Doi bantuan hia dhèu Kristen ètu Yerusalem
9
Dhu lèke, ja'a parluu heka suri hia miu, ho manèngi miu soru-bara dhèu parcaya unu Lamatua. 2 Te ja'a ke'a le, miu d'èi titu kèna soru-bara dhèu sèmi sèra. Ja'a d'èi palolo dènge dhèu parcaya ètu Makedonia kahèi, lula-nèti babe'a d'ara miu. Ja'a palolo le, peka na, miu nèti propensi Akaya dhu pa'èra le karèi nèti ranga-jahi ni, ho pa'adhu doi bantuan. Ja'a lolo le kahèi, lula-nèti maj'èni miu ka dhu pamako dhèu leo, ho soru-bara dhèu-dhèu susa. 3 Ka ja'a pua le a'ari èdhi, sèna ka ra pad'elo, na, ngaa dhu ji'i palolo lula-nèti miu se, leko-monya boe. Ja'a peka sèmi èèna, sèna ka miu pa'èra mema. 4 Te ladhe abhu dhèu Makedonia mai palere dènge ja'a, aa miu dhae pa'èra mèka, na, èdhi ta'e makae. Mage dhoka lalèka ja'a mi dedha miu dènge boe kolo-kapua. 5 Nèti èèna ka, ja'a pangee, na, be'a risi ladhe a'ari èdhi dhiu uuru asa miu, sèna ka miu aa'i-aa'i mi bisa ator uuru ku doi bantuan sèra, madhutu lii pamoa miu uru èèna. Miu hud'i hia nèti babe'a d'ara miu, baku hia dènge d'ara cabèka.6 Dhu mola-mola, sèmi ne'e ka: “Dhèu dhu sèle hini ciki, èèna na abhu hua-hela ciki kahèi. Aa dhèu dhu sèle hini pa'ae-ae, èèna na abhu hari hua-hela ae-ae kahèi.” 7 Ca dhèu-dhèu ka hud'i pama'ète unu na, nèngu neo hia ca ngaa. Baku hia dènge d'ara cabèka. Baku hia lula dhèu laka-seti. Te Ama Lamatua sue dhèu dhu hia dènge d'ara karej'e. 8 Lamatua bisa hia miu mèngi-nale rupa-rupa. Nèngu bisa hia miu ae risi eele kahèi, sèna ka miu baku kura ngaa-ngaa. Te ladhe miu parluu, èèna na miu abhu risi nèti dhu miu parluu. Dènge j'ara ne, miu bisa papala dhu karisi, sèna ka soru-bara sasab'a aa'i-aa'i dhu nèti babe'a. 9 Dhu suri tèke ètu d'ara Sasuri Mola-Mèci Ama Lamatua, na,
“Ama Lamatua d'èi pala-bagi hia dhèu unu aad'o,
nèti d'ara hua iia Na.
Nèngu tao dhu lèke taruu,
te d'ara mola Na èèna, taha taruu.”a
10 Lamatua ka dhu hia hini, sèna ka dhèu sab'a sèle oka-tedhe. Lamatua ka dhu hia nganga'a, sèna ka èdhi ta'a. Lamatua èèna kahèi, ka dhu hia miu mèngi-nale, ho miu bisa tao dhu lèke. Èèna sama sèmi miu dhèu sab'a oka-tedhe, hèia Lamatua hia miu hini, ho miu sèle. Aa hua-hela dhu miu abhu sèra, Lamatua hia hari ae-ae, nèti ca lod'o asa ca lod'o.b 11 Te Lamatua neo pala-bagi hia miu risi nèti dhu miu parluu, sèna ka miu bisa soru-bara dhèu leo, dènge d'ara be'a miu. De ladhe miu soru-bara le dhèu leo, tatu dhèu se manèngi makasi mi Ama Lamatua. 12 Te bantuan dhu miu hia mi dhèu unu Lamatua ètu nèi, tatu pasamaa si. Aa dènge j'ara ne'e kahèi, miu manèngi makasi mi Lamatua. 13 Te lod'o miu soru-bara dhèu leo sèra, èèna j'aj'i mi tadha dhu peka na, miu parcaya tare'a-re'a. J'ara ne'e kahèi tao dhèu leo sèra koa-kio Ama Lamatua. Te rèngu bisa rèdhi dènge re'a, na, parcaya miu mi Lii Lolo Be'a Kristus leko-monya boe. Èèna, lula miu tao madhutu lalèka miu. Hèia ropa miu hia bantuan dènge d'ara kateme mi rèngu, aa hia mi dhèu leo kahèi, na, èèna ka dhu tao rèngu koa-kio kolongara Ama Lamatua.
14 Aa dhèu dhu sèmi rare bantuan nèti miu sèra, èèna na ra sabaj'a hia miu. Rèngu neo rèdhi miu kahèi, lula Ama Lamatua dhu pad'elo le d'ara hua iia Na ae-ae mi dedha miu. 15 Te ngaa Ama Lamatua ka dhu hia iia èdhi Hadia èci dhu be'a titu kèna, nuka Yesus! Kab'ua Na risi aa'i ngaa-ngaa! Nèti èèna ka, èdhi aa'i-aa'i ti sama-sama peka dènge Ama Lamatua, na, “Makasi!”