2 Baku pamud'e dènge dhèu kapod'e-kabèli, dhu laka-seti dhèu, peka na, “Miu hud'i suna ku, ho j'aj'i tadha, na, miu se dhèu unu Lamatua.” Madhutu iia-iia na, Lamatua paredha boe sèmi èèna! Rèngu sala le èèna! Te ngaa masi ka sèmi èèna, ra bata-magèla dhèu nuka sèmi busa pakadhi sa. 3 Te rèngu peka, na, Lamatua sèmi nare dhèu lula rèngu suna. Te ngaa èèna sala! Èdhi te'a le, na, Lamatua sèmi nare dhèu lula ra parcaya Yesus. Ka dhèu dhu tare'a-re'a unu Lamatua, nuka èdhi dhu parcaya Yesus! Èdhi dhu pahaha iisi mi Nèngu, madhutu Roh Na dhu Mola-Mèci. Èdhi ka dhu ded'e padedha-dedha Yesus Kristus, lula Na bhoke nare le j'ara, ho èdhi bisa j'aj'i dhèu unu Lamatua. Te èdhi bisa boe abhu mamuri, lula madhutu tatao dhèu rai-haha di.

4 Uru èèna, ja'a pangee dhu èci èèna ka dènge rèngu kahèi, peka na, dhèu bisa j'aj'i dhèu unu Lamatua, sad'i ra suna. Madhutu iia-iia na, sèra sa sasab'a dhèu rai-haha di! Ladhe neo padhue sasab'a dhèu rai-haha, na, ja'a bisa padhai lii padedha iisi risi nèti dhèu aa'i-aa'i, lula uru èèna sasab'a ja'a lèke mola-mola dènge atora agama dhèu Yahudi aa'i-aa'i. 5-6 Madhutu atora agama, ina-ama ja'a suna ja'a, ropa ja'a d'ai aru lod'o. Ja'a ne dhèu Yahudi tare'a-re'a, lula j'aj'aj'i ja'a nèti suku Benyamin, ana-èpu nèti baki Isra'el. Ja'a maj'èni titu kèna, madhutu mola-mola atora aa'i-aa'i nèti partei agama Parisi, toke abhu boe ca dhèu sa dhu bisa pasala ja'a. Risi-risi hari, ja'a d'èi titu kèna, paj'èra dhèu-dhèu dhu madhutu Kristus, lula madhutu a'abhu ja'a, na, dhèu se rai eele le atora agama èdhi.^a

7-8 Te ngaa nèbhu-nèbhu, ka ngangee ja'a kabèli, ropa ja'a madhutu Kristus. De limuri ne, ja'a padedha heka iisi dènge j'ara mamuri dhu uru sèra, lula dènge heka sasoa ngaa-ngaa hia mi mamuri ja'a. Madhutu a'abhu ja'a, na, dhu dedha risi nuka: ja'a tadhe Kristus, Kètu ja'a èèna. J'ara leo aa'i-aa'i ra, nuka sèmi mamumu di. 9 Ja'a neo mamuri pa'èki dènge Yesus Kristus. Te masi ka ja'a madhutu aa'i atora agama Yahudi, tatu mèka Ama Lamatua sèmi nare ja'a. Aa masi ka ja'a pangee, na, ngi'u ja'a mola, tatu boe Lamatua sèmi nare ja'a kahèi. Te ngaa ja'a hud'i parcaya ku Kristus, heka Ama Lamatua sèmi nare ja'a kèna, peka na, “Lula Kristus saku eele le sasala èu, nèti èèna ka èu j'aj'i mola-mèci.”

10 Ka dad'èi ja'a sèmi ne'e: ja'a neo tadhe pamèu-mèu Kristus. Ja'a neo ke'a mèu kahèi koasa Ama Lamatua dhu Na pake ho pamamuri hari Yesus Kristus nèti mamadhe Na. Ladhe sèmi abhu dhèu dhu neo paj'èra ja'a, lula ja'a madhutu Kristus, na, hud'i nèngu sène. Te dhèu paj'èra Kristus kahèi. Aa ladhe abhu dhèu neo pamadhe ja'a, lula ja'a lalau-lalo'o dhèu leo, na, ja'a sèmi kore kahèi. Te Kristus madhe hia ja'a sèmi èèna kahèi. 11 Aa ladhe ja'a madhe, pe Nèngu pamamuri hari ja'a kahèi.

