni sabaj'a. Aa miu hud'i mase'a ku dènge j'ara-j'ara dhu miu padhai dènge Ama Lamatua, aa manèngi-mangaj'i dhu pènu dènge d'ara makasi. 3 Baku bhèlu sabaj'a hia ji'i, aa manèngi ho Ama Lamatua bhoke j'ara, sèna ka ji'i bisa lole dènge dhèu, j'ara-j'ara dhu uru èèna pahuni lula-nèti Kristus. Sanèd'e, te ja'a ètu d'ara bui ne, lula ja'a padhue-padhai Kristus mi dhèu. 4 Sabaj'a sèna ka ja'a bisa lole paled'a Lii Lolo Be'a ne, sèna ka dhèu bisa re'a mèu.

5 Mamuri dènge mola ètu talora aae dhèu dhu parcaya mèka Kristus. Pake paie-iie lod'o dhu taleo dhu Ama Lamatua hia miu.^b 6 Ladhe miu padhai lii, padhai dènge lii mako, dhu palèke dènge d'ara dhèu. Mage padhai dhu paroca dhèu. Pake lii-lii dhu lèke, sèna ka miu bisa dhaa hari dènge be'a, ladhe abhu dhèu pakarèi dènge miu.

7 Pe Tikikus dhiu lole dènge miu, j'ara mamuri ja'a. Nèngu ne a'ari pasue èdhi dhu ladhe-leru dhèu-dhèu unu Lamatua dhu ne'a boe roca. Uru èèna, nèngu pakako sasab'a Lamatua sama-sama dènge ja'a kahèi.^c 8 Ja'a pua na dhiu, sèna ka pa'èra d'ara miu, aa lole dènge miu j'ara mamuri ji'i ètu ne'e.^d 9 Ja'a pua Onesimus kahèi lèpa palere dènge ne. Onesimus ne a'ari pasue dhu sab'a ne'a boe roca kahèi. Nèngu ne, dhèu miu. Dua ra, pe lole dènge miu j'ara-j'ara dhu j'aj'i le ètu ne'e.^e

10 Aristarkus hia lii maho'o kahèi hia miu. Ra taha ne ètu d'ara bui sama-sama dènge ja'a. Markus, a'ari nèti Barnabas, hia lii maho'o kahèi. Uru èèna, ja'a moa mema le dènge miu, na, ladhe Markus dhiu pangad'o dènge miu, na, sèmi mere ne dènge be'a.^f 11 Yesus, (dhu èdhi pangare ne, “Yustus”) hia lii maho'o kahèi mi miu. Nèti angalai aa'i-aa'i dhu sama-sama pakako sasab'a Ama Lamatua, dhoka rèngu tèlu ra se'e ka dhu j'aj'i dhèu sarani nèti suku Yahudi. Aa rèngu se'e ka dhu pa'èra d'ara ja'a.

12 Angalai miu Epapras ètu ne'e, aa na hia miu lii maho'o kahèi. Nèngu ne dhèu sab'a hia Yesus Kristus. Nèngu ne ka dhu loe boe sabaj'a hia miu dènge a'èra na, aa na manèngi sèna ka Ama Lamatua pa'èra dènge tao pamèci miu, aa tao miu j'aj'i me'a mèu dad'èi Na.^g 13 Ja'a pasanèd'e mema miu, na, Epapras ne, dhu sab'a bia hia miu dènge dhèu-dhèu Kristen ètu kota Laodikia dènge kota Herapolis.

14 Abhu lii maho'o kahèi nèti Demas dènge dote Lukas dhu èdhi sue.^h

15 Ja'a hia lii maho'o mi a'ari dhèu parcaya ètu kota Laodikia. Baku bhèlu hia lii maho'o ja'a mi mama Nimfa dènge dhèu-dhèu parcaya dhu tema pakaboko ètu d'ara èmu na.

16 Pe, ladhe miu aa'i-aa'i mi ètu kota Kolose baca mere sasuri ne, na, mi pa'adhu hia dhèu-dhèu parcaya ètu kota Laodikia, sèna ka rèngu baca kahèi. Aa miu hud'i baca kahèi sasuri dhu ja'a pa'adhu kèdhi hia rèngu uru sèra.

17 Pasanèd'e Arkipus, peka na, “Èu baku bhèlu pakako toke pa'èle, sasab'a dhu èu sèmi more nèti Lamatua.”ⁱ

18 Baku bhèlu, peka na, ra taha ja'a ètu d'ara bui ne era.

Ja'a manèngi sèna ka Ama Lamatua pad'elo d'ara hua iia Na mi dedha miu.

Sasuri ne, ja'a ènyi ai pake kacui-aai ja'a unu ku.