5 Dhèu se padedha iisi ra, peka na, rèngu ka dhèu pajuu-paleha Lamatua dhu kapai risi. Madhutu ngangee miu, hak rèngu se risi nèti hak ja'a, do? Aad'o! Ja'a pake boe ngangee sèmi sèra. 6 Masi ka ja'a d'èlu-mèu boe ètu d'ara lii padhai pake lii dedha, te ngaa ke'a mèu sasoa nèti ngaa dhu ja'a padhue-padhai. Miu dhu me'a le j'ara se'e, lula ja'a peka pahari-pahari le dènge miu.

7 Lod'o ja'a aj'a miu Lii Holo-Nori Ama Lamatua, ja'a manèngi boe miu ogo-oru hia ja'a. Ja'a tao iisi nuka sèmi ana iiki sa, sèna ka bisa ded'e padedha miu. Teko-teko nèti j'ara ne'e ka miu neo pasala ja'a, do? 8 Te dhèu parcaya nèti juma'at era leo sèra ka dhu tago ja'a, sèna ka ja'a bisa ladhe-leru miu. Ne'e èci èèna ka dènge ja'a kore nèti rèngu ho soru-bara miu. 9 Lod'o ja'a bera-bera dènge miu, ladhe ja'a parluu ngaa-ngaa, na, ja'a manèngi boe miu, aa pabia boe miu. A'ari èdhi dhu mai nèti propensi Makedonia ka dhu soru-bara ja'a. Te ngaa ja'a pabia kèdhi mèka miu, aa bèli-camèd'a ja'a pabia boe miu sèmi èèna kahèi.^b 10 Lii Holo-Nori Kristus ne lèke tare'a-re'a. Ja'a lèka mèu, na, lii padhai ja'a lèke kahèi, lula ja'a pa'èki dènge Kristus. Abhu boe ca dhèu sa ètu propensi Akaya dhu bisa kutu hèb'a ja'a, aa kai ja'a sèna ka baku padhai lii padedha, peka na, ja'a pabia boe miu sèmi èèna. 11 Nga tao ka ja'a peka sèmi ne'e? Ele boe, lula ja'a sue boe miu, do? Masi ka miu pangee sèmi èèna, te ngaa Ama Lamatua ne'a, na, ja'a sue miu.

12 J'ara-j'ara dhu ja'a tao kèdhi le, ja'a tao taruu. Dènge sèmi èèna, dhèu dhu tema padedha iisi, peka na, tatao rèngu sèra èci èèna ka dènge tatao ji'i, na, padhai lii rèngu dènge boe kolo-kapua. 13 Rèngu peka, na, Lamatua ka dhu pajuu-paleha rèngu. Rèngu se, dhèu sab'a dhu d'èi leko-monya dhèu! Dhèu se tao iisi ra nuka sèmi dhèu pajuu-paleha dhu lèke nèti Kristus. Aa te ngaa rèngu se dhoka padhai lii hèb'a-hua! 14 Miu baku cag'ag'a! Te dhèu aae nidhu kahèi tao iisi na sama sèmi ana-ana pajuu Ama Lamatua nèti sorga dhu nèti saraa aa d'ara be'a. 15 Nèti èèna ka, miu baku malaa ladhe dhèu sab'a na neo tao iisi ra nuka sèmi dhèu dhu sab'a dènge d'ara mola. Sanèd'e, te èèna na Ama Lamatua b'ala bhabhelu-katub'a rèngu.

16 Ladhe mo'o, na, ja'a padhai lii hari ciki sama sèmi dhèu goa. Te ja'a neo padhai lii padedha iisi ciki. 17 Dhu ja'a suri padedha iisi ne, dhoka neo padhai lii sama sèmi dhèu goa sa. Te lii padhai ja'a ne kapua na nèti boe Lamatua èdhi. 18 Abhu dhèu ae dhu d'èi ded'e padedha ngi'u ra madhutu tatao dhèu rai-haha ne. De ja'a neo padhai lii padedha iisi kahèi sama sèmi rèngu. 19 Te miu dhu pangee, na, ngangee miu mola ladhe paraga dènge ca dhèu dhu kahadhu bia, na, miu soro tèke ne, si? 20 Ladhe dhèu leo tao miu madhutu dad'èi rèngu, na, miu soro tèke si. Nuka sèmi: ladhe dhèu tao miu sèmi ènu sa, miu soro tèke ne, do? Ladhe abhu dhu mana'u mèdha miu, miu soro tèke ne, do? Ladhe abhu dhèu tipu miu, miu soro tèke ne, do? Ladhe dhèu tao iisi nuka sèmi dhèu kapai, aa pahahe miu nuka sèmi ana iiki sa, na, miu soro tèke ne, do? Sèmi èèna kahèi, ladhe abhu dhèu dhu tèb'e miu, na, miu soro tèke ne sène. 21 Te ngaa baku nasa! Te ja'a makae, lula ji'i roe aala-aala. Te ji'i lake ngare boe tao sèmi èèna, sama sèmi dhèu sèra tao mi dedha miu.

