3 Sèmi èèna kahèi dènge èdhi. Lod'o Yesus Kristus dhae mai mèka, èdhi nuka sèmi ana iiki èèna. Te èdhi dhu pa'èki madhe dènge dad'èi rai-haha, nuka sèmi ènu ca dhèu. 4-5 Te ngaa ropa d'ai lod'o na, Ama Lamatua pua mai Ana d'èlu Na dhu j'aj'i dhèu rai-haha èèna, sèna ka dhèu rai-haha bisa kahèi j'aj'i dhèu dhu Ama Lamatua ded'e nare j'aj'i ana-ana Na. Ana d'èlu Na èèna mamuri madhutu atora agama dhèu Yahudi, sèna ka Nèngu bisa patabuli dhèu aa'i-aa'i dhu uru èèna pa'èki dènge atora se.

6 Lula miu j'aj'i le ana-ana Ama Lamatua, nèti èèna ka Na hia le Roh Ana Na mai asa d'ara miu. Dènge j'ara ne'e, miu dènge hak paroa Ama Lamatua, na, “Ama Pasue”. 7 De limuri ne miu j'aj'i heka ènu dhu dènge boe hak ho abhu pusaka. Te ngaa miu j'aj'i le ana-ana Ama Lamatua dhu dènge hak, sèna ka abhu pusaka aa'i-aa'i dhu Na pajaji tèke le.^a

8 Uru èèna, lod'o miu tadhe mèka Ama Lamatua, miu tao iisi mi j'aj'i ènu, ho sogo-tagu ngaa-ngaa dhu lèke boe. 9 Te ngaa limuri ne, miu tadhe le Ama Lamatua. Be'a risi, ja'a peka, na, Ama Lamatua ka dhu tadhe miu. De tasamia ka miu neo lèpa hari asa sogo-tagu ngaa dhu guna boe, aa dhu dènge boe koasa ngaa-ngaa sèra? Miu neo tao iisi mi pa'èki dènge j'ara-j'ara sèra, sèna ka j'aj'i hari ènu ra, do? 10 Ja'a tadèngi, na, miu kèpe atora ho pakab'ua risi lod'o-lod'o hua iia madhutu lod'o, hèru, èj'i lai, hèru hadhu, dènge tèu, ho neo pakarej'e d'ara Ama Lamatua. 11 Ne'e ne ka dhu pa'ele iie ngangee ja'a! Mage dhoka j'aj'èra ja'a aj'a-nori miu nèbhu nare sange ne'e, ele iie d'ara di.

12 A'ari dhu pasue! Ja'a manèngi sèna ka miu mamuri pa'èki ia ka dènge madha j'ara sèra, sèmi ja'a ne. Te mamuri ja'a ne pa'èki heka le dènge atora agama, èci èèna ka dènge miu dhèu Yahudi boe. Uru èèna, lod'o èdhi bera-bera era, miu pasusa boe ja'a. 13 Miu aa'i-aa'i mi me'a, na, ca hari ni, lod'o ja'a mai hiu-hiu èèna, ho peka-padhai Lii Lolo Be'a dènge miu, ngi'u aae ja'a ne roe-bhilu. 14 Masi ka sèmi èèna, te ngaa miu tule eele boe ja'a, lula miu sèmi mere ja'a nuka sèmi ana pajuu Ama Lamatua nèti sorga. Risi-risi hari, miu sèmi mere ja'a ne, nuka sèmi Yesus Kristus mesa Na. 15 Lod'o èèna, èdhi aa'i-aa'i ti karej'e titu kèna. Te ngaa, nga tao ka limuri ne, sèmi heka èèna? Uru èèna, miu sue ja'a titu kèna, ka miu toke neo ed'o eele ana madha miu ho hia ja'a. 16 Te ngaa limuri ne, miu ngee, na, ja'a j'aj'i le musu miu, lula ja'a padhai dhu mola dènge miu, do?

17 Dhèu kapod'e-kabèli sèra, ro'o boe ja'a pa'angalai dènge miu, ka ra dadugu miu ho madhutu aa'i atora agama Yahudi. Dad'èi d'ara ra, sèna ka miu bhute madhutu dad'èi rèngu di. 18 Te ngaa ladhe miu maj'èni tao j'ara dhu be'a, èèna be'a kahèi! Masi ka ja'a sama-sama dènge miu, do aad'o, ngaa-ngaa tao boe. Sad'i miu tao j'ara dhu be'a.

