Dhèu unu Lamatua Yesus hud'i mamuri d'ara èci nuka sèmi rèngu j'aj'i ngi'u Na
4
Ja'a pakako le sasab'a Lamatua ja'a, toke ja'a j'aj'i ana bèdho. De limuri ne ja'a pamako miu, sèna ka mamuri mola madhutu dad'èi Ama Lamatua, lula Na paroa nare le miu, sèna ka j'aj'i dhèu unu Na. 2 Nèti èèna ka, miu hud'i mamuri dènge pahaha iisi, aa pamaho'o èci dènge èci. Miu hud'i taha mere d'ara, aa tadhe mèu èci dènge èci, ho mamuri pasue dhu tare'a. Ladhe nèti miu, abhu dhu tenge lii langu dènge angalai na, baku tèka d'ara dènge ne kahèi.a 3 Tenge j'ara ho muri dame èci dènge èci, lula Roh Ama Lamatua dhu èki le miu j'aj'i mi èci. 4 Te dhèu unu Yesus Kristus dhu j'aj'i le èci, nuka sèmi ngi'u Kristus unu Na. Aa rèngu aa'i-aa'i ra sèmi rare le Roh Lamatua dhu dhoka èci èèna di. Aa rèngu aa'i-aa'i ra sanao-maena dhoka mi Ama Lamatua di, lula Nèngu ka dhu paroa nare si ho j'aj'i dhèu unu Na.5 Lamatua èdhi, dhoka èci di;
Parcaya èdhi, dhoka ca j'ara di,
sèna ka bisa padame dènge Ne.
Aa èdhi aa'i-aa'i ti abhu sarani,
sèna ka pa'èki dènge Ne.
6 Ama Lamatua, dhoka èci di,
Aa Ama èdhi, dhoka Nèngu di.
Dhoka Nèngu di dhu paredha èdhi aa'i-aa'i ti.
Dhoka Nèngu di dhu bera-bera dènge èdhi.
Aa Nèngu mesa Na di dhu mamuri ètu d'ara èdhi.
Kristus hia rupa-rupa sasab'a-la'a, sèna ka dhèu unu na asa èra
7 Te ngaa Yesus Kristus pala-bagi le koasa Na mi èdhi, sèna ka èdhi èci-èci ka pakako sasab'a Na. 8 Nèti èèna ka Sasuri Ama Lamatua, peka na,
“Nèngu ca'e la'e asa era dedha,
sèna ka Na pamusu ètu èèna toke segi.
Hèia ère nèti dhèu ae-ae dhu lèke taha,
aa papala hadia mi dhèu rai-haha.”b
9 (Sanèd'e lii-lii dhu peka na, “Nèngu ca'e la'e”. Ladhe Na ca'e la'e, sasoa na, uru èèna Na puru nèdhi le asa rai-haha ne. 10 De Dhèu dhu puru mai èèna, nuka Kristus. Te Nèngu ca'e hari asa sorga, sèna ka bisa uri aa'i dhu ètu dedha-liru dènge ètu rai-haha.) 11 Kristus dhu pangèd'u koasa mi dhèu unu Na, sèna ka ra pakako sasab'a-la'a dhu Na pala-bagi hia rèngu. Abhu cahag'e dhu Na hia si koasa ho j'aj'i dhèu pajuu-paleha Na; cahag'e j'aj'i dhèu rèti lii padhai Na; cahag'e j'aj'i sèmi ca dhèu ama sa,c ho lalau-lalo'o dhèu unu Kristus; cahag'e j'aj'i dhèu d'èlu-mèu ho aj'a dhèu unu Na; aa cahag'e hari j'aj'i dhèu dhu tema rèti Lii Lolo Be'a asa era-era dhu hiu. 12 Ca dhèu-dhèu ka sèmi rare sasab'a ra, sèna ka pa'èra dhèu-dhèu parcaya ho aa'i-aa'i ra bisa pakako sasab'a Lamatua. Dènge j'ara ne'e, èdhi aa'i-aa'i ti dhu parcaya Yesus Kristus asa tabha èra, 13-14 toke èdhi aa'i-aa'i ti parcaya d'ara èci. Aa èdhi aa'i-aa'i ti tadhe tare'a-re'a Ana Ama Lamatua. Èdhi sèmi heka ana iiki, lula èdhi madhutu mola-mola le j'ara Nèngu, aa j'aj'i le dhèu dhu mamuri madhutu dad'èi Na. Ladhe èdhi mamuri ka sèmi èèna, èdhi sèmi heka koha dhu dènge boe uli, ka madhutu dhoka rii di. Te ladhe dhèu kapod'e-kabèli mai aj'a pagoa èdhi, ra tao rare boe. 15 Te ngaa èdhi dènge lii mako lole dhoka ngaa dhu lèke hia mi a'ari