Èci soru-bara èci
6
A'ari aa'i-aa'i! Ladhe abhu dhèu parcaya ca dhèu dhu tao sala, na, miu dhu me'a tare'a-re'a dad'èi Roh Lamatua, lami padhai lii mako-mako dènge ne dènge d'ara mola. Hèia mèti hari ne, sèna ka madhutu j'ara dhu lèke nèti Lamatua. Te ngaa j'aga ngi'u mi, sèna ka baku manahu asa sasala na èèna. 2 Ladhe dhèu paraga dènge sasusa, na, miu dhu leo lami soru-bara ne. Te dènge sèmi èèna, miu tao le madhutu atora nèti Kristus. 3 Ladhe abhu dhèu padedha iisi, peka na, nèngu risi nèti dhèu leo, aa te ngaa aad'o sèmi èèna, na, nèngu tipu ngi'u nèngu unu na. 4 De ca dhèu-dhèu ka hud'i parisa ku ngaa dhu nèngu ad'u-ue. Ladhe ngaa dhu nèngu tao ne be'a le, pe ne'a unu na. Mage pasèku dènge tatao dhèu leo. 5 Ja'a peka sèmi èèna, lula ca dhèu-dhèu ka dhu tago nare unu na, ngaa dhu nèngu tao. 6 Te ngaa dhèu dhu sèmi nare le lii holo-nori Lamatua, nèngu hud'i pabagi ku rui-j'aj'èra na, ho soru-bara dhèu dhu aj'a-nori nèngu.7 Sanèd'e, ee! Ama Lamatua ne'a aa'i mèu-mèu. De baku tipu ngi'u miu unu mi, aa baku neo tipu Lamatua. Lula, ngaa dhu dhèu sèle ètu d'ara oka-tedhe, pe nèngu abhu hari hua-hela na. 8 Sèmi èèna kahèi, ladhe dhèu ad'u-ue j'ara bhelu-katub'a madhutu dad'èi na, pe na dui nare hari mamuri dhu ele iie. Te ngaa ladhe dhèu tao j'ara be'a madhutu dad'èi Roh Mola-Mèci, pe nèngu abhu hari mamuri dhu lèke toke d'ai mia-mia. 9 Nèti èèna ka, miu baku roca tao j'ara dhu be'a. Te ropa d'ai lod'o na, èdhi abhu hari j'ara dhu be'a, sad'i èdhi taha taruu. 10 De ropa èdhi abhu lod'o dhu taleo, na, èdhi tao mema ka j'ara-j'ara dhu be'a hia mi dhèu aa'i-aa'i ra, risi-risi mi a'ari èdhi dhèu parcaya sèra.
Paulus pa'èle sasuri na
11 Sasuri ne'e, ja'a ka suri unu ku, pake huruf dhu kapai aae hua. 12 Sanèd'e, ee! Dhèu kapod'e-kabèli sèra lèka kahèi mi Yesus Kristus dhu madhe ètu aj'u palolo-palèbha. Te ngaa rèngu laka-seti miu ho suna, lula ra madha'u dènge dhèu Yahudi leo, rèngu mage dhèu se paj'èra si, ladhe rèngu aj'a, peka na, Ama Lamatua sèmi nare kahèi dhèu dhu madhutu boe atora suna. Nèti èèna ka, rèngu se d'èi solo-mako dhèu Yahudi sèra. 13 Masi ka rèngu dhu suna le, te ngaa rèngu unu ra madhutu aa'i boe atora agama sèra. Rèngu d'èi ho miu madhutu suna, sèna ka j'aj'i dhèu rèngu. Dènge j'ara ne'e, partei ra ded'e padedha-dedha rèngu.
14 Te ngaa ja'a ne d'èi dhoka ded'e padedha-dedha Kètu èdhi, Yesus Kristus. Nèngu madhe ètu aj'u palolo-palèbha, sèna ka pamadhe aa'i bhabhelu-katub'a dhu dhèu ad'u-ue madhutu dad'èi rai-haha ne. Nèti èèna ka, ja'a pusi-pahae heka dènge dad'èi rai-haha. Aa dad'èi rai-haha ne èki heka ja'a. 15 Suna, do aad'o, ngaa-ngaa tao boe. Te ngaa dhu karisi, nuka èdhi abhu mamuri hiu nèti Lamatua. 16 Ja'a manèngi sèna ka Ama Lamatua pad'elo sasue Na mi dhèu aa'i-aa'i dhu madhutu a'aj'a ja'a ne, ho rèngu mamuri padame, aa pad'elo rasa kasia èci dènge èci. Te rèngu j'aj'i le suku dhu hiu nèti Ama Lamatua.
17 Ja'a peka mola-mola kèna, na, ja'a d'èi sèna ka dhèu sèku ia ka ja'a dènge lii langu suna ne. Te ètu ngi'u ja'a ne dènge tadha nu'a era, lula ja'a sab'a hia Yesus Kristus.
18 A'ari aa'i-aa'i! Ja'a manèngi sèna ka Kètu èdhi, Yesus Kristus, pad'elo d'ara hua iia Na asa miu aa'i-aa'i mi.
D'ai sange ne'e ka.
Lii maho'o nèti ja'a,
Paulus