5 Dad'èi ja'a, ladhe dhèu aa'i-aa'i bisa padhai lii pake lii leo. Te ngaa ja'a d'èi risi, ladhe miu bisa lole lii moa Lamatua. Te dhèu dhu peka lii moa Lamatua èèna, guna risi nèti dhèu dhu dhoka padhai pake lii leo di. Ladhe padhai pake lii leo, èèna be'a, sad'i abhu dhèu dhu bisa peka paled'a sasoa na. Dènge sèmi èèna, lii moa sèra bisa asa pa'èra dhèu aa'i-aa'i ètu juma'at, sèna ka re'a mèu.

6 A'ari pasue aa'i-aa'i! Pangee sèku j'ara ne. Ladhe sèmi ja'a dhiu ngad'o miu ho padhai pake lii dhu miu me'a boe sasoa na, miu abhu oto na ngaa? Aad'o, si? Te ngaa ladhe ja'a padhai lii dènge miu, be'a risi ja'a peka dènge miu dad'èi Lamatua. Be'a risi ja'a bhoke paled'a j'ara-j'ara dhu uru èèna mèu iia mèka. Be'a risi ja'a aj'a-nori miu ho me'a mèu risi hari j'ara sèra. Be'a risi ja'a pasanèd'e miu Lii Holo-Nori Lamatua. Be'a risi aj'a-nori miu. Dènge j'ara sèmi sèra, heka miu abhu oto kèna, si?

7 Sèmi èèna kahèi dènge alat musiik. Se'e se mèdha madhe, te ngaa lii ra rupa-rupa. Pake sakino do, sasadhu do, gitar do, ladhe pangèci boe lii na, tatu dhèu re'a boe lii sod'a sèmi ngaa, si? 8 Ladhe lii tèbhe mèu iia boe, na, tasa mera mia sordad'u bisa re'a, na, rèngu hud'i tao ngaa mi musu ra? Bisa boe, si? 9 Sèmi èèna kahèi dènge miu. Ladhe miu padhai lii, pake lii dhu dhèu bisa boe re'a mèu, èèna nuka sèmi miu padhai lii dènge lai ngèlu. Parcuma, te dhèu bisa boe dhane rare lii padhai èu! 10 Ètu rai-haha ne abhu lii ae titu kèna. Lii se, èci-èci ka dènge sasoa na. 11 Te ngaa ladhe ja'a ke'a boe lii dhèu leo, bagi ja'a lii ne dènge boe kab'ua. Ja'a ke'a boe lii rèngu, aa rèngu re'a boe lii ja'a kahèi. Ji'i baga taa, aa j'aj'i sèmi dhèu leo rai kara sa.

12 Sèmi èèna kahèi dènge miu. Miu neo abhu karunya dènge koasa nèti Lamatua. Èèna be'a. Te ngaa be'a risi ladhe miu tenge j'ara ho abhu koasa dènge karunya dhu miu bisa pake sèna ka pa'èra dhèu parcaya sèra!

13 De dhèu dhu padhai pake lii leo, be'a risi nèngu sabaj'a manèngi sèna ka Lamatua hia ne karunya kahèi, ho peka sasoa nèti lii leo èèna. 14 Ladhe ja'a manèngi-mangaj'i pake lii leo, ja'a sabaj'a pake d'ara ja'a, te ngaa ja'a ke'a boe ngaa dhu ja'a padhai lii èèna. 15 De babe'a na, ja'a tao tasamia? Ja'a pake dua-dua, te ngaa èci-èci ka dènge lod'o na. Ja'a neo manèngi-mangaj'i pake d'ara ja'a, aa ja'a neo manèngi-mangaj'i pake lii dhu ke'a mèu kahèi. Ja'a neo sod'a pake lii sod'a koa-kio mi Lamatua nèti d'ara ja'a. Aa ja'a bisa sod'a kahèi, pake lii dhu ja'a ke'a mèu. 16 Te ladhe èu pake lii leo ho koa-kio Ama Lamatua nèti d'ara èu, te ngaa abhu dhèu ètu sèra dhu re'a boe lii deo na, tasamia nèngu bisa d'ara èci dènge èu? Lod'o èu manèngi makasi mi Lamatua pake lii leo, tasamia dhèu èèna bisa nare lii èci dènge èu, ka na peka na, “Lèke kèna!” Bisa boe, si? Te nèngu ne'a boe lii padhai èu deo na. 17 Èu bisa manèngi makasi sèmi èèna kahèi mi Lamatua. Te ngaa èèna pa'èra boe d'ara dhèu leo.

