Mèdha kab'ua dhu tèke ètu d'ara èru rai
4
Ama Lamatua ka dhu pad'elo le rasa kasia Na mi dedha ji'i. Nèti èèna ka, Na pua le ji'i ho lole dènge dhèu lula-nèti Lii Pajaji Hiu Na. Nèti èèna ka, ji'i taha taruu, dhu nge'a boe roe. 2 De karèi nèti uru ka ji'i pama'ète ngare le, na: ji'i peka-padhai mola-mola, na, ji'i tao boe j'ara-j'ara bhabhelu-katub'a sama sèmi dhèu leo. Dhèu sèra tao pahuni-pahuni sèna ka dhèu baku ladhe rèdhi. Aa rèngu dhu re'a boe makae. Te ngaa ji'i ngo'o boe kapod'e dhèu. Ji'i kahèi padhai lii hèb'a hua boe lula Lii Holo-Nori Ama Lamatua, te ngaa ji'i aj'a-nori dènge mola-mola madhutu ngaa dhu lèke. Dènge j'ara ne'e, dhèu aa'i-aa'i bisa parisa unu ra lii padhai ji'i ètu madha Lamatua, aa nile unu ra, ji'i se dhèu sèmi ngaa sa. 3 Ladhe dhèu ro'o boe sèmi rare Lii Lolo Be'a Lamatua dhu ji'i aj'a sèra, rèngu laho kahèi, lula rèngu cèri eele nèti Ama Lamatua.4 Dhèu aae nidhu, nuka sèmi lamatua èci dhu dhèu lasi sogo-tagu. Na ad'u-ue pa'ele iie kahadhu dhèu cahag'e, ka d'ara dhèu se j'aj'i maroga kiu-kiu. Rèngu se dhèu dhu parcaya boe Ama Lamatua èdhi. Lula rèngu bèdhu, bisa boe ladhe rèdhi saraa nèti Ama Lamatua. Nèti èèna ka rèngu bisa boe re'a Lii Lolo Be'a lula-nèti Kristus. Rèngu re'a boe kahèi dadedha Kristus. Te Kristus ne, ca ropa dènge Ama Lamatua. 5 Ji'i padhai lii boe padedha iisi ji'i. Te ngaa ji'i padhai lii padedha Kètu èdhi, Yesus Kristus. Dhu ji'i padhai lula ngi'u ji'i dhodhoka sèmi ne'e di: nuka ji'i tao iisi ji'i nuka sèmi ana pua-paleha, sèna ka laladhe-leru miu lula ji'i j'aj'i dhèu unu Yesus. 6 Uru-uru sèra Ama Lamatua dhu peka nèdhi le, na, “Hud'i dènge ku saraa dhu heo ètu era maroga.” Hèia Na tao saraa Na ho pasaraa d'ara èdhi. Te Nèngu d'èi pala-bagi èdhi saraa Na. Sasoa na, ropa èdhi pangee lula-nèti Kristus, èdhi sanèd'e kahèi dadedha Ama Lamatua.a
7 Masi ka ji'i se dhèu rai-haha, te ngaa Lamatua hia mèdha dhu kab'ua ètu d'ara ji'i. Ne'e nuka sèmi dhèu èci tèke mèdha na dhu kab'ua ètu d'ara èru rai. Mèdha dhu kab'ua ne, nuka saraa Ama Lamatua. De dhu lèke ka, koasa dhu kapai dhu ji'i unu, mai boe nèti ji'i, te ngaa kapua na nèti Ama Lamatua. 8 De masi ka dhèu ènyi raruri ji'i ètu mia-mia, te ngaa ji'i taha taruu. Masi ka ji'i nge'a aa'i boe, te ngaa ji'i ele boe ngangee. 9 Masi ka dhèu paj'èra ji'i ae-ae, te ngaa Ama Lamatua pa'ana-lalu eele boe ji'i. Masi ka dhèu dhedhe ji'i, te ngaa rèngu bisa boe palaho ji'i. 10 Lula ji'i abhu j'aj'èra ae-ae, nèti èèna ka ladhe ji'i ètu mia, ji'i bisa lolo dènge dhèu, peka na, Yesus abhu j'aj'èra ae-ae kahèi, lod'o Na madhe. Te masi ka dhèu paj'èra ji'i rupa-rupa, te ngaa ji'i madhe boe. Ne'e ne pasanèd'e dhèu, peka na, Yesus mamuri taruu ètu d'ara ji'i. 11 Mema tare'a! Ae le mamuri ji'i dhu abhu j'aj'èra oe madhe, lula ji'i j'aj'i dhèu unu Yesus. Dènge j'ara ne'e, dhèu aa'i-aa'i bisa re'a, na, Yesus pala mamuri dhu lèke mi ji'i, masi ka bèli-camèd'a ji'i madhe. 12 De masi ka lèpa limuri ji'i madhe, te ngaa ji'i madha'u boe padhue-padhai lula-nèti Kristus. Te ji'i sadia madhe sèmi èèna, sèna ka miu abhu mamuri dhu lèke.
13 Ètu d'ara Sasuri Mola-Mèci Lamatua dhu suri, na, “Lula ja'a parcaya Lamatua, nèti èèna ka ja'a padhai lii.” Ngangee ji'i sama kahèi. Lula ji'i lèka Lamatua, nèti èèna ka ji'i hud'i lole ku dènge dhèu lula-nèti Yesus Kristus.b 14 Ji'i nge'a, na, Ama Lamatua ka dhu pamamuri hari Kètu èdhi, Yesus Kristus nèti mamadhe Na. Èèna na Nèngu kahèi ka dhu pamamuri hari èdhi, lula èdhi pa'èki dènge Yesus. Bèli-camèd'a Ama Lamatua patitu èdhi aa'i-aa'i ti ètu madha Na, sèna ka sèmi nare èdhi. 15 Lamatua tao j'ara se'e aa'i-aa'i, sèna ka soru-bara miu. Nèngu neo pad'elo d'ara hua iia Na kahèi mi dhèu dhu asa tabha ae. Èèna na lii manèngi makasi rèngu mi Lamatua asa tabha ae, aa ra mangaku dadedha Na kahèi.
Èdhi parcaya taruu Lamatua
16 Nèti èèna ka, èdhi taha taruu, aa ele boe ngangee. Masi ka ngi'u èdhi asa roe-bhilu, te ngaa Ama Lamatua asa pa'èra d'ara èdhi nèti ca lod'o asa ca lod'o. 17 Te madhutu ngangee èdhi, lod'o limuri ne èdhi dhu abhu sasusa rupa-rupa. Te ngaa èdhi hud'i sanèd'e ku, bèli-camèd'a Lamatua neo ded'e èdhi padedha-dedha. Nèti èèna ka èdhi hud'i te'a, na, ngaa dhu j'aj'i se'e dènge boe sasoa! 18 De èdhi hud'i ngee paie-iie ku mi j'ara-j'ara dhu tèdhi mèka. Baku pangee dhoka mi dhu ladhe tèdhi di. Te j'ara-j'ara dhu ladhe tèdhi, taha boe nare nèbhu. Te ngaa j'ara dhu tèdhi mèka sèra ka dhu taha taruu, aa dhu ma'ète boe.