Dhèu pajuu-paleha dhu leo sèra, sèmi rare a'aj'a Paulus dènge be'a
2
D'ai èle canguru èpa tèu, hèia ja'a lèpa asa kota Yerusalem sama-sama dènge Barnabas. Aa ji'i ngèti dènge Titus, ca dhèu parcaya dhu Yahudi boe.a 2 Ja'a laku asa nèi, lula lii paredha Ama Lamatua. D'ai nèi, ka ja'a lole mi dhèu heka-dhèu heka Kristen, Lii Lolo Be'a dhu ja'a aj'a-nori le mi dhèu Yahudi boe sèra. Lod'o èèna, ja'a peka unu ku mi rèngu se, ho ra parisa pabe'a-be'a ngaa dhu ja'a aj'a le sèra, lèke do aad'o. Te ladhe ra pama'ète, peka na, a'aj'a ja'a èèna sala, na, dhèu bisa ngee, na, ja'a sab'a iia d'ara di!3 Ropa dhèu se'e tadèngi rare lii ja'a sèmi èèna, hèia ra sèmi rare dènge be'a. Aa ra d'èi sèmi rare Titus dènge be'a kahèi. Masi ka Titus dhèu Yahudi boe, te ngaa ra laka-seti boe sèna ka na suna. 4 Te ngaa lod'o èèna, abhu a'ari dhèu pèri dhu d'èi boe a'aj'a ja'a, lula rèngu se aj'a dhu leo. Rèngu se, dhèu Kristen kapod'e-kabèli. Ka rèngu mau-mau mai laka-seti dhèu unu Kristus sèra dhu dhèu Yahudi boe, ho madhutu aa'i atora agama Yahudi. Te ngaa, lula Yesus Kristus patalale eele le èdhi, nèti èèna ka atora sèra èki heka èdhi, sèmi ènu sa. 5 Masi ka ra laka-seti sèmi èèna, te ngaa ciki sa ji'i ngo'o boe sèmi ngare. Dènge j'ara ne'e, miu bisa parcaya taruu Lii Lolo Be'a dhu ja'a nori le. Te dhu mola-mola na kèna!
6 Dhèu heka-dhèu heka se sèmi rare lii a'aj'a ja'a ne, aa ra patabha heka ngaa-ngaa. Te ngaa Ama Lamatua hag'e boe dhèu. De masi ka rèngu dhèu kapai do ana iiki, ngaa-ngaa tao boe.b 7 Te dhu lèke, nuka: rèngu re'a, na, Ama Lamatua pili nare le ja'a, ho kèti Lii Lolo Be'a mi dhèu-dhèu Yahudi boe. Nuka sèmi dhu Na paredha mi Petrus kahèi, sèna ka nèti Lii Lolo Be'a asa dhèu Yahudi. 8 Te Ama Lamatua pangèd'u koasa mi Petrus ho j'aj'i dhèu pajuu-paleha mi dhèu Yahudi. Sèmi èèna kahèi, Na hia ja'a koasa sèna ka j'aj'i dhèu pajuu-paleha mi dhèu-dhèu dhu Yahudi boe. 9 Lod'o èèna, madhutu ngangee dhèu sèra, Yakobis, Petrus,c dènge Yohanis, dhu j'aj'i le ama-ama gareja. Ropa rèngu tèlu ra re'a, na, Ama Lamatua pad'elo le d'ara hua iia Na mi ja'a, hèia ra kèd'i paj'ola ai dènge ja'a, aa dènge Barnabas, sèna ka j'aj'i mi tadha, peka na, ji'i aa'i-aa'i mi d'ara èci le. Rèngu ro'o kahèi, ji'i ngèti Lii Lolo Be'a asa dhèu Yahudi boe, aa rèngu rèti asa dhèu Yahudi. 10 Dhoka ca j'ara di, dhu ra pasanèd'e ji'i, nuka ji'i baku bhèlu soru-bara dhèu dhu unu aad'o sèra. Mema j'ara ne'e ka dhu ja'a neo tao.