12-13 A'ari aa'i-aa'i! Ja'a neo titu kèna madhutu j'ara mamuri Kristus dènge dad'èi Na aa'i-aa'i. Te ngaa ladhe peka dhu mola-mola, ja'a tao lèke mèka sèmi èèna. Nèti èèna ka, ja'a pa'èra ngi'u, lula Yesus Kristus hag'e nare le ja'a ho madhutu Ne. Ja'a nuka sèmi dhèu dhu rai pa'èra-èra, sèna ka bisa d'ai lane. De ja'a rai mola-mola asa madha, dhu kabib'a boe kabodho, ho ngee j'ara uru sèra. Ja'a pabhèlu eele aa'i si. 14 Te ngaa ja'a rai pamèdhu-mèdhu toke d'ai lane, sèna ka abhu piala. Hadia ja'a èèna nuka: bèli-camèd'a Ama Lamatua sèmi nare ja'a ètu sorga, lula ja'a parcaya Yesus Kristus.

15 De ja'a manèngi ho miu aa'i-aa'i mi dhu mamuri sega dènge amo dhu èra ètu d'ara Kristus, bisa d'ara èci dènge j'ara se aa'i-aa'i ra. Te ngaa ladhe abhu dhu ngee leo, na, hud'i laa Ama Lamatua paj'uj'u j'ara dhu hua iia hia nèngu. 16 Te ngaa masi ka sèmi èèna, èdhi hud'i kèpe pa'èra-èra ku, aa tao palèke j'ara aa'i-aa'i dhu Lamatua aj'a le èdhi.

17 A'ari aa'i-aa'i! Miu hud'i laladhe ku j'ara mamuri ja'a sèna ka tao madhutu. Miu cahag'e ètu sèra, j'ara mamuri èci èèna ka dènge ja'a. Te ngaa miu dhu leo bisa laladhe nèti rèngu, sèna ka tao madhutu sèmi èèna kahèi.^b 18 Baku pamud'e dènge dhèu ae dhu lab'a Kristus aa dhu sèmi boe dènge be'a mamadhe Na ètu aj'u palolo-palèbha. J'ara mamuri unu ra ka dhu peka na, rèngu lab'a Kristus. Ja'a peka kèdhi le miu lula-nèti dhèu dhu ca ropa dènge rèngu, te ngaa limuri ne ja'a pasanèd'e hari miu dènge pahaa èi madha. 19 Te bèli-camèd'a Lamatua tule eele si, hèia pèci si asa d'ara ai naraka, lula d'ara rèngu dhu pa'èki boe dènge Ne. Rèngu mamuri dhoka ètu d'ara bhabhelu-katub'a di, aa tenge j'ara sèna ka pakasee d'ara iisi unu ra, toke ra padedha iisi dènge bhabhelu rèngu sèra. Dhèu sèra dhu re'a heka makae. Ngangee rèngu nuka sèmi dhèu dhu tadhe boe Lamatua.

20 Miu baku madhutu si, te ngaa madhutu la ji'i. Lula èdhi j'aj'i dhèu unu Lamatua, dhu dènge hak j'aj'i ana-ana kabarai sorga. Limuri ne èdhi tatae Kètu èdhi, Yesus Kristus. Te bèli-camèd'a Na lèpa hari mai nèti sorga, ho pakaj'èu èdhi nèti nanasa Ama Lamatua. 21 Èèna na, Kristus ub'a ngi'u èdhi dhu roe dhu bisa madhe ne, j'aj'i mi ngi'u hiu dhu madhe boe nuka sèmi ngi'u Na dhu èra aae èèna. Na ub'a ngi'u aae èdhi ne, pake koasa Na dhu kapai seli eele èèna. Aa Na pake kahèi koasa èèna, sèna ka tao aa'i-aa'i dhu ètu mia-mia, ho madhutu paredha Na.