Paulus nèti Lii Lolo Be'a asa dhèu Yahudi boe
3
Lula Ama Lamatua hag'e boe dhèu Yahudi dènge dhèu Yahudi boe, nèti èèna ka Na pua ja'a, Paulus, ho lole Lii Lolo Be'a Yesus Kristus dènge miu dhèu Yahudi boe ètu d'ara kota Epesus. Ja'a pakako le sasab'a ja'a, toke ja'a j'aj'i ana bèdho. 2 Tatu miu me'a kahèi, na, Ama Lamatua pua-paleha ja'a mai, lula Na neo pad'elo d'ara hua iia Na mi miu. 3 Uru èèna, mema Ama Lamatua dhae peka mèka dènge dhèu rai-haha ne, lula-nèti ngaa dhu Na pama'ète hia mi dhèu dhu Yahudi boe. Te ngaa limuri ne, Nèngu peka le dènge ja'a, j'ara ne aa'i-aa'i ra. Aa ne'e ne, ja'a dhu suri pabab'a-bab'a le ètu sasuri ne hia miu. 4 Ladhe miu baca mere, tatu miu bisa me'a kahèi dad'èi Ama Lamatua mi Yesus Kristus, dhu Na bhoke hia ja'a. 5 Te uru èèna, dhèu rai-haha re'a mèka dad'èi Na. Te ngaa limuri ne, Na pake le Roh Na, sèna ka peka dad'èi Na mi dhèu rèti lii padhai Na, dènge dhèu pajuu-paleha Na. 6 Te karèi nèti uru ka, Ama Lamatua pama'ète le sèmi ne'e: ladhe dhèu Yahudi boe parcaya Lii Lolo Be'a Yesus Kristus, rèngu bisa j'aj'i kahèi ana-ana Ama Lamatua, sama sèmi dhèu Yahudi sèra. Nèti èèna ka, limuri ne èdhi aa'i-aa'i ti pa'a'ari le, aa èdhi sama-sama bisa abhu mèngi-nale nèti Ama èdhi, Ama Lamatua.7 Ama Lamatua pad'elo d'ara hua iia Na, ka hag'e nare ja'a j'aj'i dhèu pajuu-paleha Na. Aa Na pangèd'u koasa Na mi ja'a kahèi, sèna ka pakako sasab'a Na. 8 Nèti dhèu unu Lamatua aa'i-aa'i, ja'a ne haha d'ai seli. Masi ka sèmi èèna, te ngaa Lamatua hag'e nare ja'a, ho pakako sasab'a Na dhu kapai risi eele èèna. Dad'èi Na sèna ka ja'a lole dènge dhèu Yahudi boe, lula-nèti d'ara hua iia Yesus Kristus dhu dènge boe too-lane. 9 Te karèi nèti Ama Lamatua paj'aj'i rai-haha ne, dad'èi Na neo hia Kristus mai èèna, dhu pahuni era. Te ngaa limuri ne, Nèngu neo, sèna ka ja'a lole dènge dhèu aa'i-aa'i, ho ra re'a mèu dad'èi Na èèna. 10 Te dad'èi Na èèna, d'èlu-mèu risi eele. Hèia Nèngu neo pake dhèu unu Na, ho pad'elo mamèu Na mi koasa-koasa dhu leo, aa mi aa'i-aa'i dhu rèd'u paredha ètu dedha-liru. 11 Lod'o dhu Na paj'aj'i mèka rai-haha ne, Nèngu pama'ète nare le neo bhoke j'ara ho patabuli eele dhèu rai-haha nèti koasa sasala-sasigo ra. Nèti èèna ka, Na pake Kètu èdhi, Yesus Kristus, sèna ka tao madhutu sèmi èèna. 12 Nèti èèna ka, èdhi dhu parcaya Yesus Kristus, parluu heka madha'u padhai lii dènge Ama Lamatua. Te Nèngu dhu pakabhèle mema ai Na, sèna ka sèmi nare èdhi lod'o mia èèna ka.
13 Sanèd'e, ee! Ja'a j'èra lula lalau-lalo'o miu dhèu Yahudi boe. Masi ka sèmi èèna, te ngaa d'ara miu mage èra boe kahèi. Ja'a pasae kore j'aj'èra ne, lula neo pa'èra miu ho sèmi mere babe'a na.
Paulus sabaj'a manèngi makasi mi Ama Lamatua
14 Lod'o dhu ja'a ngee kèdhi d'ara hua iia Ama Lamatua dhu risi eele èèna, hèia ja'a patitu kètu urutuu ho manèngi makasi. 15 Te a'ari aa'i-aa'i ètu rai-haha dènge ètu sorga unu dhoka Ama èci di, nuka Ama Lamatua.
16 Ja'a sabaj'a sèna ka Na hia mèngi-nale ae-ae mi dedha miu, madhutu dad'èi d'ara Na dhu hua iia risi èèna.
Aa ja'a manèngi kahèi ho Na hia Roh Na, dènge koasa Na, sèna ka pa'èra d'ara miu.
17 Ja'a manèngi ho Yesus Kristus pea ètu d'ara miu, lula miu parcaya Ne taruu.
Aa ja'a sabaj'a kahèi sèna ka miu mamuri pa'èki dènge sasue Na, nuka sèmi ana aaj'u asa èra, lula amo na maso marèma asa d'ara rai.a
18-19 Ja'a sabaj'a kahèi ho miu dènge dhèu unu Lamatua aa'i-aa'i bisa me'a mèu sasue Kristus dhu dhèu rai-haha ne d'èu rare boe. Te sasue ne, kapai titu kèna, taleo titu kèna, marèma titu kèna, aa ae titu kèna!
Ja'a sabaj'a kahèi sèna ka miu rasa sasue Na, toke sasue ne maso papènu d'ara dènge mamuri miu.b
20 Koasa Ama Lamatua kapai titu kèna, risi aa'i nèti dhu èdhi manèngi dènge dhu èdhi bisa ngee. Aa Na pake koasa Na dhu kapai aae èèna, ho sab'a ètu d'ara èdhi. 21 Nèti èèna ka, èdhi dhu pa'èki le dènge Kristus, ti ded'e Ne padedha-dedha! Koa-kio Ne taruu, mulai nèti doe ne'e, toke d'ai mia-mia la'e. Ne'e ka dhu lèke!