Dhèu pa'oru doi sèna ka soru-bara dhèu unu Lamatua
16
Ne'e ne, ja'a suri hia miu lula-nèti doi dhu miu pakaboko hia dhèu unu Lamatua ètu Yerusalem. Ja'a peka le dènge dhèu parcaya ètu propensi Galati, j'ara tasamia rèngu hud'i pakaboko doi èèna. Miu hud'i tao sèmi èèna kahèi.a 2 Ladhe hari Migu, dhèu aa'i-aa'i hud'i pa'oru doi ciki nèti rui-j'aj'èra rèngu. Baku mate ja'a dhiu ku, heka miu parai-oru kèna. 3 De ladhe ja'a dhiu, miu paj'uj'u dhèu dhu miu lèka, sèna ka rèti doi soru-bara sèra asa dhèu unu Lamatua ètu Yerusalem. Pe ja'a suri sasuri ho patadha rèngu dènge kètu juma'at ètu nèi. 4 Aa ladhe miu ngee, na, be'a ladhe ja'a madhutu hèi, na, ji'i la'a palere.Paulus neo kako palème era
5 Ladhe ja'a kako palème le propensi Makedonia, ja'a heka dhiu asa miu kèna. De mo'o do mo'o boe, ja'a hud'i laku uuru ku asa Makedonia.b 6 Èle èèna, pe ja'a dhiu pea taha dènge miu ako panèbhu ciki; ele boe d'ai èle hèru pacuhi. Hèia miu bisa lere ja'a asa era leo hari. 7 A'abhu ja'a, na, ja'a dhiu ne ca lod'o boe di. Te ja'a neo pea dènge miu ako panèbhu, ladhe Lamatua d'èi. 8 Te ngaa ja'a neo pea era ètu kota Epesus ne, toke lod'o babe'a Pantekosta, [nuka lèmi nguru lod'o èle kalela Paska].c 9 Lula ètu ne'e ja'a abhu lod'o taleo ae, ho sab'a taruu, masi ka abhu dhèu ae dhu lab'a sasab'a Lamatua.d
10 Ladhe Timotius j'aj'i dhiu paraga dènge miu, sèmi mere ne dènge be'a, sèna ka baku na ngee rupa-rupa. Te nèngu ne dhèu sab'a nèti Kètu èdhi, Yesus Kristus, sama sèmi ja'a ne kahèi.e 11 Mage soro tèke dhèu laladhe ne dènge hui madha di. Soru-bara ne toke na lèpa asa ja'a dènge be'a. Te ja'a dènge a'ari dhu leo se, dhu mate tatae ne.
12 Ca j'ara era dhu miu hud'i me'a ku. Ja'a dhu pamako le angalai èdhi Apolos, ho na dhiu pangad'o dènge a'ari dhu leo. Te ngaa no'o mèka dhiu. De mi mate, pe na abhu lod'o taleo, heka na dhiu kèna.
Tao hari ku ca j'ara
13 Miu hud'i j'aga ngi'u miu paie-iie! Miu hud'i pa'èra-èra ho parcaya taruu Ama Lamatua! Mage madha'u! Pa'èra iisi! 14 Sad'i miu sab'a ngaa èèna ka, pad'elo la sasue.
15 A'ari pasue aa'i-aa'i! Miu aa'i-aa'i mi dhu me'a, na, Stefanus dènge isi èmu na ka dhèu partama dhu parcaya Kristus ètu propensi Akaya nèi. Rèngu sab'a re'a boe j'èra, sèna ka ladhe-leru dhèu parcaya ètu nèi. De ja'a manèngi hof 16 miu nanene dhèu sèmi sèra. Nuka rèngu dhu sab'a bia ho sama-sama lalau-lalo'o dhèu parcaya sèra.
17 D'ara ja'a neo dhiu pa'asu-pareo dènge miu. D'ara ja'a karej'e titu kèna, lula mamai Stefanus, Fortunatus dènge Akaikus asa ne'e. Dènge j'ara ne, rèngu bisa gati miu. 18 Tèlu ra pa'èra d'ara ja'a, sama sèmi ra pa'èra d'ara miu kahèi. Miu hud'i pakab'ua dhèu sèmi sèra.
Paulus hia lii maho'o mi dhèu aa'i-aa'i
19 Juma'at-juma'at ètu propensi Asia hia miu lii maho'o. Akila dènge dhèu èmu na, Priskila,g aa dhèu leo dhu tema pakaboko ètu èmu ra, pa'adhu lii maho'o kahèi. Rèngu se dhu pa'èki kahèi dènge Kètu èdhi, Yesus Kristus.h 20 Dhèu parcaya aa'i-aa'i ètu ne'e, pa'adhu lii maho'o kahèi.
Ladhe miu pakaboko, na, pa'uu èci dènge èci, pake uu dhu nia hia dhèu parcaya sèra.
21 Mi laladhe! Te ja'a, Paulus, suri dènge kacui-aai unu ku: Saloom!
22 Dhèu cee dhu sue boe Kètu èdhi, pe Ama Lamatua huku ne.
Ja'a d'èi tabea dhèu madhutu lii Aram èdhi dhèu Yahudi, dhu peka, “Marana ta!” dhu sasoa na, “Lamatua! Mai ka!”
23 Ja'a manèngi sèna ka Kètu èdhi, Yesus Kristus, pad'elo d'ara hua iia Na mi miu aa'i-aa'i mi.
24 Ja'a sue miu aa'i-aa'i mi, lula èdhi pa'èki dènge Kristus, dhu Ama Lamatua hia mai.
Sasuri ja'a sèmi ne'e ka. Saloom!
Nèti ja'a,
Paulus