2 A'ari aa'i-aa'i! Hia ji'i tebho. Bhoke d'ara miu ho sèmi mere ji'i dènge be'a. Baku soro kabodho mi ji'i. Te uru èèna, lod'o ji'i ètu talora aae miu, ji'i tao ngèdhi boe sala ngaa-ngaa mi dhèu èci sa. Ji'i dadugu ngèdhi mèka dhèu ho ad'u-ue sasala. Ji'i kapod'e-kabèli ngèdhi mèka dhèu, sèna ka abhu oto nèti rèngu kahèi. 3 Lii padhai ja'a ne, neo boe pèci sasala asa dedha miu. Te ja'a dhu peka le, na, ji'i sue miu. De tasa mera mia èèna ka, ji'i se dhu pa'èki dènge miu, masi ka ji'i madhe do mamuri. 4 Ne'e ne ja'a parluu heka pangee ae-ae, te ja'a lèka miu. Ja'a koa miu, aa miu pa'èra d'ara ja'a kahèi. De masi ka ji'i abhu susa rupa-rupa, te ngaa d'ara ja'a karej'e-karae taruu, lula miu.

5 Uru èèna, lod'o ji'i dhiu asa propensi Makedonia, ngi'u ji'i roe-bhilu. Te ji'i abhu susa nèti g'ana-kariu. Ji'i pab'ala d'ara lii dènge dhèu dhu parcaya boe. D'ara ji'i madha'u kahèi.^a 6 Te ngaa Ama Lamatua ka dhu pa'èra dhèu dhu ele ngangee. Hèia Nèngu pa'èra d'ara ji'i, ropa Na pua Titus mai dènge ji'i. 7 Nèti mamai Titus ne'e ka d'ara ji'i èra hari. Te nèngu peka na, lod'o nèngu ètu nèi era, miu dhu pa'èra d'ara na. Lii lolo nèngu ne'e ka, pa'èra d'ara ji'i. Nèngu lolo kahèi, na, miu neo titu kèna mèdhi rèhu ja'a, aa miu manyasa kahèi lula lii langu dhu uru èèna j'aj'i ètu talora aae miu. Aa Titus peka kahèi, na, miu tenge j'ara ho soru-bara ja'a. Nèti èèna ka, d'ara ja'a karej'e-karae.^b

8 Ja'a ke'a, na, isi sasuri ja'a uru èèna dhu pasanèd'e miu dènge lii sakaa, èèna ka dhu papèd'a d'ara miu. Te ngaa ja'a manyasa boe ja'a suri sasuri èèna. (Aa te ngaa lod'o èèna ja'a ako manyasa, ropa ke'a, na, nèti sasuri ja'a ka d'ara miu pèd'a, masi ka nare boe nèbhu.) 9 Te ngaa limuri ne, d'ara ja'a karej'e. Ja'a karej'e boe lula uru èèna miu ètu d'ara susa. Aad'o! Ja'a karej'e lula lod'o èèna, sasuri ja'a dhu pamako miu sèna ka ele-ho'a. Hèia miu mangaku sasala miu, aa tèke eele j'ara-j'ara dhu karehe, sèna ka kabèli hari ho madhutu j'ara mamuri mola nèti Lamatua. Te Lamatua ka dhu tao miu manyasa. J'ara ne, nèti boe ji'i dhu tao miu j'aj'i maruru. 10 Te ladhe èdhi manyasa ètu d'ara èdhi, madhutu dad'èi Lamatua, na, èdhi ae eele nèti tao j'ara dhu bhèlu, hèia lèpa hari madhutu j'ara mamuri dhu mola. Ne'e ne ka dhu pakaj'èu èdhi nèti hahuku Ama Lamatua, ka èdhi mamuri heka dènge d'ara manyasa taruu. Te ngaa ladhe èdhi dhoka manyasa ètu hèb'a di, sama sèmi dhèu ètu rai-haha ne, èèna na èdhi cèri eele nèti Ama Lamatua.

11 Miu pangee sèku! Lod'o miu baca sasuri ja'a, ja'a ke'a na, miu manyasa kahèi. Èèna palèke dènge dad'èi Lamatua. Ne'e ne ka pa'èra miu ho miu core eele bhabhèlu nèti mamuri miu. Miu roe-bhilu le ètu d'ara bhabhelu miu. Miu madha'u kahèi, mage dhoka manahu hari asa d'ara bhabhelu-katub'a. Miu neo mèdhi ja'a, aa pa'èra taruu ho tao j'ara be'a. Miu pa'èra kahèi ho neo huku dhèu dhu ad'u-ue sasala. Lula miu tao j'ara dhu lèke sèmi èèna, nèti èèna ka miu mola-mèci. Dènge j'ara ne'e, abhu boe dhu bisa pèci sasala asa miu. 12 De sasuri ja'a uru èèna, hia boe mi dhèu dhu tao bhabhelu, do, mi dhèu dhu lèke j'aj'èra nèti bhabhelu na. Te ngaa ja'a suri sasuri èèna hia miu, sèna ka ja'a pad'elo, na, lii padhai miu ètu madha Lamatua èèna tare'a-re'a. Aa miu tare'a-re'a sue ji'i. 13 Se'e se aa'i-aa'i ra pa'èra d'ara ja'a.

Miu pa'èra d'ara Titus kahèi, sèna ka d'ara na bisa mera-milu. Sèra sa, asa pakarej'e d'ara ji'i. 14 Ja'a koa-kad'iri miu ètu madha Titus, lula tatao miu dhu be'a. Ja'a peka kahèi dènge ne, na, miu pamakae mèdhi mèka ja'a. Te j'ara aa'i-aa'i dhu ji'i lolo ngèdhi dènge miu sèra lèke tare'a. Aa j'ara aa'i-aa'i dhu ji'i lolo dènge Titus lula-nèti miu lèke tare'a kahèi. 15 De lod'o-lod'o na ngee nèdhi tatao dènge lii padhai miu, sasue na mi dedha miu asa tabha. Aa nèngu sanèd'e kahèi ropa na dhiu asa miu, ka miu sèmi mere ne dènge be'a, te ngaa isi sasuri ja'a j'aj'i ngangee mi miu. 16 D'ara ja'a karej'e-karae, lula ja'a bisa parcaya miu ètu madha j'ara aa'i-aa'i ra. De d'ara ja'a kabèdhi heka dènge miu!