5
Te èdhi te'a, na, ngi'u aae ne, èdhi pake taha ètu rai-haha di, nuka sèmi paleo dhu èdhi patitu taha. Masi ka ngi'u aae èdhi ele iie, te ngaa èdhi baku pangee, lula Ama Lamatua dhu sadia tèke le era dhu be'a èci hia èdhi ètu sorga. Era ne'e, j'aj'i boe nèti pa'ue-ai dhèu rai-haha, te ngaa j'aj'i nèti pa'ue-ai Lamatua. Nèti èèna ka, era ne'e taha taruu. 2 Te ngi'u aae èdhi ne roe-bhilu ètu rai-haha ne. Ka èdhi neo titu kèna abhu ngi'u hiu dhu èdhi pake ètu sorga. 3 Hèia ropa èdhi d'ai era nèi, èdhi sama boe sèmi dhèu dhu dènge boe mèdha-papake ètu ngi'u, te ngaa pake mèdha hiu ètu ua èdhi.a Te èdhi j'aj'i boe samanga di, te ngaa ètu nèi èdhi abhu ngi'u hiu kahèi. 4 Ngi'u aae èdhi dhu ele iie ne, tao èdhi mangeta, lula rasa j'èra. Masi ka sèmi èèna, to'o boe madhe, ho tèke eele ngi'u aae ne. Aad'o! Èdhi neo abhu ngi'u dhu hiu, sèna ka tèke eele ngi'u dhui, gati dènge mamuri hiu dhu lèke. 5 Ama Lamatua ne'e ka dhu pa'èra èdhi ho sèmi tare mamuri dhu hiu. Nèngu kahèi bagi hia èdhi Roh Na, sèna ka j'aj'i mi tadha nèti Lii Pajaji Na.6 Nèti èèna ka, èdhi taha dènge d'ara èra taruu. Èdhi te'a, na, lod'o èdhi mamuri era ètu d'ara ngi'u aae ne'e ne, èdhi pakaj'èu nèti Lamatua. 7 Nèti èèna ka èdhi mamuri dènge parcaya mi Ama Lamatua. Èdhi mamuri boe dènge ngaa dhu èdhi ladhe tèdhi ètu rai-haha ne di. 8 Te ngaa èdhi te'a tare'a-re'a kahèi, na, ladhe èdhi madhe tèke eele ngi'u aae ne, ho lati mamuri sama-sama dènge Ama Lamatua ètu sorga, na, tatu èdhi karej'e risi eele hari. 9 Masi ka èdhi mamuri taruu ètu rai-haha ne, do madhe ètu ne'e sèna ka mamuri ètu nèi, te ngaa dhu lèke ka, èdhi hud'i pakarej'e ku d'ara Lamatua. Te dad'èi èdhi kèna. 10 Baku bhèlu. Bèli-camèd'a dhèu aa'i-aa'i hud'i lasi paraga dènge Kristus. Nèngu ne'e ka dhu Pama'ète Lii Langu madhutu tatao dhèu aa'i-aa'i dhu mamuri ètu rai-haha. Hèia Kristus b'ala dhu pamèci dènge tatao dhu dhèu ad'u-ue. Te Kristus ne'a, dhèu ne tao be'a do tao dhu karehe.b
Èdhi pabe'a dènge Ama Lamatua, lula Kristus
11 Lula ji'i nge'a, na, bèli-camèd'a Kristus parisa mamuri ji'i, nèti èèna ka ji'i hud'i madha'u, aa pakab'ua Ne. Ka ji'i sab'a pa'èra-èra ho pamako dhèu, sèna ka ra parcaya Kristus. Ama Lamatua dhu ne'a d'ara mola ji'i. Ja'a d'èi kahèi, ladhe miu me'a d'ara mola ji'i se. 12 Ji'i padedha boe iisi ji'i ètu madha miu. Aad'o! Te ngaa ji'i dhoka hia miu j'ara dhu be'a, sèna ka miu bisa pakab'ua ji'i dhu dènge boe makae. Dènge j'ara sèmi èèna, miu bisa dhaa lii dhèu dhu hèb'a aae. Te rèngu dhèu dhu koa iisi lula sasab'a-la'a rèngu dhu dhèu ladhe rèdhi, aa te ngaa d'ara rèngu mola boe. 13 Ladhe miu pangee, na, ji'i se huj'u, hèia ji'i padhai lii sèmi èèna ho pakako sasab'a Lamatua. Masi ka miu me'a boe, te ngaa Lamatua ne'a. Ladhe ji'i padhai lii pake ngangee dhu mola, na, ji'i padhai lii sèmi èèna, ho soru-bara miu.
14 Kristus sue èdhi titu kèna. Ne'e ne ka dhu pa'èra d'ara ji'i, ho pakako sasab'a-la'a ji'i. Te ji'i parcaya, na, Dhèu èci, nuka Kristus, madhe gati dhèu aa'i-aa'i. Sasoa na, èèna sama sèmi èdhi aa'i-aa'i ti madhe tèke eele mamuri dhui, aa dhu dènge heka hak ngaa-ngaa ètu rai-haha ne. 15 Kristus madhe pala dhèu aa'i-aa'i ra, sèna ka dhèu aa'i-aa'i dhu mamuri ètu rai-haha ne, mamuri heka madhutu dad'èi mesa ra. Te ngaa rèngu hud'i mamuri madhutu dad'èi Kristus, lula Nèngu madhe le gati rèngu, hèia Na mamuri hari.
16 De karèi nèti deo ne'e, èdhi baku nile dhèu madhutu dad'èi dhèu rai-haha. Masi ka uru èèna èdhi nile Kristus pake ngangee dhèu biasa. Te ngaa limuri ne, ji'i nile heka Nèngu sèmi èèna. 17 Nèti èèna ka, dhèu dhu pa'èki dènge Kristus j'aj'i le dhèu hiu, dhu unu mamuri hiu. Dhèu ne sèmi heka uru èèna, lula mamuri dhui na ele le. Te limuri ne, dhu hiu abhu le. 18 Aa'i-aa'i se, Ama Lamatua ka dhu tao. Nèngu ka dhu padame, sèna ka èdhi bisa pabe'a hari dènge Ne, lula Kristus saku eele le sasala-sasigo èdhi. Hèia Na pangèd'u èdhi sasab'a, ho èdhi pad'elo j'ara sèna ka dhèu leo kahèi bisa padame hari dènge Ama Lamatua.
19 Sanèd'e, te lod'o Kristus pea ètu rai-haha ne era, Ama Lamatua dhu pake Ne ho lere nèti dhèu padame hari dènge Ama Lamatua. De Nèngu ige heka sasala dhèu, ka rèngu dui heka hahuku nèti sasala. Hèia Na pua èdhi lati peka dènge dhèu, na, rèngu bisa pabe'a dènge Nèngu.
20 Te èdhi j'aj'i duta Kristus. De Ama Lamatua pake èdhi ho tèti dhèu mai, sèna ka padame dènge Ne. Lula ji'i j'aj'i duta Kristus, nèti èèna ka ji'i manèngi miu kahèi, na, “Lamatua d'èi titu kèna, ladhe miu pabe'a hari dènge Ne.” 21 Kristus mesa Na tao nèdhi boe sala. Te ngaa Ama Lamatua hia Ne pasae sasala-sasigo èdhi. Lamatua tao j'ara ne hia èdhi, lula mamadhe Kristus bhoke j'ara, sèna ka èdhi bisa mamuri dènge d'ara mola, sama sèmi Lamatua d'ara mola kahèi.