J'aga paie-iie mamuri miu
13
De ne'e ne kali ka tèlu kèna ja'a neo dhiu ngad'o miu. Ladhe abhu dhu neo galaa dhèu, na, baku bhèlu atora na. Te Sasuri Mola-Mèci Ama Lamatua dhu suri, peka na, “Ladhe abhu dhu neo galaa dhèu èci, hud'i dènge ku dua do tèlu sakasii dhu lii èci, heka sèmi mere kèna. Te ladhe abhu boe lii èci sèmi èèna, baku sèmi mere lii galaa èèna.”a 2 Lod'o dhu ja'a dhiu kali ka dua asa miu uru èèna, ja'a pasanèd'e le dhèu dhu mamuri ètu d'ara bhabhelu-katub'a sèra. Limuri ne, ja'a pasanèd'e hari rèngu sama-sama dènge dhèu aa'i-aa'i dhu mamuri ètu d'ara bhelu-katub'a sèra. Nuka sèmi uru èèna, dhu ja'a peka kore le, na, ladhe ja'a j'aj'i mai hari, ja'a soro tèke boe rèngu sèra.3 Miu tenge bukti, dhu peka na, Kristus padhai lii re ja'a. Ladhe Kristus neo ator miu, Na tao dènge koasa kapai ètu talora aae miu. Te Nèngu sab'a boe dènge roe. 4 Lod'o dhèu pamadhe Ne ètu aj'u palolo-palèbha, mema Na roe aala-aala, lula Na patalale eele koasa Na. Te ngaa Ama Lamatua pangèd'u le Kristus koasa, hèia Na mamuri hari le. Ka masi ka ji'i j'aj'i dhèu unu Na, dhu rasa na, ji'i ètu d'ara raroe era, te ngaa Ama Lamatua hia le ji'i mamuri hiu. Nèti èèna ka, ji'i bisa ladhe-leru miu pake koasa Nèngu.
5 Parisa d'ara miu unu mi dhu peka na, miu parcaya tare'a mi Kristus, do aad'o. Koasa Na bisa tèdhi ètu d'ara mamuri miu, do aad'o? Uji mamuri miu sèmi èèna. Te ladhe Kristus pa'èki boe dènge miu, miu j'aj'i boe dhèu unu Na. 6 Ladhe miu parisa ji'i, na, miu bisa ladhe mèdhi koasa Kristus ètu d'ara mamuri ji'i. Dènge j'ara ne'e, ji'i lolos. 7 Ji'i sabaj'a kahèi manèngi Ama Lamatua, sèna ka miu baku manahu asa d'ara sasala ngaa-ngaa. Ji'i pusi-pahae boe dhèu d'èi, do d'èi boe, nèti sasab'a-la'a ji'i. Te ngaa ji'i d'èi ladhe miu tao dhu lèke, masi ka dhèu cahag'e tule eele ji'i. Masi ka dhèu tule eele ji'i sèmi èèna, ngaa-ngaa tao boe. 8 Te ji'i bisa boe tao ngaa-ngaa, ho lab'a j'ara dhu lèke. Ji'i nge'a dhoka tao dhu lèke di. 9 Ladhe miu j'aj'i èra, aa ji'i j'aj'i roe èèna ka, ji'i karej'e-karae. Te ji'i sabaj'a, ho manèngi Lamatua tao pamèci miu. 10 Nèti èèna ka, masi ka ja'a pakaj'èu dènge miu, ja'a suri tèke le j'ara se'e se, ho ladhe d'ai ka lod'o ja'a dhiu, ja'a tao heka lii sakaa dènge miu. Ja'a j'aj'i dhèu pajuu-paleha Lamatua èdhi. Te ngaa Na pangèd'u hak dènge koasa mi ja'a, sèna ka pa'ele iie boe miu, te ngaa pa'èra miu.
Paulus pa'èle sasuri na
11 A'ari dhu pasue aa'i-aa'i! Lii ja'a dhu limuri tèka ne, dhoka lii maho'o di. Pamola j'ara aa'i-aa'i ra. Nanene paie-iie lii holo-nori ja'a. Mamuri d'ara èci. Miu èci dènge èci hud'i pabe'a-be'a. Kapua sasue nèti Ama Lamatua. Ja'a manèngi sèna ka Ama Lamatua bera-bera taruu dènge miu, aa Na soru-bara miu, ho miu mamuri padame èci dènge èci.
12 Miu hud'i pamaho'o aa pa'uu dhu pantas dènge dhèu mola-mèci unu Ama Lamatua. Dhèu-dhèu unu Lamatua ètu se'e, pa'adhu lii maho'o kahèi hia miu.
13 Ja'a manèngi sèna ka Kètu èdhi, Yesus Kristus pad'elo d'ara hua iia Na mi dedha miu. Ja'a manèngi ho Ama Lamatua pad'elo sasue Na mi dedha miu. Ja'a manèngi kahèi sèna ka Roh Mola-Mèci Lamatua pad'elo d'ara be'a Na, ho hud'i laa miu mamuri d'ara èci.
Sange ne'e ka,
Paulus