6 Sanèd'e mèdhi era sina ma, bèi-baki dhèu Yahudi, nuka Abraham. Te Sasuri Mola-Mèci Lamatua suri, peka na, “Lula na parcaya Ama Lamatua, ka Lamatua sèmi nare ne j'aj'i mi dhèu mola.”^a

7 De miu hud'i me'a pabe'a-be'a ku j'ara ne'e! Dhèu dhu parcaya sama sèmi Abraham, rèngu j'aj'i mi dhèu unu Ama Lamatua dhu tare'a-re'a.^b 8 Lamatua dhu peka tèke le ètu d'ara Sasuri Mola-Mèci Na, peka na, Nèngu sèmi nare kahèi dhèu nèti suku leo j'aj'i mi dhèu mola, ladhe ra parcaya Ne. Te uru èèna, Na peka mema le mi Abraham Lii Lolo Be'a, na, “Bèli-camèd'a suku aa'i-aa'i ètu rai-haha ne, abhu mèngi-nale lula èu ne.”^c 9 Lula lii moa Ama Lamatua èèna, ka Na papuru kahèi berkat mi dhèu aa'i-aa'i dhu parcaya Ne, nuka sèmi dhu Na hia mi Abraham.

10 Dhèu dhu madhutu atora agama, sèna ka Lamatua sèmi nare ne j'aj'i mi dhèu mola, nèngu hud'i pasae nare ku babia nèti atora sèra aa'i-aa'i, nuka sèmi nèngu lèke le dhoo. Te dhu suri ètu Sasuri Mola-Mèci, peka na, “Dhèu dhu madhutu boe taruu atora agama d'ai lutu, nèngu lèke le dhoo èèna!”^d 11 Te ngaa te'a, na, Ama Lamatua sèmi nare boe ca dhèu sa, lula na madhutu atora agama. Te dhu suri tèke, peka na, “Dhèu hud'i parcaya ku Ja'a, heka sèmi kore ne j'aj'i mi dhèu mola, ho na abhu mamuri dhu lèke.”^e

12 De ladhe dhèu neo mamuri madhutu dad'èi atora agama, nèngu hud'i tao madhutu ku aa'i-aa'i toke lutu! Te Lamatua dhu peka mema le ètu Sasuri Mola-Mèci, na, “Dhèu dhu neo mamuri madhutu atora, èèna na nèngu bhute dhoka dènge atora sèra di.”^f

13 Te ngaa Kristus b'ae pama'ète le, ho patabuli èdhi nèti atora agama dhu èki èdhi. Uru èèna, èdhi mamuri oe madhe, dènge pasae babia atora agama, nuka sèmi dhèu dhu lèke dhoo. Te ngaa limuri ne Lamatua Yesus ded'e eele le babia èèna nèti èdhi. Te dhu suri tèke ètu Sasuri Mola-Mèci, na, “Ladhe dhèu madhe lèke kadhoe ètu agarii, sasoa na, nèngu madhe aapa.”^g 14 Ropa Yesus Kristus madhe, sèna ka pala-bagi mamuri mi èdhi, berkat èèna ka dhu Ama Lamatua pangèd'u mi Abraham, aa hia kahèi mi suku leo. Dènge j'ara ne'e, dhèu aa'i-aa'i dhu parcaya Kristus, bisa abhu Roh Ama Lamatua dhu Na jaji le.

15 A'ari aa'i-aa'i! Doe ne'e ja'a neo kore pakasame nèti mamuri èdhi bèli-mai bèli-mai. Ladhe abhu dhèu dhu suri sasuri lii padhadha nèti pusaka, ka dhu ènyi le ngara na ètu sasuri ne, sasoa na, sasuri ne lèke tare'a. Dhèu leo bisa boe ère eele ngaa dhu suri ètu d'ara sasuri èèna, aa bisa boe suri tabha hari ngaa-ngaa asa d'ara sasuri èèna. 16 Sama sèmi èèna kahèi, lod'o Ama Lamatua patari lii padhadha dènge Abraham, aa dènge ana-èpu na. Ama Lamatua peka boe, na, “Ja'a patari lii padhadha ne dènge ana-èpu èu sèra”, lula Na padhadha boe dènge dhèu ae-ae. Te ngaa Na padhadha dhoka dènge ana-èpu Abraham ca dhèu di, nuka Kristus.^h 17 A'abhu ja'a sèmi ne'e ka: Ama Lamatua paj'ari uru lii padhadha dènge Abraham. Hèia èpa ngasu tèlu nguru tèu ku, heka Na papuru atora agama hia dhèu Yahudi kèna, re baki ra Musa. Te ngaa masi ka sèmi èèna, Lamatua ère heka lii padhadha dhu Na tao uru èèna.ⁱ 18 Te Lamatua hia boe mèngi-nale mi Abraham, lula na tao madhutu atora ne. Te ngaa Lamatua hia berkat lula Na moa tèke le, karèi nèti uru ka, ho hia hadia mi Abraham. Èèna nuka sèmi ana ca dhèu abhu pusaka nèti ama na. Ana ne abhu pusaka na, lula ama na dhu padhadha uru le, lula boe nèti ana ne tao madhutu atora.^j

