4 Ja'a peka dènge miu j'ara se aa'i-aa'i, sèna ka mage dhoka dhèu mai kapod'e-kabèli miu dènge hèb'a mènyi. 5 Ja'a mema kaj'èu nèti miu. Masi ka sèmi èèna, te ngaa ja'a bhèlu boe miu, lula d'ara ja'a dhu pa'èki le dènge miu. Aa ja'a karej'e, lula ke'a, na, miu mamuri dhu lèke, aa miu dhu kèpe pa'èra parcaya miu mi Kristus era.

6 Lula uru èèna miu sèmi mere le Yesus Kristus j'aj'i Kètu miu, nèti èèna ka limuri ne, miu hud'i nanene Ne taruu. Aa Nèngu èèna j'aj'i Kètu miu era. 7 Ladhe miu pa'èki taruu dènge Ne sèmi èèna, miu nuka sèmi ana aaj'u dhu asa tabha èra, lula amo la'e asa marèma aae. Aa miu nuka sèmi èmu dhu èra, lula dhu patitu ètu fanderen dhu èra. Miu pa'èra taruu ètu d'ara lalèka miu, sama sèmi a'aj'a dhu miu abhu mèdhi le. Hud'i laa, sèna ka d'ara miu pasoa-pasoka ètu d'ara manèngi makasi, lula j'ara aa'i-aa'i ra dhu Ama Lamatua tao tèke le hia miu.

8 J'aga paie-iie, sèna ka baku madhutu dhèu leo dhu pake d'èlu-mèu dhèu rai-haha, ho ère rèti miu nèti j'ara mola. Aa mage madhutu a'aj'a dhèu rai-haha dhu dènge boe kolo-kapua. Te a'aj'a rèngu sèra dhoka mai nèti d'èlu-mèu dhèu rai-haha di, aa nèti atora-atora rai-haha ne. Te ngaa a'aj'a sèra mai boe nèti Kristus.

9 Aa'i-aa'i dhu ètu d'ara Ama Lamatua, abhu kahèi ètu d'ara Kristus. Aa Kristus kahèi j'aj'i dhèu rai-haha, èci èèna ka dènge èdhi. 10 Lula miu pa'èki le dènge Kristus, aa j'aj'i dhèu unu Na, nèti èèna ka, Na tao pamèci miu. Te Nèngu dedha risi eele nèti koasa aa'i-aa'i dènge aa'i-aa'i dhu rèd'u paredha, masi ka dhu be'a do dhu bhelu.

11 Lod'o suna dhèu Yahudi, ra j'ue eele ka'uri dhu karisi nèti era makae ra, sèna ka j'aj'i tadha, na, rèngu j'aj'i dhèu unu Ama Lamatua. Lod'o miu maso j'aj'i dhèu unu Kristus, miu suna kahèi. Sasoa na sèmi ne'e ka: suna ne, lula boe nèti dhèu j'ue eele ka'uri nèti ngi'u aae ne, te ngaa Kristus j'ue eele j'ara-j'ara bhabhelu-katub'a nèti d'ara èdhi. Nuka j'ara-j'ara bhabhelu dhu èdhi d'èi ad'u-ue, lula èdhi dhèu rai-haha.

12 Lod'o ra sarani miu pake èi, èèna nuka sèmi padhane miu, sama-sama dènge Kristus. Hèia miu abhu mamuri dhu hiu, sèmi Nèngu unu mamuri hiu kahèi. Miu abhu sèmi èèna, lula miu parcaya, peka na, Ama Lamatua pake koasa Na dhu kapai aae èèna, ho pamamuri hari Yesus Kristus nèti mamadhe Na. Lamatua pake kahèi koasa ne'e ho sab'a ètu d'ara miu.^a

