Dhèu dhu parcaya Yesus Kristus abhu mamuri hiu
2
Uru èèna, miu sisu paredha Ama Lamatua, aa ad'u-ue rupa-rupa sasala. Nèti èèna ka Lamatua peka na, miu nuka sèmi dhèu dhu madhe le. 2 Uru èèna, mamuri miu madhutu dad'èi rai-haha ne, dènge dad'èi dhèu aae nidhu. Toke d'ai sange ne'e, nidhu loe boe dadugu-rariu dhèu rai-haha, sèna ka palab'a dènge Ama Lamatua. 3 Uru èèna, èdhi mamuri sèmi èèna kahèi, ka ngaa dhu èdhi rasa do, pangee do, èdhi tao madhutu dad'èi d'ara di. Te èdhi dhèu bhelu, èci èèna ka dènge dhèu rai-haha aa'i-aa'i. Nèti èèna ka Ama Lamatua nasa titu kèna dènge èdhi, 4-5 aa pangee na, èdhi nuka sèmi dhèu madhe kahèi dhu cèri eele nèti Nèngu. Masi ka sèmi èèna, te ngaa d'ara Na la'e boe lula Na sue èdhi titu kèna. Nèti èèna ka, Na pad'elo d'ara hua iia Na, aa pua Yesus Kristus mai sèna ka pala-bagi mamuri hiu hia èdhi. De Lamatua ka dhu hia mamuri mi èdhi lula d'ara hua iia Na.a 6 Yesus Kristus madhe, te ngaa Ama Lamatua pamamuri hari Ne. Hèia Lamatua ded'e Ne ho nèd'u paredha ètu sorga. Lamatua tao sèmi èèna kahèi mi dedha èdhi, Na pala-bagi mamuri hiu mi èdhi, hèia Na ded'e èdhi, ka tèd'u paredha sama-sama dènge Kristus ètu sorga. 7 Nèti èèna ka, mulai nèti doe ne'e, d'ai mia-mia la'e, Ama Lamatua pad'elo d'ara sasue Na ae-ae, dènge d'ara hua iia Na dhu risi aa'i èèna, lula èdhi parcaya Yesus Kristus. 8-9 Ropa miu parcaya Kristus, Ama Lamatua hia miu mamuri, lula d'ara hua iia Na. Na hia mamuri sèmi èèna, baku pangee, na, Nèngu b'ala ngaa dhu miu tao. Lula mamuri èèna j'aj'i hadia dhu Na hia iia d'ara mi miu. Nèti èèna ka, miu baku padedha iisi nèti ngaa dhu miu tao.b 10 Èdhi mamuri, lula Ama Lamatua ka dhu paj'aj'i èdhi. Hèia Yesus Kristus hia èdhi mamuri hiu, sèna ka èdhi tao j'ara-j'ara dhu be'a, dhu Lamatua pama'ète nare le karèi nèti uru ka.Ama Lamatua sèmi nare dhèu nèti suku aa'i-aa'i
11 A'ari aa'i-aa'i! Miu me'a le, na, dhèu Yahudi kèpe pa'èra-èra atora suna rèngu, aa ra pusi-pahae boe miu dhèu Yahudi boe, lula mo'o boe madhutu atora èèna! Madhutu iia-iia na, atora suna ne dhoka nèti ngi'u aae di, nèti boe d'ara dhèu. 12 Lod'o miu dhae parcaya mèka Yesus Kristus, miu dènge mèka hak ho j'aj'i dhèu unu Ama Lamatua. Te uru èèna, miu dhae maso mèka asa d'ara lii pajaji Ama Lamatua dhu Na pa'èki tèke mi Abraham, aa dènge ana-èpu na. Lod'o èèna, miu mamuri ètu rai-haha, te ngaa bisa boe maena mi Ama Lamatua, lula miu j'aj'i dhèu leo rai kara era, 13 dhu cèri nèti Lamatua. Te ngaa limuri ne, Yesus Kristus bhoke nare le j'ara, sèna ka miu bisa pa'èki dènge Ama Lamatua. Te Kristus madhe sèna ka cuhi d'ara Lamatua, ho miu bisa padame dènge Ne, aa bisa j'aj'i dhèu unu Na.
