Paulus ladhe nèdhi ngaa èci, nuka sèmi tanila sa
12
Ladhe miu mo'o, na, ja'a padedha iisi hari ciki, masi ka gaguna aad'o. Te ngaa ja'a neo peka dènge miu j'ara-j'ara dhu Lamatua èdhi pad'elo le dènge ja'a ètu d'ara tanila. 2-4 Ja'a tadhe ca dhèu unu Kristus. Canguru èpa tèu dhu la'e, abhu dhu ded'e ne asa dedha-liru dhu dedha aae. Te ngaa ja'a ke'a boe, na ca'e dènge ngi'u aae, do dhoka roh nèngu di. Dhodhoka Lamatua di ne'a. Ja'a ke'a kahèi, na, ropa ded'e ne asa era hua iia Lamatua èèna, nèngu tadèngi lii padhai dhu be'a titu kèna, dhu dhèu rai-haha bisa boe peka-padhai. 5 De mi dhèu sèmi èèna, ja'a neo padhai lii padedha. Te ngaa ja'a ko'o boe padedha iisi lula-nèti ngi'u ja'a unu ku. Ja'a ded'e dhoka raroe-bhilu ja'a, aa j'ara-j'ara dhu ja'a bisa boe tao kore. 6 Ladhe ja'a neo padedha iisi, na, ja'a parluu boe monya, te ja'a dhu dènge j'ara ae dhu lèke, dhu ja'a bisa peka-padhai. Te ngaa ja'a mau-mau, sèna ka dhèu baku pangee, na, ja'a dènge kolo-karisi nèti ngaa dhu rèngu tadèngi aa ladhe rèdhi nèti ja'a. 7 Risi-risi hari, Lamatua dhu pad'elo le dènge ja'a j'ara-j'ara dhu kapai titu kèna.Te ngaa ja'a abhu susa kahèi, sèna ka ja'a baku pamone. Te dhèu aae nidhu pua ana pajuu na èci, ho mai kakèj'i taruu ja'a, nuka sèmi dhudhu dhu pakèj'i ètu d'ara isi ja'a ne. Waa! Ja'a j'èra titu kèna! 8 Tèlu hari kèna, ja'a manèngi sèna ka Ama Lamatua pakaj'èu eele j'aj'èra ne nèti ja'a. 9 Te ngaa Lamatua peka na, “Ja'a pad'elo le d'ara hua iia Ja'a mi èu, de èèna d'ai le, sèna ka èu me'a, na, nèti d'ara raroe ka koasa Ja'a asa tabha.” Nèti èèna ka ja'a d'èi padedha iisi ètu d'ara raroe ja'a, sèna ka ja'a ke'a, na, koasa Kristus ètu d'ara mamuri ja'a. 10 Nèti èèna ka, ladhe a'èra ja'a mesa ku bisa boe sab'a ngaa èci sa, na, d'ara ja'a mau-mau sène. De ropa dhèu pahahe ja'a, do pasusa ja'a, do paj'èra ja'a, do game ja'a, lula ja'a j'aj'i dhèu unu Kristus, na, d'ara ja'a mau-mau sène. Te ladhe ja'a mesa ku bisa boe, na, ja'a abhu koasa nèti Kristus, ho bisa èra tao j'ara sèra.
Paulus j'aj'i ngangee, lula tatao dhèu parcaya ètu Korintus
11 Miu mamuri nuka sèmi me'a boe, na, Lamatua pua nèdhi mèka ja'a dhiu peka-padhai dènge miu. Nèti èèna ka, mo'o do mo'o boe, ja'a ako padhai lii ciki sèmi dhèu goa. Madhutu iia-iia na, miu se'e ka dhu padhai lii padedha ja'a. Ja'a ne mema dènge boe kab'ua, te ngaa ladhe pasoro ja'a dènge “dhèu kapai sèra” dhu peka na, Lamatua pua-paleha rèngu, na, rèngu sèra risi boe ja'a.