13 Uru èèna, miu nuka sèmi dhèu dhu madhe le, lula miu dhu tao sasala rupa-rupa, aa miu dhae j'aj'i mèka dhèu unu Ama Lamatua. Masi ka sèmi èèna, te ngaa Na saku eele aa'i-aa'i sasala-sasigo miu, aa bagi hia miu mamuri hiu, sama sèmi Na pamamuri hari Yesus Kristus.^b 14 Dhu mola-mola ka, èdhi hud'i abhu ku huku, lula èdhi sisu le atora-atora Ama Lamatua. Te ngaa Na saku eele le hahuku se'e ropa ra paku Yesus Kristus ètu aj'u palolo-palèbha.^{c d} 15 Ètu aj'u palolo-palèbha ne, Na segi aa'i le koasa maroga, aa aa'i-aa'i dhu paredha dènge bhabhelu. Ka Na pamakae si ètu madha dhèu ae-ae. Aa'i-aa'i se, nuka sèmi sordad'u dhu segi musu, dhu lèpa kako palème rae dènge lii sod'a, sèna ka pad'elo sasegi ra aa pamakae musu ra.

16 Ladhe abhu dhèu dhu neo pamanahu miu, nèti j'ara-j'ara ta'a-tinu, mage mi pusi-pahae si. Aa ladhe dhèu neo tao lii dènge miu, nèti j'ara-j'ara lod'o be'a, do tao pesta hèru hiu, do atora lod'o ae sasab'a, na, baku pusi-pahae si.^e 17 J'ara sèmi sèra sa, guna boe! Te sèra sa nuka sèmi mamaho di, dhu èèna na ele. Te ngaa Kristus ne ka dhu asli. Nèngu ne ele boe aa taa-taa.

18 Ladhe dhèu neo pamanahu miu, lula miu mo'o boe madhutu atora dhu rèngu tao unu ra, baku nanene si. Te ladhe miu nanene si, miu bisa heka abhu j'ara-j'ara hua iia dhu Ama Lamatua neo hia miu. De mage-mage! Te mema abhu dhèu dhu d'èi tenge j'ara ho pamanahu miu. Dad'èi ra, ladhe miu pahaha iisi miu, aa sogo-tagu ana pajuu Lamatua ètu sorga, lula ra pangee, na, abhu tanila dhu peka sèmi èèna. Rèngu tao iisi ra be'a risi nèti dhèu leo aa'i-aa'i ra. Madhutu iia-iia na, sèmi boe èèna. Te ngangee ra sama sèmi dhèu rai-haha biasa di. 19 Kristus èèna Kètu, te ngaa rèngu ro'o boe pa'èki dènge Ne. Aa dhèu unu Kristus, nuka sèmi ngi'u Na dhu Na ator si. Na tao dhèu unu Na asa tabha èra, pake koasa Ama Lamatua. Dènge j'ara ne'e, rèngu j'aj'i nuka sèmi kalua dènge rui dhu pa'èki pa'èra-èra, sèna ka èci bara èci, toke ngi'u dhu kateme bisa sab'a dènge be'a.^f

20 Miu madhe le sama-sama dènge Kristus. Hèia miu pa'èki heka dènge koasa-koasa maroga ètu rai-haha ne. De nga tao ka miu loe boe madhutu rupa-rupa atora rai-haha? Rèngu peka sèmi ne'e ka: 21 “Mage kèpe ne'e; baku mi'e èèna, mage goi ne'e.” 22 Te ngaa atora sèra, dhoka pa'ue-ai nèti dhèu rai-haha, ho ra aj'a mi dhèu aa'i-aa'i. Madhutu iia-iia na, atora sèra dhodhoka uri j'ara-j'ara dhu èèna na ele iia d'ara di! 23 Ladhe sèmi dhèu bisa tao madhutu atora sèra, ra pangee, na, bèli-camèd'a dhèu pakab'ua si, aa peka na, rèngu se d'èlu-mèu titu kèna; dhèu dhu tao iisi ra sèmi dhèu kèpe pa'èra atora agama; dhèu dhu d'ara mako; dhèu dhu paj'èra ngi'u unu ra, dènge dhèu dhu maj'èni sogo-tagu. Madhutu iia-iia na, aad'o! Atora sèra bisa boe pamèu ngangee dhèu rai-haha, dènge d'ara dhu d'èi ad'u-ue bhabhelu!