Lamatua tao dhu hua iia hia èdhi
6
Lula ji'i sab'a sama-sama dènge Lamatua, ji'i pasanèd'e miu sèmi ne'e: Ama Lamatua pad'elo le d'ara hua iia Na ae-ae mi dedha miu. De miu baku sèmi mere d'ara hua iia Na iia-iia d'ara. 2 Te ètu d'ara Sasuri Mola-Mèci Na dhu suri tèke, peka na,“Ropa d'ai ka lod'o na, Ja'a nanene lii èu.
Ja'a soru-bara èu kahèi, ropa Ja'a pala-bagi mamuri mi dhèu.”
De nanene pabe'a-be'a! Ne'e ne, d'ai lod'o dhu hua iia èèna kèna. Te ne'e ne, d'ai lod'o Lamatua kèna ho pala-bagi mamuri mi dhèu.a
3 Nèti èèna ka, ji'i j'aga mamuri ji'i pabe'a-be'a sèna ka mamuri mola. Te ji'i ngo'o boe bhabhae dhèu dhu neo mai asa j'ara mamuri Lamatua. Aa ji'i neo padhai mola-mola kahèi, sèna ka dhèu baku pa'ele iie kolongara ji'i. 4 Aa aa'i-aa'i dhu ji'i sab'a, ji'i tenge j'ara ho pad'elo, na, ji'i dhèu sab'a dhu be'a nèti Ama Lamatua. De masi ka ji'i abhu susa, do paraga dènge j'aj'èra, do mamuri ètu d'ara talora aae patao-palaha, ji'i taha taruu. 5 Ji'i taha kahèi ètu d'ara lod'o dhèu gama ji'i, lod'o ra pamaso ji'i asa d'ara bèdho, lod'o ra patao-palaha, lod'o ji'i sab'a bia, lod'o ji'i abhu boe pasaruru musi madha, aa lod'o ji'i manganga.b 6 Ji'i taha dènge d'ara mola kahèi. Ji'i nge'a ae lula-nèti Ama Lamatua. Ji'i taha dènge d'ara taleo. Ji'i tao dhu be'a hia dhèu. Ji'i soro tèke Roh Lamatua ator ji'i. Sasue ji'i mola-mola mi dedha dhèu. 7 Ladhe ji'i padhai lii, ji'i padhai dhu lèke, dhu nge'a boe monya. Ji'i sèmi ngare koasa nèti Lamatua kahèi, sèna ka tao dhu be'a. Ji'i nuka sèmi sordad'u dhu ngèd'u rèka dhu tesa nèti Lamatua, sèna ka lab'a musu, aa segi taruu. 8 Ji'i taha kahèi masi ka dhèu pakab'ua, do pahahe ji'i; masi ka dhèu padhai lii pamanahu ji'i, do ra j'aga kolongara ji'i; masi ka dhèu monya, peka na, ji'i kapod'e-kabèli dhèu, do ra peka na, ji'i padhai lii dhu lèke. 9 Abhu dhu tadhe boe ji'i, te ngaa abhu dhèu ae kahèi dhu re'a ngara ji'i. Pèri-pèri hari kèna, ji'i se oe madhe, te ngaa ji'i mamuri era. Dhèu huku ji'i bia pèri-pèri hari kèna, te ngaa ji'i madhe boe. 10 Masi ka ji'i rasa bia, te ngaa ji'i karej'e-karae taruu kahèi. Masi ka ji'i dènge boe doi-dhari, te ngaa ji'i tao dhèu ae j'aj'i kaja ètu d'ara ra. Èèna nuka sèmi ji'i unu boe ngaa-ngaa, te ngaa ji'i unu aa'i mèu-mèu kahèi.
11 Ji'i padhai lii paled'a-led'a hia miu dhu ètu kota Korintus ne. Aa ji'i sue miu tare'a-re'a. 12 Ji'i pad'elo le sasue ji'i mi dedha miu dènge d'ara kateme. Te ngaa sasue miu mi ji'i kura, lula dènge boe d'ara kateme. 13 De ja'a neo holo miu nuka sèmi holo ana-ana ja'a. Be'a risi miu sue ji'i dènge d'ara kateme.
Baku pakadheb'e dènge dhèu dhu parcaya boe Lamatua
14 Baku pakadheb'e dènge dhèu dhu parcaya boe Kristus. Te miu sama boe dènge rèngu. Dhèu parcaya dhu mamuri mola, sama boe dènge dhèu dhu lab'a Lamatua, de nia boe ladhe ra tenge j'ara ho sab'a pa'èci. Dhèu be'a dènge dhèu be'a boe, pantas boe pa'èci. Èèna nuka sèmi saraa bisa boe pa'èci dènge maroga. 15 Kristus bisa boe d'ara èci dènge dhèu aae nidhu, si?c Sèmi èèna kahèi, dhèu dhu parcaya Ama Lamatua abhu pusaka, te ngaa dhèu dhu parcaya boe abhu boe pala.
16 De a'abhu miu, sa mia? Ele boe miu pangee, na, miu bisa lami asa d'ara èmu sabaj'a Ama Lamatua sèna ka pahaha iisi mi Nèngu, èle na lami sogo-tagu hari asa èmu sogo-tagu nidhu, do? Bisa boe, si? Te Lamatua èèna, Ama Lamatua dhu mamuri. Nèngu j'aj'i Kètu èdhi kahèi. Ka èdhi j'aj'i le sama sèmi èmu sabaj'a Na, lula Nèngu pea ètu d'ara èdhi. Te Lamatua suri tèke ètu d'ara Sasuri Mola-Mèci Na, peka na,
“Èmu Ja'a ètu talora aae dhèu-dhèu Ja'a.
Ja'a laku-mai nèti talora aae rèngu kahèi.
Ja'a neo j'aj'i Ama Lamatua rèngu.
Rèngu j'aj'i dhèu unu Ja'a kahèi.”d
17 Nèti èèna ka, Lamatua suri sèmi ne'e kahèi, na,
“Miu hud'i kalua nèti talora aae rèngu, aa pacèri nèti rèngu,
sèna ka miu baku j'aj'i sama sèmi rèngu.
D'ara miu hud'i mola-mèci.
Aa miu hud'i pakaj'èu nèti aa'i-aa'i dhu pakaj'alu d'ara miu,
dènge sèmi èèna, Ja'a sèmi kore miu dènge be'a.e
18 Ja'a neo j'aj'i Ama miu;
aa miu j'aj'i ana-ana Ja'a.
Se'e se ka dhu Kètu èdhi peka tèke,
Nèngu ka dhu unu Koasa Risi Aa'i.”f