Rèngu hia sumbangan dènge d'ara mola
8
A'ari pasue aa'i-aa'i! Dad'èi ji'i ka ladhe miu me'a mèu d'ara hua iia Ama Lamatua, dhu Na pad'elo mi dedha juma'at-juma'at ètu propensi Makedonia. 2 Te masi ka rèngu abhu susa ae-ae, te ngaa d'ara rèngu karej'e taruu. Nèti èèna ka, masi ka rèngu unu boe ngaa-ngaa, te ngaa ra hia doi ae-ae dènge d'ara mola-mèci, ho soru-bara dhèu parcaya dhu abhu sasusa. 3 Ja'a bisa lole kahèi, na, dhu rèngu hia sèra, hia aa'i nèti dhu rèngu bisa hia. Aa ra hia risi nèti sèra sa kahèi. Abhu boe dhèu dhu laka-seti si. 4 Rèngu mesa ra ka dhu tare'a-re'a manèngi, sèna ka ji'i bhoke j'ara hia si. Dènge j'ara ne'e, rèngu bisa abhu bagian ho soru-bara dhèu dhu abhu susa ètu Yerusalem.a 5 Uru èèna, ji'i sanao sèna ka ra tao sèmi ne'e, te ngaa dhu ra tao èèna, risi nèti dhu ji'i sanao! Dhu uru j'ara, rèngu hia mamuri ra asa Ama Lamatua. Hèia ra peka kahèi, na, “Ji'i neo soro mamuri ji'i, sèna ka lalau-lalo'o miu, lula èèna ka dhu madhutu dad'èi Lamatua.”6 Lula conto nèti juma'at-juma'at ètu Makedonia sèmi èèna, nèti èèna ka ji'i manèngi Titus lèpa hari asa miu ètu Korintus, sèna ka miu soru-bara kahèi dhèu unu Lamatua dhu abhu sasusa ètu Yerusalem. Te uru èèna, nèngu ka dhu mulai pakaboko doi-dhari ho hia si. Hèia limuri ne, ji'i manèngi sèna ka nèngu bisa tao pamèci sasab'a-la'a miu ho soru-bara dhèu.b 7 Sasab'a miu hia Ama Lamatua èèna, be'a titu kèna. Conto sèmi: parcaya miu èra, lii padhai miu be'a; miu me'a ae j'ara-j'ara Lamatua; miu sab'a dènge maj'èni; aa miu sue ji'i d'ai seli. Nèti èèna ka, ja'a neo ho miu soru-bara kahèi dhèu unu Lamatua dhu abhu sasusa, dènge j'ara hia si doi ae-ae.
8 Ja'a paredha boe miu ètu Korintus, sèna ka hia si doi ae-ae, te ngaa ja'a neo cob'a miu. Te juma'at-juma'at ètu Makedonia neo le soru-bara dhèu sèra. De dènge j'ara ne'e miu bisa pad'elo, na, miu tare'a-re'a sue dhèu dhu ètu d'ara sasusa kahèi. 9 Te miu me'a, na, Kètu èdhi, Yesus Kristus pad'elo le d'ara hua iia Na mi miu. Mema Nèngu kaja. Te ngaa Na pama'ète nare ho tao iisi Na j'aj'i dhèu unu boe ngaa-ngaa sèna ka soru-bara miu, ho miu j'aj'i kaja ètu madha j'ara ae-ae.
10 Ranga-jahi na, miu mulai pakaboko le doi ho hia rèngu. Mesa boe miu hia doi-dhari di, te ngaa miu soru-bara nèti d'ara miu kahèi. De madhutu a'abhu ja'a, miu hud'i tao ku sèmi ne'e: 11 Uru èèna, miu pama'ète mere le neo soru-bara dhèu unu Lamatua dhu abhu sasusa ètu Yerusalem nèi. De ja'a manèngi sèna ka ngaa dhu miu dhae pakaboko mere mèka, na, pa'oru aa'i si ho hia ka. Aa ca ngaa dhu miu bisa hia, na, hia laa. Dhu lèke ka, hia dènge d'ara kateme. 12 Te ladhe èdhi hia dènge d'ara kateme madhutu ngaa dhu èdhi bisa hia, èèna be'a kèna. Sad'i madhutu dad'èi èdhi. Te dhèu baku hia ngaa-ngaa dhu pabia nèngu, lula laka-seti nèti dhèu leo.