19 De ja'a neo karèi sèmi ne'e: ladhe Ama Lamatua sèmi nare Abraham j'aj'i mi dhèu mola lula lalèka na, nga tao ka Lamatua tabha hari atora agama re Musa? Lamatua tabha atora agama sèra, sèna ka aj'a dhèu rai-haha lula-nèti sasala-sasigo ra. Dad'èi Na sèna ka dhèu rai-haha mamuri madhutu dad'èi atora sèra, toke ana-èpu Abraham ca dhèu mai. Hèia ladhe dhèu ne mai ka, nuka Kristus èèna, na, atora ne parluu heka.

Lod'o Lamatua papuru atora agama Yahudi, Nèngu j'ole mema boe mi dhèu Yahudi sèra. Te ngaa Na hia re ana pajuu Na nèti sorga, mai pangèd'u mi adhe-aai Musa, heka Musa hia asa dhèu Yahudi kèna. Dènge j'ara ne'e, Musa j'aj'i nuka sèmi kalete sa nèti Lamatua dènge dhèu-dhèu unu Na. 20 Te ngaa ropa Ama Lamatua tao lii pajaji dènge Abraham, Na pake boe kalete. Te Lamatua peka unu Na dènge Abraham! Dènge sèmi èèna, èdhi te'a, na, lii pajaji Lamatua ne kab'ua risi eele nèti atora sèra.

21 Lod'o Lamatua hia atora agama asa Musa èèna, pasala dènge lii-lii pajaji Na, do? Aad'o! Te ladhe abhu atora dhu dhèu rai-haha bisa tao madhutu ne, ho Lamatua sèmi nare ne sèna ka na bisa mamuri, tatu atora dhèu Yahudi bisa tao sèmi èèna kahèi. Madhutu iia-iia na, abhu boe atora èci sa dhu dhèu bisa tao madhutu ne, sèna ka cuhi d'ara Lamatua ho Lamatua sèmi nare ne j'aj'i mi dhèu mola. 22 Te ètu Sasuri Lamatua dhu Mola-Mèci èèna, suri peka na, dhèu aa'i-aa'i ra pa'èki madhe dènge rupa-rupa sasala ra. Nèti èèna ka, dhodhoka dhèu dhu parcaya Yesus Kristus di, bisa abhu ngaa dhu Ama Lamatua moa tèke èèna.

23 Lod'o Kristus dhae mai mèka, ji'i dhèu Yahudi pa'èki madhe dènge atora sèra, toke bisa boe kalau. Te ngaa ropa d'ai lod'o na, Lamatua bhoke j'ara ho ji'i kalua nèti atora sèra, ladhe ji'i parcaya Kristus. 24-25 De atora agama sèra, sama sèmi dhèu madhenge dhu aj'a paie-iie èdhi toke Kristus mai. Te ngaa ropa Na mai ku, heka èdhi bisa parcaya Ne, sèna ka èdhi mamuri pabe'a dènge Ama Lamatua. Nèti èèna ka, limuri ne èdhi parluu heka dhèu madhenge èèna.

26 Limuri ne, miu j'aj'i le ana-ana Ama Lamatua, lula miu parcaya Yesus Kristus. 27 Miu aa'i-aa'i mi dhu sarani èle le, ho j'aj'i dhèu unu Na dhu pa'èki madhe dènge Ne. 28 Dhèu dhu lèka Kristus, aa'i-aa'i ra èci èèna ka, beda boe. De masi ka miu dhèu Yahudi, do dhèu Yahudi boe, ènu do ènu boe, dhèu mone do dhèu bhèni, aa'i-aa'i mi dhu pa'èki le dènge Yesus Kristus, ca ropa èèna ka.

29 Kristus ne, ana-èpu Abraham dhu Ama Lamatua padhadha karèi nèti uru ka. Lula miu pa'èki le dènge Kristus, nèti èèna ka miu j'aj'i le tare'a-re'a ana-èpu Abraham. Dènge j'ara sèmi èèna, miu bisa kahèi abhu berkat dhu Ama Lamatua moa tèke le mi Abraham.^k