14 Uru èèna, ji'i dhèu Yahudi ngo'o boe mamuri dame dènge miu dhèu leo rai kara. Nuka sèmi kadidhi dhu hag'e eele èdhi. Te ngaa lula mamadhe Yesus ètu aj'u palolo-palèbha, ka Na paguri eele le kadidhi èèna, sèna ka èdhi dhu uru èèna pamusu, bisa padame hari ho j'aj'i mi ca suku. 15 Te uru èèna, dhèu Yahudi tenge j'ara ho pake atora agama rèngu sèna ka pabe'a dènge Ama Lamatua. Te ngaa ropa Yesus Kristus madhe, Na pa'ele iie le j'ara dhui, aa bhoke j'ara hiu, sèna ka dhèu Yahudi dènge dhèu leo kara, dua-dua ra bisa mamuri pabe'a dènge Ama Lamatua. Dènge sèmi èèna, rèngu aa'i-aa'i ra pa'èki j'aj'i mi ca suku dhu hiu, dhu mamuri mera-milu.c 16 De Kristus madhe ètu aj'u palolo-palèbha sèna ka tao dua suku sèra j'aj'i mi èci, aa nèti hari si asa Ama Lamatua. Te Kristus palaho eele aa'i le ngaa dhu uru èèna tao rèngu ho pamusu.d 17 Nèngu mai asa rai-haha ne, nèti Lii Lolo Be'a hia dhèu Yahudi dènge dhèu leo kara sèra, dhu lole na, “Uru èèna miu mamuri pamusu, te ngaa limuri ne abhu le j'ara sèna ka miu bisa mamuri padame èci dènge èci.”e 18 De ji'i dhèu Yahudi dènge miu dhèu Yahudi boe, aa'i-aa'i ti abhu j'ara ho lati asa Ama Lamatua èdhi, lula Yesus bhoke le j'ara hia èdhi aa'i-aa'i ti. Aa Roh Ama Lamatua dhu Mola-Mèci pad'elo j'ara mi èdhi aa'i-aa'i ti kahèi.
Dhèu unu Yesus Kristus nuka sèmi èmu sabaj'a
19 Lula pa'ue-ai Yesus Kristus, nèti èèna ka miu dhèu Yahudi boe j'aj'i heka dhèu leo rai kara dhu dènge boe hak ngaa-ngaa. Te limuri ne, miu unu le hak ho j'aj'i ana kabarai sorga, lula Ama Lamatua ded'e le miu j'aj'i ana-èpu Na. 20 Ne'e ne, nuka sèmi Ama Lamatua neo patitu èmu cue. Na patitu hadhu dhu padhèdi uru, nuka Yesus Kristus. Hèia Na tao fanderen, nuka dhèu rèti lii padhai Na dènge dhèu pajuu-paleha Na. Ka Na padhèdi hadhu se pagod'o-god'o ètu dedha sèra aa'i-aa'i. Hadhu se, nuka èdhi aa'i-aa'i ti dhu j'aj'i le ana-èpu Na. 21 Èmu ne titu èra bia, lula hadhu se dhu pagod'o si dènge be'a ètu dedha hadhu dhu padhèdi uru sèra. Aa èmu èèna nèbhu-nèbhu asa kapai, ka dhèu lasi asa d'ara èmu èèna, sèna ka manèngi-mangaj'i mi Ama Lamatua. 22 De limuri ne, Ama Lamatua tao sèna ka miu dhèu Yahudi boe kahèi j'aj'i nuka sèmi hadhu, sama-sama dènge ji'i dhèu Yahudi. Ama Lamatua padhèdi pagod'o-god'o èdhi aa'i-aa'i ti, ho j'aj'i era pea Roh Na.