5 Nèti èèna ka, miu hud'i pèci eele ku dad'èi d'ara dhu neo tao bhabhelu-katub'a. Nuka sèmi: d'ara d'èi tao j'ara karehe dènge dhèu dhu j'aj'i boe dhèu èmu-kamali èu; d'ara d'èi tao j'ara-j'ara kaj'alu; d'ara d'èi dhu neo tao madhutu dad'èi d'ara di; d'ara d'èi tao bhabhelu rupa-rupa, aa manga'a dhu d'èi dhoka aa'i-aa'i j'aj'i unu èu di (madhutu iia-iia na, sèra sa nuka sèmi èu sogo-tagu, lula èu ded'e padedha-dedha j'ara leo dhu seti eele Lamatua). 6 J'ara se'e se ka dhu tao Ama Lamatua nasa titu kèna, toke Na neo huku dhèu aa'i-aa'i dhu ro'o boe nanene Ne. 7 Uru èèna, miu mamuri sèmi èèna ka, lula d'ara miu pa'èki dènge j'ara bhelu sèra.

8 Te ngaa limuri ne, miu hud'i pèci eele ku dad'èi d'ara dhu neo ad'u-ue bhabhelu aa'i-aa'i. Nuka sèmi: d'èi nasa; d'ara pana-mag'oro; tèka d'ara dènge dhèu; padhai lii pa'ele iie kolongara dhèu; dènge padhai lii kaj'alu. 9-10 Aa miu èci dènge èci baku kapod'e-kabèli. Lula miu core eele le dad'èi d'ara dhu neo tao bhelu, aa tèke eele j'ara mamuri dhui sèra.^b

Aa limuri ne, miu gati dènge d'ara dhu hiu. Èèna nuka sèmi dhèu core eele le mèdha-papake dhui dhu kaj'alu, sèna ka silu mèdha hiu dhu mèu. Ama Lamatua ka dhu paj'aj'i miu. Aa limuri ne, Na tao miu asa tadhe pabe'a-be'a Nèngu, aa tao miu j'aj'i ca ropa dènge Ne.^c 11 Ètu d'ara mamuri hiu ne, èdhi hag'e boe, na, rèngu sèra dhèu Yahudi, do dhèu Yahudi boe; dhèu dhu madhutu suna, do dhèu dhu suna boe; dhèu leo rai kara, do dhèu dhu ad'a aad'o;^d dhèu ènu, do ènu boe. Se'e se kolo-karisi na, aad'o! Te ngaa dhu lèke ka, ladhe rèngu pa'èki dènge Kristus, aa Nèngu mamuri ètu d'ara ra.

12 Ama Lamatua hag'e nare le miu, lula Na sue miu. Dad'èi Na sèna ka miu j'aj'i dhèu mola-mèci Na dhu leko-leo nèti dhèu rai-haha leo sèra. Nèti èèna ka, miu hud'i j'aj'i ku dhèu d'ara hua iia, d'ara be'a, pahaha iisi, lii mako, dènge taha mere d'ara. 13 Miu hud'i taha mere d'ara, aa èci tadhe mèu èci. Ladhe nèti miu, abhu dhu tenge lii langu dènge angalai na, na, baku tèka d'ara dènge ne. Te ngaa miu hud'i pabhèlu eele sasala na, aa abho ne, nuka sèmi Lamatua dhu pabhèlu eele le sasala miu.^e 14 Sanèd'e, ee. Te sasue èèna risi aa'i nèti ngaa-ngaa. De miu hud'i pake sasue ne ètu d'ara miu, nuka sèmi mèdha-papake ètu ua. Te sasue èèna, nuka sèmi loa hèngu dhu èdhi manènu, sèna ka j'aj'i sig'i dhu saraga titu kèna. Ne'e ne ka dhu pa'èki èdhi j'aj'i mi èci.

15 Èdhi bisa padame dènge Ama Lamatua, lula Kristus. De miu hud'i soro tèke kahèi dadame Kristus ne, uri d'ara miu. Te Lamatua d'èi ka, miu aa'i-aa'i mi mamuri mera-milu èci dènge èci, lula miu pa'èki j'aj'i ngi'u èci. Aa d'ara miu hud'i me'a manèngi makasi, lula Lamatua unu Na ka hag'e nare miu.

16 Hud'i laa Lii Holo-Nori Kristus uri d'ara miu dènge mamuri miu kahèi. Lii Holo-Nori se'e, nuka sèmi mèdha-panyau dhu kab'ua, dhu Na pangèd'u mi miu. Lii se'e pad'elo j'ara ho miu bisa me'a madha j'ara ae-ae, madhutu ngangee Lamatua. Ka miu bisa pake Lii se'e, sèna ka aj'a-nori, aa pasanèd'e miu èci dènge èci. Ladhe nori dhèu-dhèu miu, mage dènge sakaa, te ngaa pake lii dènge d'ara dhu taleo moro-moro dhu pènu dènge rasa makasi. Pake lii sod'a koa-kio, lii sod'a dhu miu abhu nèti Roh Mola-Mèci Lamatua, aa lii sod'a dhu miu mesa mi suri ho koa-kio Ama Lamatua. 17 Miu j'aj'i le ai g'ana nèti Yesus Kristus. De sanèd'e, te aa'i-aa'i dhu miu padhue-padhai sèra, mèti kolongara Lamatua. Aa aa'i-aa'i dhu miu tao sèra mèti kolongara Lamatua kahèi. De baku bhèlu tao aa'i-aa'i dènge kolongara Kètu miu, Yesus Kristus. Aa manèngi makasi taruu mi Ama Na, Ama Lamatua.^f

18 Bhèni dhu dènge dhèu èmu! Miu hud'i mamuri nanene ku dhèu èmu miu, lula èèna ka dhu lèke mi dhèu-dhèu dhu madhutu Yesus Kristus.^g

19 Mone dhu dènge dhèu èmu! Miu hud'i sue ku dhèu èmu miu, aa baku sakaa dènge ne, ka papèd'a d'ara na.^h

20 Ana-ana aa'i-aa'i! Miu hud'i nanene ina-ama miu, ètu madha j'ara aa'i-aa'i ra, te èèna ka dhu pakarej'e d'ara Ama Lamatua.ⁱ

21 Ina-ama aa'i-aa'i! Miu baku ènyi aa lii taka leli mi ana-ana miu, te aad'o na, ra nasa ka ra parui. Mage-mage d'ara ra ta'u'a dènge miu.^j

22 Dhèu sab'a sèra! Ètu rai-haha ne miu hud'i tao ku madhutu dad'èi lamatua miu ètu d'ara sasab'a aa'i-aa'i ra. Mage dhoka mere d'ara di, lod'o dhu lamatua miu ètu madha miu. Te ngaa tenge la j'ara, ho pakarej'e taruu d'ara ra. Sab'a dènge be'a, lula miu dhu me'a, na, Ama Lamatua dhu ladhe patae miu. 23-24 Miu sad'i sab'a ngaa èèna ka, na, sab'a la mola-mola. Miu hud'i sab'a sasab'a miu dènge d'ara kateme hia lamatua miu ètu rai-haha ne, nuka sèmi miu sab'a hia Kètu èdhi, Yesus Kristus. De miu lalau-lalo'o Ne, te Nèngu ka dhu b'ala rui-j'aj'èra miu, dènge hia miu pusaka. 25 Te ngaa ladhe miu sab'a lèke boe j'ara, bèli-camèd'a Na huku miu. Lula Nèngu èèna dhu bia boe cabèka, aa ladhe boe rèhu dhèu.^k