19 Ana-ana pasue! Ne'e ne, ja'a sab'a bia risi hari hia miu, nuka sèmi bhèni dhu kabake pèd'a neo nara iisi. Te ja'a ae kora boe ciki sa nèti sasab'a, toke d'ara miu èci èèna ka dènge d'ara Kristus. 20 Te ngaa limuri ne, ja'a ke'a heka neo tao miu tasamia hari! Ja'a d'èi titu kèna, dhiu padhai lii patoo madha dènge miu, sèna ka ja'a baku padhai lii taka sèmi ne'e ne.

21 Ladhe miu neo mamuri madhutu atora agama dhèu Yahudi, be'a risi miu me'a uuru ku dad'èi nèti atora sèra. 22 Ètu Sasuri Mola-Mèci Lamatua abhu lii lolo dhu lole, peka na, ana mone Abraham, dhèu dua. Nèngu abhu ana ca dhèu nèti bhèni dhu ènu na, aa ca dhèu hari nèti dhèu èmu-kamali na, dhu ènu boe.^b 23 Ènu ne nara iisi ana na, lula madhutu dad'èi dhèu rai-haha. Te ngaa dhèu èmu Abraham nara iisi ana na, lula madhutu lii moa dhu Ama Lamatua peka mema le.

24 Bhèni dhèu dua se, nuka sèmi tadha dhu pad'elo dua lii pajaji dhu Ama Lamatua padhadha dènge dhèu rai-haha. Lii pajaji èci, Lamatua pangèd'u mi Musa ètu ledhe Sinai, lod'o Nèngu papuru atora agama dhèu Yahudi. Dhèu dhu pa'èki dènge atora agama sèra, rèngu j'aj'i ènu sama sèmi Hagar kahèi. 25 Era ètu ledhe Sinai ètu rae Arab èèna, nuka sèmi Hagar ne kahèi. Dhèu Yerusalem aa'i-aa'i lod'o limuri ne, dhu pa'èki era dènge atora agama Yahudi, rèngu sèra ènu kahèi nuka sèmi Hagar.

26 Te ngaa lii pajaji dhu leo hari, paj'uj'u asa kota Yerusalem dhu leo èci ètu sorga. Ana-ana unu Ama Lamatua dhu pea ètu èèna, ènu boe. Te rèngu dhèu bebas dhu pa'èki boe dènge atora agama èèna. Nèti èèna ka, rèngu se èci èèna ka dènge ina ji'i Sara, dhèu èmu Abraham. 27 Ètu Sasuri Mola-Mèci, dhu suri tèke, peka na,

28 De a'ari aa'i-aa'i! Uru èèna Ama Lamatua dhu padhadha le hia ana mi Abraham. Te ngaa nèbhu ku, heka Lamatua tao madhutu lii pajaji Na kèna, hèia Sara nara iisi Isak hia Abraham. Èdhi sama sèmi Isak kahèi, lula Ama Lamatua pajaji hia Abraham ana-èpu dhu leo kahèi. 29 Lod'o èèna, ana ènu dhu j'aj'i madhutu dad'èi dhèu rai-haha èèna, ropa na kapai, na paj'èra Isak, dhu j'aj'i madhutu dad'èi Roh Lamatua. Èèna sama kahèi dènge ngaa dhu j'aj'i limuri ne.^e 30 Sasuri Mola-Mèci Lamatua suri kahèi, peka na, “Babège eele ènu dènge ana na. Te ana nèti ènu ne dènge boe hak ho abhu pusaka. Dhodhoka ana nèti dhèu èmu kab'i na dhu dènge hak.”^f

31 De sèmi ne'e a'ari aa'i-aa'i! Èdhi sama boe dènge ana nèti ènu, lula èdhi pa'èki heka dènge atora agama dhèu Yahudi. Te èdhi nuka sèmi ana nèti dhèu èmu kab'i Abraham, lula èdhi parcaya Yesus Kristus.