2 Ja'a manèngi sèna ka bhèni dhèu dua sèra, nuka Yodia dènge Sinteke, ho loe eele ka nèti patao-palaha. Rèngu hud'i padame ku, ho pabe'a èci dènge èci. Lula Lamatua rèngu èci di, nèti èèna ka pa'èki rèngu èci dènge èci.

3 Angalai, ee! Ja'a manèngi ho èu uri ku ana hèni èdhi bhèni dhèu dua sèra, toke ra pabe'a hari. Te uru èèna, rèngu sab'a rèdhi le, ho soru-bara ja'a ètu peka-padhue dènge dhèu Lii Lolo Be'a Lamatua. Rèngu sab'a rèdhi sèmi èèna kahèi sama-sama dènge Klemens, dènge angalai dhu leo. Ngara rèngu aa'i-aa'i ra suri le ètu d'ara sasuri Lamatua dhu suri ngara-ngara dhèu dhu bèli-camèd'a mamuri sama-sama dènge Ne ètu sorga.

4 Lula miu j'aj'i le dhèu unu Lamatua, nèti èèna ka d'ara miu hud'i karej'e ku mèda-mèu. Ja'a peka hari catèka: pakarej'e taruu d'ara miu!

5 D'ara miu hud'i maho'o kahèi dènge dhèu aa'i-aa'i ra. Aa baku bhèlu, peka na, Lamatua Yesus nèbhu heka mai hari. 6 Ladhe miu paraga dènge j'aj'èra, na, baku d'ara miu roe dènge ngaa èci sa. Te ngaa sabaj'a ho manèngi Ama Lamatua soru-bara miu ètu madha j'ara aa'i-aa'i ra. Aa aa'i-aa'i dhu miu manèngi se, baku bhèlu manèngi makasi mi Lamatua. 7 Ladhe miu tao sèmi èèna, pe Lamatua pamau d'ara miu. Mema dhèu rai-haha ne, re'a mèu mèka d'ara dhu mau, dhu èdhi abhu nèti Lamatua. Te ngaa, lula miu parcaya Yesus Kristus, Lamatua dhu pamau d'ara miu, neo j'aga miu sèna ka d'ara dènge ngangee miu baku kajari.

8 A'ari aa'i-aa'i! J'ara na sèmi ne'e ka: baku ngee dhu rupa-rupa. Te ngaa j'aga ngangee miu, sèna ka ngee j'ara-j'ara dhu pamèci dènge d'ara Lamatua, aa ngee j'ara-j'ara dhu be'a, dhu pakarej'e d'ara dhèu leo. Miu hud'i ngee dhu mola dènge dhu mola-mèci. Ngee j'ara-j'ara dhu lèke, dènge dhu hua iia. Tenge j'ara ho ra pakab'ua dhèu leo kahèi. Tenge j'ara ho pad'elo j'ara-j'ara dhu hua iia. Aa baku loe pangee nèti j'ara dhu be'a se aa'i-aa'i ra. 9 Ja'a aj'a-nori le miu madhutu j'ara mamuri Lamatua. Mamuri miu kahèi hud'i madhutu j'ara mamuri ja'a, aa tao madhutu aa'i-aa'i dhu ja'a padhue-padhai aa dhu tao kèdhi le. Ladhe miu madhutu sèmi èèna, na, Ama Lamatua pa'èra d'ara miu, sèna ka d'ara miu karej'e-karae, aa bisa mamuri dènge mera-milu.

10 Ja'a manèngi makasi dènge koa-kio Ama Lamatua, lula miu bhèlu boe ja'a. Ja'a ke'a, na, uru èèna miu dhu sanèd'e taruu ja'a, te ngaa abhu mèka lod'o ho bara ja'a. 11 Ja'a pangee boe manèngi miu ngaa-ngaa. Te ja'a kura kèdhi mèka ngaa-ngaa èci sa, lula ja'a dhu tema le mamuri dènge ngaa dhu ja'a unu. 12 Ja'a mamuri kèdhi le dènge boe ngaa-ngaa. Ja'a mamuri kèdhi le kahèi dènge katei-kabheca. Ja'a paraga le dènge kabake manganga, dènge kabake bècu. Ètu d'ara ngaa èèna ka, ja'a dhu ke'a kore le rasia na ho bisa taha mamuri. 13 Te ja'a bisa tago kore aa'i j'ara sèra, lula Kristus ka dhu pa'èra ja'a!

14 Masi ka tasa mera mia èèna, ja'a manèngi makasi, lula miu pad'elo le d'ara be'a miu, aa soru-bara ja'a ètu d'ara j'aj'èra. 15 Uru èèna, ropa ja'a kèd'i eele nèti propensi Makedonia, ho laku pakako Lii Lolo Be'a Lamatua asa era leo, dhodhoka miu di nèti kota Pilipi dhu ogo-oru ja'a. Juma'at leo sèra, aad'o. Te ngaa miu dhu me'a le lii lolo èèna. 16 Lod'o dhu ja'a ètu kota Tesalonika èèna, miu pa'adhu doi catèka-dua hari, ho soru-bara ja'a.^a 17 Limuri ne, baku pangee, na, ja'a neo manèngi ngaa-ngaa nèti miu. Te ja'a neo sèna ka Lamatua pala-bagi miu mèngi-nale, lula miu d'ara be'a dènge ja'a. 18 Ja'a sèmi kore le nèti Epaproditus, aa'i-aa'i dhu miu pa'adhu mai bara ja'a. Se'e se j'aj'i mi berkat hia ja'a, toke d'ai sange ne'e, ja'a kura boe ngaa-ngaa. Se'e se j'aj'i nuka sèmi korban tunu dhu hèu mèngi, ho pahaha iisi mi Ama Lamatua. Aa Lamatua sèmi nare korban èèna, lula pakarej'e d'ara Nèngu.^b

19 Ama Lamatua dhu ja'a pahaha iisi èèna, kaja seli eele. Aa ne'a mèu ngaa dhu miu parluu. De Na pad'elo d'ara hua iia Na, aa pala hia miu mèngi-nale dhu risi eele, lula miu dhu pa'èki tèke le dènge Yesus Kristus. 20 De hud'i laa èdhi ded'e padedha-dedha taruu kolongara Ama Lamatua toke d'ai mia-mia la'e. Ne'e ne ka dhu lèke mola-mola!

21 Ja'a pa'adhu lii maho'o ja'a hia dhèu aa'i-aa'i dhu madhutu Yesus Kristus ètu kota Pilipi.

Angalai ja'a ètu se'e se, hia miu lii maho'o kahèi.

22 Dhèu parcaya aa'i-aa'i ètu kota Roma ne, hia lii maho'o kahèi.

Sèmi èèna kahèi dènge a'ari sèra dhu sab'a ètu d'ara èmu dhèu aae kapai ne. Ra pa'adhu lii maho'o hia miu kahèi.

23 Ja'a manèngi sèna ka Kètu èdhi, Yesus Kristus, pad'elo d'ara hua iia Na mi miu aa'i-aa'i mi.