18 Ele boe miu me'a boe, te ngaa ja'a padhai lii pake lii leo risi nèti miu. Aa ja'a manèngi makasi mi Lamatua, lula Nèngu hia ja'a bisa padhai lii sèmi èèna. 19 Te ngaa ladhe dhèu parcaya pakaboko, na, be'a risi ja'a padhai lii dhoka lèmi hèb'a dhu bab'a te ngaa re'a mèu, sèna ka aj'a-nori si. Te ladhe ja'a padhai lii pamadhera-dhera pake lii leo, dènge pake lii riho-riho hèb'a dhu re'a boe, na, gaguna na aad'o.

20 A'ari pasue aa'i-aa'i! Ladhe miu neo me'a mèu j'ara-j'ara, na, miu hud'i pangee nuka sèmi dhèu ee'a. Mage pangee sèmi ana iiki! Te ngaa re j'ara bhelu-katub'a, miu hud'i nuka sèmi ana iiki dhu re'a boe tao bhabhelu, lula d'ara ra dhu mèu aadha-aadha. 21 Ètu d'ara Sasuri Mola-Mèci Lamatua, dhu suri peka na,

22 Nèti èèna ka, ladhe miu paraga dènge dhèu dhu padhai lii pake lii leo, èèna j'aj'i mi tadha hia dhèu dhu parcaya mèka Lamatua, sèna ka bisa rèdhi koasa Lamatua. J'ara ne'e soru-bara boe dhèu dhu parcaya le Kristus. Te ngaa ladhe dhèu lole lii moa Lamatua, na, ne'e ne ka soru-bara rèngu dhu parcaya le Kristus. Te ngaa soru-bara boe dhèu dhu parcaya mèka Kristus. 23 Ladhe sèmi miu aa'i-aa'i mi dhu pakaboko, ka miu padhai lii pake lii baka-leo, hèia dhèu dhu parcaya boe, do, dhu ne'a boe j'ara se'e, maso dhiu asa talora aae miu, dhèu se ngee sèmi ngaa sa? Tatu ra peka na, “Dhèu ètu se'e se, huj'u aa'i mèu-mèu!”

24 Aa ladhe sèmi miu aa'i-aa'i dhu padhue-padhai ho peka paled'a lii moa Lamatua, hèia dhèu dhu parcaya boe, do, dhu ne'a mèu mèka j'ara-j'ara se, maso dhiu asa talora miu. Tatu dhèu ne, neo nanene lii padhai miu. De, ngaa dhu miu peka-padhai sèra, pad'elo sasala na, toke neo parisa mamuri na d'ai lutu. 25 Ka bhabhelu dhu nèngu pahuni ètu d'ara na, èèna na bhoka patalele, sèna ka dhèu aa'i-aa'i re'a. Ka na patitu kètu urutuu na, ho pahaha iisi mi Ama Lamatua, peka na, “Ira ii! Tare'a-re'a Ama Lamatua ètu talora aae miu di!”

26 De a'ari pasue aa'i-aa'i! Ladhe miu pakaboko, èci-èci ka dènge karunya na. Abhu dhu sod'a koa-kio Ama Lamatua. Abhu dhu aj'a-nori dhèu lula-nèti Lamatua. Abhu dhu peka paled'a j'ara-j'ara Lamatua dhu uru èèna pahuni era. Abhu dhu padhai pake lii leo. Aa abhu dhu bisa peka sasoa nèti lii leo sèra. J'ara aa'i-aa'i se, rèngu hud'i tao ku ho pa'èra parcaya dhèu leo sèra.