12 Ladhe Lamatua pua dhèu ho lole lula-nèti Nèngu, dhèu ne tao tadha malaa rupa-rupa pake koasa, sèna ka j'aj'i mi tadha, na, Lamatua ka dhu pua-paleha nèngu. Te ngaa baku bhèlu, te lod'o ja'a ètu talora aae miu, ja'a tao tadha malaa kahèi sèmi sèra. Aa ja'a sab'a mau-mau. 13 Te ngaa baku nasa! Dhodhoka ca j'ara di, dhu ja'a tao boe ètu talora miu, dhu dhèu leo tao ètu juma'at leo. Nuka ja'a manèngi boe miu ogo ja'a.
14 Sèmi ne'e! Ja'a dhu tèlu hari kèna pa'èra kore le ho dhiu ngad'o miu. Ja'a parluu boe miu ogo mamuri ja'a. Ja'a ko'o boe mèdha-panyau miu kahèi. Te madhutu ad'a èdhi, lèke boe ladhe ana iiki tèka mèdha-panyau hia ina-ama ra. Dhu lèke nuka ina-ama ka dhu sadia tèke mèdha-panyau hia ana niki ra. De ja'a parluu boe ladhe miu sadia tèke mèdha-panyau hia ja'a, te miu se sama sèmi ana-ana ja'a! Dhu ja'a parluu, dhoka mamuri dènge sasue miu. 15 Ja'a d'èi hèli mèdha hia miu. Ja'a d'èi sab'a bia kahèi, sèna ka miu bisa mamuri madhutu dad'èi Lamatua. Ladhe ja'a sue miu d'ai seli, na, miu hud'i sue ja'a sèmi èèna kahèi. Nga tao ka miu papènyi sasue miu? Lèke boe, sina ma?
16 Ètu talora miu, abhu dhu peka na, ja'a pabia boe miu. Te ngaa abhu kahèi dhu peka na, ja'a dhèu dhu mèu pakapod'e miu, sèna ka miu madhutu dad'èi ja'a. 17 De tasamia? Ele boe dhèu dhu ja'a pua dhiu asa miu sèra, tipu rare miu, do? Aad'o! 18 Te ja'a dhu pamako Titus ho dhiu asa miu. Ja'a pua a'ari dhèu parcaya èci sèna ka dhiu palere dènge Titus kahèi. Titus pakapod'e miu, do? Aad'o, si? Te Titus dènge ja'a ne, ca ropa. Ji'i sab'a j'ara dhu sama, te ngangee ji'i dua mi sama kahèi.
19 A'ari dhu pasue! Tao-tao miu dhu pangee, na, ji'i siri iisi ji'i ètu madha miu, do? Aad'o! Te aa'i-aa'i dhu ji'i peka-padhai se, Ama Lamatua dhu ne'a le. De ji'i bisa boe pahuni ngaa-ngaa nèti Nèngu. Ji'i pa'èki kahèi dènge Kristus. Lula ji'i sue miu, nèti èèna ka aa'i-aa'i dhu ji'i tao sèra, sèna ka bisa pa'èra miu.
20 Bèli-camèd'a, ladhe ja'a j'aj'i dhiu ngad'o miu, ja'a pangee mage dhoka miu j'aj'i boe sama sèmi dad'èi ja'a. Te mage dhoka abhu dhu patao-palaha, d'èi boe dhèu karisi nèngu, tèka d'ara, abhu dhu pangee dhoka mamuri nèngu mesa na, abhu dhu pa'ele iie kolongara dhèu, abhu dhu padhai-kakoli dhèu, abhu dhu padedha iisi, aa abhu dhu maruru jahu lulu-lulu. Mage dhoka ja'a kahèi j'aj'i boe sama sèmi dad'èi miu. 21 Ladhe ja'a dhiu ka asa miu, ja'a j'aj'i ngangee, lula tatao-tatao miu. Mage dhoka Ama Lamatua neo pamakae ja'a ètu madha miu. Mage dhoka ja'a pabia dhèu, lula, nèti miu abhu dhu mamuri ètu d'ara bhelu-katub'a era, te ngaa ele-ho'a boe, sèna ka madhutu j'ara mola nèti Lamatua. Rèngu se dhèu kaj'alu! Te abhu dhu ad'u j'ara makae dènge mone do bhèni dhu dhèu èmu nèngu boe. Ra ad'u-ue j'ara makae rupa-rupa dhu re'a heka makae d'ara.