13 Ja'a d'èi boe pabia miu, sèna ka dhèu leo abhu samaa. Te dad'èi ja'a ka, èdhi aa'i-aa'i ti tago sama-sama sasusa dhèu se'e. 14 Te limuri ne, miu dhu unu risi, aa rèngu dhu unu ciki. Lod'o limuri, rèngu bisa b'ala kahèi, ladhe miu dhu unu ciki. Dènge j'ara ne'e, èdhi bisa tago sama-sama. 15 Èèna nuka sèmi dhu suri tèke ètu d'ara Sasuri Mola-Mèci Lamatua, na,
“Dhèu dhu abhu ae,
risi boe nèti ngaa dhu rèngu parluu.
Aa dhèu dhu abhu ciki,
kura boe nèti ngaa dhu rèngu parluu.”c
Titus, dènge dhèu leo dhu neo rèti bantuan
16 Ja'a manèngi makasi mi Ama Lamatua, lula Nèngu ka dhu pamako Titus, sèna ka neo soru-bara miu, sama sèmi ja'a neo soru-bara miu. 17 Mema ji'i manèngi sèna ka nèngu dhiu ngad'o miu. Aa te ngaa, èèna madhutu dad'èi nèngu mesa na. Nèti èèna ka, nèngu mesa na neo dhiu soru-bara miu, nèti boe lii manèngi ja'a. 18 Te ngaa nèngu dhiu boe mesa na. Te ji'i pua le a'ari ji'i ca dhèu, ho kako palere dènge ne. Juma'at aa'i-aa'i ètu ne'e tadhe mèu dhèu ne, lula nèngu sab'a bia ho peka-padhai dènge dhèu Lii Lolo Be'a Lamatua. 19 Kètu juma'at se dhu pili ne kahèi, ho palere-lere dènge ji'i, sèna ka soru-bara ji'i ètu d'ara sasab'a-la'a ji'i dhu hua iia ne. Ji'i pakako sasab'a ne, sèna ka pad'elo dadedha Lamatua èdhi, aa tao dhu be'a hia dhèu susa sèra ètu Yerusalem.
20 Ji'i tenge j'ara sèna ka tao dhu lèke, ho baku abhu dhèu dhu pasala ji'i, peka na, ji'i sab'a lèke boe lod'o ji'i ngèti doi sèra papala mi dhèu dhu parluu. 21 Te ji'i pangee paie-iie, sèna ka tao dhu lèke nèti d'ara dhu mola-mèci ètu madha Ama Lamatua, aa ètu madha dhèu ae kahèi.d
22 Abhu a'ari èci hari dhu ji'i pua dhiu palere dènge Titus si, ho rèti doi sèra. Ji'i ladhe paie-iie le mamuri nèngu. Aa ji'i nge'a, na, nèngu neo sab'a bia hia miu kahèi. Dhèu ne maj'èni, lula ne'a le, na, miu tao dhu lèke.
23 Ladhe dhèu karèi miu lula-nèti Titus, peka mi rèngu, na, Titus èèna a'ari ja'a dhu sab'a taruu dènge ja'a hia miu. Dhèu parcaya ètu era leo kahèi hag'e rare le dhèu rèngu, sèna ka rèngu kahèi rèti doi sèra asa Yerusalem. Rèngu pakaboko le ho neo dhiu. Titus sama-sama dènge rèngu kahèi. Rèngu aa'i-aa'i ra pad'elo dadedha Kristus sèmi èèna. 24 De miu hud'i pad'elo sasue miu mi dhèu dhu rèti doi sèra. Aa pad'elo dènge ra, tasamia ka ji'i koa-kad'iri miu. Dènge j'ara èèna, dhèu-dhèu parcaya nèti juma'at ètu mia-mia re'a, na, miu sue rèngu.