27 Ladhe abhu dhu d'èi padhai lii pake lii leo, èèna be'a. Sad'i dua do tèlu dhèu di, baku pa'ae-ae. Dhèu èci padhai lii uuru, èle ku heka dhèu leo kèna. Aa hud'i abhu ku dhèu dhu peka sasoa na. 28 Ladhe sèmi abhu boe dhu bisa peka sasoa nèti lii leo èèna, na, baku padhai lii pake lii leo ètu katanga madha dhèu ae-ae. Hud'i laa rèngu padhai lii ètu d'ara ra. Rèngu bisa padhai lii dènge Lamatua sèmi èèna kahèi.

29 Ladhe miu pakaboko, na, dua do tèlu dhèu di dhu padhai lii, lole lii moa Lamatua. Dhèu leo hud'i dadoo ku lii padhai nèti dhèu dhu padhai sèra. 30 Te ngaa ladhe Lamatua bhoke ca j'ara dhu uru èèna mèu iia mèka mi ca dhèu dhu madhèdi nanene ètu èèna, na, nèngu hud'i peka paled'a lii moa ne mi dhèu aa'i-aa'i dhu madhèdi ètu èèna. Aa dhèu dhu padhai lii ètu madha, hud'i ae eele nèti lii padhai na, sèna ka hia dhèu dhu heka tadèngi lii moa Lamatua, ho na padhai lii. 31 Dhu lèke ka, miu aa'i-aa'i mi bisa lole lii moa Lamatua. Te ngaa ladhe padhai lii, na, èci uru, ladhe èle heka dhèu leo kèna. Dènge j'ara ne, dhèu aa'i-aa'i bisa nanene, bisa re'a j'ara, aa bisa pa'èra d'ara ra. 32 Sanèd'e, te dhèu dhu lole lii moa Lamatua, hud'i ne'a ator ngi'u na. Ka èci pamata dènge èci, aa dhèu leo taha uru. 33 Te abhu boe maruru ètu Ama Lamatua, te ngaa mera dènge milu di.

Ètu mia-mia, ladhe dhèu parcaya pakaboko, hud'i sèmi ne'e ku: 34 dhèu bhèni madhèdi mau-mau, bisa boe padhai lii pa'ae. Rèngu hud'i nanene kètu juma'at sèra. Te Atora Ama Lamatua peka sèmi èèna kahèi, si? 35 Ladhe abhu bhèni dhu neo karèi j'ara èci, pe d'ai èmu ku heka karèi dhèu èmu na kèna. Te ladhe bhèni maruru ètu d'ara èmu sabaj'a, sèra sa pamakae iisi ra!

36 Madhutu a'abhu miu, tasamia? Te Lii Holo-Nori Ama Lamatua mai boe nèti miu. Aa Lii Holo-Nori Na hia boe miu mesa mi ètu kota Korintus di! De pangee paie ku! 37 Ladhe abhu dhèu dhu pangee, na, nèngu bisa lole lii moa Lamatua, do pangee na, nèngu abhu koasa nèti Roh Lamatua, na, nèngu ne'a j'ara-j'ara dhu ja'a suri hia miu sèra, atora dhu ja'a tao boe, te ngaa paredha nèti Kètu èdhi, Yesus Kristus. 38 Ladhe abhu dhèu dhu ro'o boe sèmi rare j'ara se, na, miu baku sèmi mere dhèu ne.

39 A'ari pasue aa'i-aa'i! Tenge j'ara sèna ka miu abhu koasa ho bisa peka paled'a lii moa Lamatua. Aa mage kai dhèu, sèna ka rèngu baku padhai pake lii leo. 40 De ladhe miu pakaboko, na, pakako aa'i-aa'i madhutu mola-mola. Tao uuru ku èci, heka dhu leo kèna. Pakako aa'i-aa'i dènge be'a, madhutu madha j'ara na. Baku dènge maruru.