2 De nanene, ee! Ja'a ne, Paulus, ka dhu peka lii ne'e. Ladhe miu suna ho madhutu atora agama dhèu Yahudi, na, mamadhe Kristus dhu hia miu bebas èèna, gaguna na aad'o! 3 Ladhe dhèu suna ho madhutu atora agama sèmi èèna, nèngu hud'i pasae hari ku atora sèra aa'i-aa'i ra. Miu sanèd'e era, do aad'o? Te uru èèna, ja'a dhu peka mema le. 4 Dhèu dhu neo pake atora, sèna ka Ama Lamatua sèmi nare ne j'aj'i mi dhèu mola, nèngu tao iisi na pakaj'èu nèti Kristus. Te dènge j'ara ne'e, nèngu core eele d'ara hua iia Ama Lamatua. 5 Te ngaa Roh Lamatua dhu Mola-Mèci ka dhu bhoke j'ara hia èdhi, ho èdhi parcaya Yesus Kristus. Nèti èèna ka èdhi sanao, bèli-camèd'a Ama Lamatua pama'ète, na, èdhi dhèu mola. 6 Masi ka dhèu suna, do aad'o, ngaa-ngaa tao boe. Te ngaa dhu hua iia risi, nuka dhèu dhu parcaya Kristus aa sue dhèu leo.

7 Uru èèna, miu mamuri le madhutu j'ara dhu lèke. Te ngaa limuri ne, dhèu cee ka dhu kapod'e-kabèli miu, ka miu madhutu heka j'ara èèna? 8 Te a'aj'a-nanori kapod'e-kabèli dhu miu nanene èèna, mai boe nèti Ama Lamatua. Madhutu iia-iia na, Nèngu ka dhu paroa nare miu ho j'aj'i dhèu unu Na. 9 Ngaa dhu ra aj'a, hiu-hiu èèna dhoka ca hèb'a-dua hèb'a di. Te ngaa nèbhu-nèbhu, lii a'aj'a ne tao ngangee miu ele iie. Nuka sèmi ragi ciki dhu dhèu pakihu dènge tarigu ho neo tao roti. Nèbhu-nèbhu hèia ragi ne'e ka paca'e tarigu dhu pakihu èèna.^a 10 Lula èdhi j'aj'i le èci dènge Kètu èdhi, Yesus Kristus, nèti èèna ka ja'a ke'a mèu, Nèngu èèna hia miu parcaya hari mi ngaa dhu ja'a nori le sèra. Aa Ama Lamatua mesa Na, pe huku dhèu cee dhu pa'ele iie lalèka miu.

11 Sèmi ne'e a'ari! Ladhe ja'a aj'a, peka na, dhèu hud'i suna ku, tatu ja'a abhu boe j'aj'èra sèmi ne'e ne. Aa dhèu Yahudi tule eele boe a'aj'a ja'a lula-nèti mamadhe Yesus ètu aj'u palolo-palèbha. 12 Te ngaa dhèu dhu kapod'e-kabèli miu sèra lula j'ara suna, na soro tèke si sèna ka rèngu unu ra pake tud'i ho ari eele mèdha nèti isi ra!

13 A'ari aa'i-aa'i! Lamatua patabuli le miu, ho miu mamuri pa'èki heka dènge dad'èi atora agama. Te ngaa mage pangee, na, miu bisa tao leli ho mamuri madhutu dad'èi miu di! Te dhu lèke, nuka miu hud'i mamuri pasue ku, aa paladha-leru èci dènge èci, sèmi ènu lalau-lalo'o lamatua na. 14 Ètu Sasuri Mola-Mèci, peka na, “Èu hud'i sue ku dhèu leo, sama sèmi èu sue ngi'u èu unu mu.” Ladhe miu tao madhutu dhoka atora sasue ne di, na, miu tao aa'i le madhutu dad'èi atora agama dhèu Yahudi.^b 15 Te ngaa ladhe miu èci patao-palaha dènge èci, do, èci pakèji dènge èci, pe mèdhi unu mi! Nèbhu boe, te miu palaho ngi'u miu unu mi.

16 Madhutu a'abhu ja'a sèmi ne'e ka: ladhe miu mamuri madhutu dad'èi Roh Lamatua, miu madhutu heka dad'èi dhèu rai-haha. 17 Te dad'èi dhèu rai-haha madhutu boe dad'èi Roh. Aa dad'èi Roh madhutu boe dad'èi dhèu rai-haha. Dua ra bisa boe pa'èci, te ngaa palab'a taruu! Nèti èèna ka, miu bisa heka tao hari madhutu dad'èi d'ara mi!^c 18 Te ngaa ladhe Roh Lamatua ator miu, na, miu pa'èki heka dènge atora sèra.

19 Dhèu dhu loe boe madhutu dad'èi dhèu rai-haha, nuka sèmi: dhèu dhu ad'u-ue j'ara karehe dènge dhèu dhu j'aj'i boe dhèu èmu-kamali na, dhèu dhu ngangee kaj'alu, dhu re'a boe d'ara makae, 20 dhu sogo-tagu nidhu ho suagi dhèu, dhu pamusu, dhu d'èi pasibha d'ara lii, dhu tèka d'ara, dhu nasa leli, dhu ngee dhoka ngi'u na, dhu d'èi kakèj'i dhèu, dhu d'èi tao maruru, 21 dhu d'èi boe dhèu leo risi ne, dhu d'èi mahu paa-paa, dhu d'èi madhutu pesta toke re'a heka makae, aa d'èi tao sasala dhu leo hari. Uru èèna, dhu ja'a pasanèd'e le, na, dhèu dhu tema tao j'ara-j'ara sèmi sèra, rèngu bisa boe j'aj'i dhèu unu Ama Lamatua.

22 Te ngaa dhèu dhu mamuri madhutu dad'èi Roh Lamatua, èèna na Roh tao ne ho j'aj'i dhèu dhu d'èi pasue, d'ara dhu karej'e-karae, dhu d'èi padame, taha nare d'ara, d'ara be'a dènge dhèu leo, dhu d'èi soru-bara dhèu, dhu d'èi kèpe pa'èra-èra lii pajaji, 23 dhu lii mako dènge dhèu aa'i-aa'i, aa bisa j'aga paie-iie mamuri na. Abhu boe atora èci sa dhu magee j'ara se'e se. 24 Dhèu dhu j'aj'i le dhèu unu Yesus Kristus, nèngu dhu pakaj'èu le nèti dad'èi dhèu rai-haha. Te d'ara dhu d'èi tao bhelu èèna, dhu na paku pamadhe le ètu aj'u palolo-palèbha palere-lere dènge Yesus. 25 De ladhe Roh Lamatua hia le mamuri hiu mi èdhi, na, èdhi hud'i madhutu taruu ku dad'èi Nèngu. 26 Nèti èèna ka, baku padedha iisi, baku d'èi èci kakèj'i èci, aa baku patèka d'ara èci dènge èci.