Paulus siri iisi na, lula sasab'a-la'a na hia Kristus
10
Ja'a, Paulus, ka dhu suri sasuri ne. Tatu abhu nèti miu dhu pangee, na, ladhe ja'a sama-sama dènge miu, ja'a makae padhai lii paled'a. Te ngaa ladhe miu dènge boe ja'a, na, ja'a bani padhai lii dhu pa'abhe boe. Sèmi èèna ka, si? Aa te ngaa, ja'a dhu pasanèd'e le miu, na, Kristus ne dhu lii mako dènge d'ara hua iia mi dedha miu. 2 Te ngaa abhu cahag'e nèti miu dhu ro'o boe nanene lii ja'a. Rèngu peka, tatao ji'i beda boe dènge tatao dhèu leo ètu rai-haha ne. De ladhe ja'a dhiu, ele boe ja'a padhai lii dènge rèngu pake boe pa'abhe. Nèti èèna ka, ja'a peka mema dènge miu aa'i-aa'i mi, sèna ka ladhe ja'a d'ai èèna, ja'a tao heka lii taka dènge rèngu. 3 Masi ka èdhi se dhèu rai-haha, te ngaa ladhe èdhi pab'ala lii dènge dhèu leo, èdhi pakadhii boe, sèmi dhèu ètu rai-haha ne dhu tadhe boe Ama Lamatua. 4 Ladhe èdhi patao dènge dhèu, baku bhèlu, te rèka èdhi sama boe dènge rèka dhèu rai-haha ne. Aa ladhe èdhi patao dènge dhèu kètu hadhu, na, èdhi unu koasa Lamatua, dhu bisa palaho ngangee rèngu. 5 Koasa Lamatua bisa palaho aa'i ngangee dènge tatao dhu palab'a dènge Lamatua, dhu tao dhèu ho ro'o boe tadhe Lamatua. Koasa Nèngu kahèi bisa pad'elo j'ara, ho gati j'ara ngangee èdhi dhu dhui, dènge j'ara ngangee dhu hiu. Dènge j'ara ne'e, èdhi bisa pangee madhutu a'aj'a Kristus.a 6 Ae ka nèti miu mulai d'èi nanene Kristus, aa tao madhutu dad'èi Na aa'i-aa'i. Te ngaa abhu cahag'e nèti miu dhu ro'o boe nanene Ne. De ji'i dhu pa'èra le ho huku si.7 Miu d'èi laladhe ngaa dhu ladhe mèdhi ètu li'u di. Te ngaa miu hud'i ladhe ku d'ara dhèu. De ladhe dhèu pangee, na, nèngu dhèu pajuu-paleha Kristus, sanèd'e paie-iie, te ji'i se dhèu pajuu-paleha Kristus kahèi, sèmi nèngu. 8 Ele boe miu pangee, na, ja'a padhai lii ae risi eele lula-nèti koasa dhu ji'i abhu nèti Lamatua. Sèmi èèna ka, si? Aad'o! Te Lamatua hia koasa èèna ho pa'èra miu, aa pa'ele iie boe miu. De ja'a soro tèke eele boe dhèu dhu pamakae ja'a, lula rèngu pa'ele iie sasab'a-la'a ja'a. 9 Ja'a neo boe pamadha'u miu dènge sasuri ja'a sèra. 10 Te ngaa dhèu sèra peka, na, “Baku pusi-pahae dènge Paulus. Te masi ka isi sasuri na bia dènge sakaa, te ngaa ladhe patoo madha, nèngu roe aala-aala, aa lii padhai dhu dènge boe koasa.” 11 Te ngaa sèna ka dhèu dhu padhai lii omo koso sèra re'a, na, ngaa dhu ji'i suri ètu d'ara sasuri nèti kaj'èu, beda boe dènge ngaa dhu ji'i peka-padhai, ladhe ji'i ètu talora aae miu.
12 Dhèu sèra sa d'èi padedha iisi, peka na, rèngu ka dhèu pajuu-paleha dhu kapai nèti Kristus. Ji'i bani boe pasoro ngi'u ji'i dènge dhèu sèmi sèra. Me'a, sina ma? Ele boe ji'i se èra boe sama sèmi rèngu! Dhèu sèmi sèra sa, dhodhoka tenge dhèu dhu sama sèmi rèngu di. Sèna ka rèngu pa'èra èci dènge èci, lula rèngu se ca ropa! Gagoa ra sèmi èèna ka! 13 Aa te ngaa ji'i padedha boe iisi, ladhe dènge boe kolo-kapua na. Ji'i dhoka padhai lii sèmi èèna lula-nèti sasab'a dhu Lamatua pangèd'u mi ji'i. Ngaa dhu ji'i tao hia miu sèra, dhoka tao madhutu ngaa dhu Lamatua pua ji'i sab'a. Te ji'i sab'a boe dhu leo nèti èèna. 14 Dhu lèke ka, ji'i se padhai lii karisi boe, lod'o ji'i koa-kad'iri miu. Te ji'i ka dhu mai lole Lii Lolo Be'a Kristus hia miu. Ka miu sèmi mere lii padhai ji'i kahèi. Ladhe Lamatua pua boe ji'i, te ngaa ji'i koa-kad'iri miu, na, èèna mema lèke boe. 15 Ladhe dhèu leo ka dhu sab'a, na, ji'i padedha boe iisi, peka na, èèna rui-j'aj'èra ji'i na. Te madhutu mola-mola na, parcaya miu hud'i asa tabha èra. Dènge j'ara ne'e, rui-j'aj'èra ji'i ètu dedha miu karèi nèti uru ka asa tabha taruu. 16 Hèia ji'i bisa la'a peka-padhai Lii Lolo Be'a Kristus asa era-era dhu pakaj'èu nèti era miu, dhu abhu mèka dhèu sab'a ètu era sèra. Dènge j'ara ne'e, sasab'a ji'i patogo boe dènge sasab'a dhèu dhu ra pakako le ètu èèna.
17 Te abhu ètu d'ara Sasuri Mola-Mèci Ama Lamatua, dhu suri, na, “Ladhe dhèu neo padedha iisi, na, hud'i padedha iisi dhoka lula-nèti Kètu èdhi, Ama Lamatua di.”b 18 Ladhe abhu ca dhèu dhu padhai lii dedha lula-nèti mamuri nèngu unu na, èèna sasoa na hèb'a-hua. Te ngaa ladhe Lamatua ka dhu koa-kad'iri dhèu ne'e, heka lèke kèna!