èdhi sèra, lula èdhi sue rèngu. Aa ladhe èdhi mamuri sèmi èèna ètu d'ara ngaa èèna ka, èdhi j'aj'i ca ropa dènge Kristus. Te Nèngu ne Kètu èdhi dhu uri èdhi. 16 Aa èdhi j'aj'i nuka sèmi ngi'u Na. Sama sèmi ngi'u dhèu èci, dhu dènge musi madha, hèb'a, kacui-aai, aa haga, ladhe sab'a sama-sama madhutu sasab'a ra èci-èci, na, ngi'u na asa tabha èra. Sèmi èèna kahèi dènge dhèu unu Yesus Kristus sèra. Ladhe èdhi pasue aa soru-bara èci dènge èci, tatu èdhi aa'i-aa'i ti asa tabha èra kahèi.d
Tèke eele j'ara mamuri dhui, sèna ka madhutu mamuri hiu
17 Nanene paie-iie, ngaa dhu ja'a neo peka, lula Kètu ja'a, Yesus Kristus ka dhu nori ja'a. Miu mamuri ia ka sèmi dhèu dhu tadhe boe Ama Lamatua. Lula ngaa dhu ra tao sèra madhutu dhoka gagoa ra. 18 Rèngu raga leli, nuka sèmi dhèu kako ètu d'ara maroga. Ra mamuri pacèri nèti Ama Lamatua, lula ra kètu hadhu, aa pusi-pahae boe Ne. 19 Rèngu re'a heka makae. Nèti èèna ka, ra madhutu dhoka dad'èi d'ara ho ad'u-ue j'ara makae dènge mamuri kaj'alu. Te ngaa re'a boe roca kahèi.
20 Te ngaa dhèu aj'a-nori boe miu j'ara mamuri Kristus sèmi èèna! 21 Te, ngaa dhu miu me'a le lula-nèti Yesus Kristus, a'aj'a èèna ka dhu mola. Tatu miu tadèngi le! 22 De tèke eele j'ara mamuri miu dhu dhui èèna! Te ladhe miu mamuri kaj'alu madhutu dad'èi dhèu rai-haha, na, miu dhu lèke le tipu. Miu dènge heka hak mamuri sèmi uru èèna.e 23 Te ngaa hud'i laa Ama Lamatua tao d'ara dènge ngangee miu j'aj'i hiu, 24 ho miu j'aj'i dhèu hiu, madhutu ropa Na. Nèti èèna ka, miu hud'i pad'elo ku d'ara hiu miu, dhu mola-mèci dènge mera-milu.f
25 De limuri ne, loe eele ka nèti kapod'e-kabèli! Padhai lii èci dènge èci dhu mola, te èdhi dhu pa'èki le j'aj'i mi èci, nuka sèmi ngi'u èci dhu dènge musi madha, hèb'a, kacui-aai, aa dènge haga.g 26 Ladhe nasa, baku ad'u sasala kahèi. Hua iia miu pabe'a hari! Baku tèke nanasa toke lod'o cèna!h 27 Dènge j'ara ne, dhèu aae nidhu bisa boe dadugu-rariu miu. Baku golo ne! 28 Dhèu dhu d'èi mana'u, ae eele ka! Be'a risi dhèu sèmi sèra sab'a pake kacui-aai unu ra, sèna ka rui-j'aj'èra na soru-bara dhèu dhu unu aad'o sèra. 29 Ladhe padhai lii, na, baku hia lii karehe, masi ka ca hèb'a doko-doko di! Hua iia risi padhai lii dhu be'a di. Aa holo dhèu sèna ka ra soru-bara dènge be'a, aa pa'èra d'ara si. 30 Baku papèd'a d'ara Roh Ama Lamatua, te Nèngu pea ètu d'ara miu. Aa Na cap nare miu, peka na, miu j'aj'i le dhèu unu Ama Lamatua. Roh Na j'aj'i mi tadha, peka na, toke d'ai èle rai-haha ne, Ama Lamatua sui nare miu, sèna ka mamuri taruu dènge Ne. 31 De baku tèka d'ara dènge dhèu leo! Bqku kadhi ngutu dènge dhèu! Baku panasa! Baku patao-palaha! Baku padhai kakoli pa'ele iie kolongara dhèu! Aa baku ad'u-ue j'ara bhabhelu dhu leo-leo hèi! 32 Te ngaa be'a risi mi pasue, aa tao j'ara dhu be'a èci dènge èci. Miu hud'i pabhèlu eele ku sasala dhèu, aa hia si abho, sama sèmi Ama Lamatua saku eele sasala miu, lula miu pa'èki le dènge Kristus.i