Paulus kai Petrus ètu Antiokia, lula na pakaj'èu nèti dhèu Yahudi boe
11 Ka ca tèka, Petrus mai asa kota Antiokia. Hèia ja'a kai ne patoo madha dènge madha, lula nèngu tao sala. 12 Lod'o na heka mai, nèngu karèj'e madhèdi na'a dènge dhèu-dhèu unu Kristus dhu dhèu Yahudi boe. Te ngaa ropa angalai Yakobis dhèu Yahudi sèra mai, hèia Petrus mulai pakaj'èu nèti a'ari dhèu Yahudi boe, ka na na'a pa'èci heka dènge rèngu. Te lula na madha'u dènge a'aj'a nèti dhèu Yahudi dhu peka na, dhèu unu Kristus hud'i kèpe pa'èra-èra atora agama Yahudi aa'i-aa'i, aa hud'i pakaj'èu ku dènge dhèu-dhèu dhu Yahudi boe.
13 Ropa rèdhi tatao Petrus ne, ka dhèu Yahudi dhu leo sèra tao madhutu kahèi. Toke Barnabas kahèi madhutu tatao ra dhu peka leo, tao leo. 14 Te ngaa ropa ja'a patigi kèdhi, rèngu madhutu be'a heka dad'èi Lii Lolo Be'a, hèia ja'a kai dènge ka Petrus ètu katanga madha rèngu aa'i-aa'i ra, peka na, “Eee, Petrus! Èu ne, mema dhèu Yahudi. Te ngaa Ama Lamatua bhoke le j'ara, ho dhèu dhu parcaya Yesus Kristus pa'èki heka madhutu atora agama Yahudi sèra. Aa èu dhu sèmi more le j'ara ne'e, nga tasamia ka, èu laka-seti dhèu Yahudi boe, sèna ka tao iisi ra sama sèmi dhèu Yahudi?”
15 Ja'a kai Petrus sèmi èèna, lula ji'i dua mi dhèu Yahudi. Suku ji'i dua mi se dhèu Yahudi, sama boe dènge suku leo sèra, lula suku ji'i dhu nèbhu le tadhe Ama Lamatua. 16 Te ngaa limuri ne, ji'i nge'a kahèi, na, Lamatua sèmi nare boe ca dhèu sa j'aj'i mi dhèu mola, lula nèngu tao madhutu atora agama dènge be'a. Te ngaa Lamatua sèmi nare dhèu, ladhe nèngu parcaya Yesus Kristus, lula boe nèti nèngu madhutu atora agama. Sèmi èèna ku, heka Lamatua peka na, dhèu ne dènge heka sasala-sasigo.d
17 Nèti èèna ka, ji'i aj'a, na, Lamatua sèmi nare dhèu j'aj'i mi dhèu mola, lula na parcaya Yesus Kristus. Te ngaa abhu dhèu Yahudi dhu pasala ji'i. Ra peka na, ji'i parcaya Yesus Kristus, te ngaa kèpe heka atora agama Yahudi. Miu neo pèci sasala sèmi èèna mi ji'i kahèi, do? 18 Te ladhe ja'a kèpe kore hari atora agama dhu ja'a patabuli eele le, èèna heka peka na ja'a sala kèna! 19-20 Mema uru èèna, ja'a tenge j'ara ho madhutu dènge be'a atora agama Yahudi, sèna ka ja'a pabe'a dènge Lamatua. Te ngaa bisa boe kahèi. Nèti èèna ka, ja'a tèke eele le atora agama sèra, ho mamuri pa'èki dènge Kristus. Dènge j'ara sèmi ne'e, heka Ama Lamatua sèmi nare ja'a j'aj'i mi dhèu mola. Peka sèmi ne'e ka: ja'a madhe lèke paku ètu aj'u palolo-palèbha sama-sama dènge Kristus. De limuri ne, ja'a boe ka dhu mamuri, te ngaa Kristus ka dhu mamuri ètu d'ara ngi'u ja'a. Ja'a abhu mamuri dhu hiu ne, lula parcaya Ana nèti Lamatua. Te Nèngu sue ja'a titu kèna, toke Na madhe gati ja'a. 21 Hèia Ama Lamatua sèmi nare ja'a, lula d'ara hua iia Na, lula boe nèti ja'a madhutu atora agama sèra. Te ladhe dhèu bisa pabe'a dènge Lamatua lula madhutu atora agama, èèna sasoa na, mamadhe Kristus iia-iia d'ara di.
Sèra sa ka dhu ja'a peka dènge Petrus si ètu Antiokia.