Te ngaa ladhe rèngu neo padedha iisi lula ngaa sa, ja'a bani padedha iisi sèmi èèna kahèi. (Te ngaa baku bhèlu, te ja'a padhai lii sèmi dhèu goa na!) 22 Rèngu se dhèu Ibrani tare'a-re'a, do? Oo! Ja'a kahèi dhèu Ibrani. Rèngu dhèu Isra'el, do? Oo! Ja'a kahèi. Rèngu sèra ana-èpu Abraham, do? Oo! Ja'a kahèi. 23 Rèngu sèra dhèu sab'a hia Kristus, do? Oo! Ja'a kahèi sèmi èèna. (Baku bhèlu, te ja'a padhai lii paleko ne!) Mema, ja'a peka na, ja'a sama sèmi rèngu. Aa te ngaa ja'a risi nèti rèngu. Te ja'a sab'a bia risi. Ra bèdho ja'a ae risi. Ra game ja'a ae risi. Ja'a kahèi oe madhe pahari-pahari ae risi nèti rèngu.^c 24 Ètu d'ara adhe-aai dhèu ja'a, dhèu Yahudi, ra hake paparu ja'a lèmi hari. Lod'o-lod'o ra hake paparu ja'a, na, ra hake tèlu nguru ceo hari pake gui.^d 25 Tèlu hari, dhèu hake ja'a pake aj'u. Ca tèka dhèu pèci neo pamadhe ja'a. Ja'a molo dènge kapa tèlu hari. D'ara ca mèu ca mèda, ja'a leb'o-leb'o ètu d'ara dhasi.^e 26 Ja'a laku kaj'èu asa mia-mia pahari-pahari. Ètu d'ara kakako ne, ja'a paraga dènge j'aj'èra rupa-rupa, dhu tao ja'a oe madhe. Nuka sèmi: nèti èi aae lala ètu d'ara loko aae, nèti parapo, nèti dhèu ja'a dhèu Yahudi, nèti dhèu Yahudi boe, aa nèti dhèu dhu tao ngi'u ra sama sèmi a'ari dhèu parcaya, aa te ngaa rèngu leko-monya. Ja'a oe madhe kahèi ètu talora lèu, ètu d'ara kota, dènge era dhèu pea boe.^f 27 Ja'a sab'a bia, aa paraga dènge sasusa ae-ae. Lod'o ae ka dhu ja'a bisa boe bhèj'i. Ja'a manganga dènge koko-kamango kahèi. Pahari-pahari ku'a boe ngaa-ngaa. Abhu kahèi lod'o dhu ja'a unu boe mèdha-papake, ka maringi oe madhe. 28 Aa ladhe mo'o boe ige j'ara se'e, na, ige sèmi ne'e ka: te bèli-bèli ja'a j'aj'i ngangee kapai, lula ngee kèdhi a'ari èdhi dhèu parcaya dhu pakaboko ètu mia-mia. 29 Ladhe abhu dhèu dhu rasa roe-bhilu dhu bisa boe sab'a ngaa-ngaa, na, sanèd'e ja'a. Te ja'a sèmi èèna kahèi. Ladhe abhu dhèu dhu dadugu dhèu-dhèu parcaya sèna ka tao j'ara karehe sama-sama dènge rèngu, na, ja'a makae, aa nasa.

30 Ladhe ja'a neo padedha iisi, na, be'a risi ja'a padedha iisi lula-nèti j'ara-j'ara dhu pad'elo raroe ja'a. Tare'a! 31 Kètu èdhi Yesus, dènge Ama Na, Ama Lamatua re'a, na, ja'a monya boe. Dhu lèke, ladhe dhèu koa-kio Ne toke d'ai mia-mia.

32 Conto nuka sèmi, uru èèna ètu kota Damsik, gubernur nèti dhèu aae Aretas pua dhèu mate ho kèpe ja'a ètu hèb'a tedhe kota. 33 Te ngaa angalai ja'a pamaso ja'a asa d'ara karogo èci. Ka ra dulu ja'a dènge dhari re li'u tembok kota. Hèia gubernur kèpe nare boe ja'a. De sanèd'e, ladhe ja'a mesa-mesa ku, tatu bisa boe, si?^g