3 Ja'a neo dhaa mi dhèu dhu pèci sasala mi dedha ja'a, sèmi ne'e: 4 miu ngee, na, ja'a dènge Barnabas dènge boe hak ho abhu nganga'a-nganginu nèti dhèu dhu ji'i aj'a-nori si, do? 5 Miu pangee, na, ji'i dènge boe hak ho leo dènge dhèu bhèni Kristen, dhu la'a sama-sama pakako sasab'a Lamatua ètu era leo, do? Madhutu iia-iia na, dhèu pajuu-paleha Lamatua dhu leo sèra, rèti kahèi dènge dhèu èmu ra. Ari Lamatua Yesus sèra tao sèmi èèna. Petrus mesa na sèmi èèna kahèi!^a 6 Do, miu ngee na, dhoka ja'a dènge Barnabas di dhu hud'i sab'a tenge doi-dhari, sèna ka bisa mamuri ho aj'a-nori dhèu? 7 Ngangee miu sèmi èèna, mai nèti mia? Ladhe sèku sordad'u sèra. Rèngu pusi boe hèli nganga'a-nganginu dènge mèdha-papake. Ladhe sèku dhèu sab'a ètu oka anggor. Abhu boe ca dhèu sa dhu kai, peka na, “Èu baku mu'a hua anggor sèra!” Aa ladhe sèku dhèu madhenga badha. Dhèu ne dènge hak ho nare susu nèti kahib'i-kalèbho dhu nèngu j'aga.

8 Ja'a padhai lii ne madhutu boe ngangee ja'a dhèu rai-haha ne. Te Atora sèra nèti Ama Lamatua dhu peka sèmi èèna kahèi. 9 Ètu atora Musa, dhu suri peka na, “Ropa sapi j'èli are ho hag'e eele lamusi nèti huri na, baku kape hèb'a na, sèna ka bisa na'a.” Miu pangee, na, Lamatua soro tèke sèna ka dhoka sapi di dhu bisa na'a, do?^b 10-11 Aad'o! Lamatua peka na, Nèngu taru kira èdhi kahèi. Te dhu suri tèke, peka na, “Dhèu dhu kabèli rai, aa dhèu dhu hag'e eele lamusi nèti huri na, ropa ra sab'a, rèngu re'a kahèi, èèna na abhu pala ra.” Sèmi èèna kahèi, be'a risi dhèu pajuu-paleha dhèu Kristen sèra, bisa abhu pala nèti rui-j'aj'èra ra. Te lod'o ji'i aj'a-nori miu j'ara-j'ara nèti Roh Lamatua èèna, ji'i nuka sèmi ca dhèu sab'a oka-tedhe dhu sèle hini. De lod'o ji'i aj'a ngare, ladhe ji'i abhu nganga'a-nganginu do ngaa hari nèti miu, ngaa-ngaa tao boe. Te j'ara na sèmi èèna ka!^c 12 Dhèu leo dhu aj'a-nori miu, dènge hak sèna ka abhu dhua-èi dènge mèdha-panyau nèti miu, si? Aa ji'i tasamia? Ji'i dènge hak risi eele nèti rèngu!

Te ngaa miu me'a le. Ji'i se pake ngèdhi boe hak ho laka-seti miu. Ji'i pa'èra ètu rupa-rupa j'ara, sèna ka baku magee miu. Te, dènge j'ara ne'e, miu d'èi nanene Lii Lolo Be'a Yesus Kristus dhu ji'i peka-padhai dènge miu. 13 Pangee ku laa! Ama-ama agama dhu sab'a ètu d'ara Èmu Kapua Manèngi-Mangaj'i dhèu Yahudi, mamuri nèti persembahan dhu dhèu rèti. Aa dhèu dhu sab'a ètu mei korban, ra'a sisi nèti badha dhu dhèu rèti.^d 14 Sèmi èèna kahèi, Lamatua dhu moa, na, dhèu dhu sasab'a ra peka-padhai Lii Lolo Be'a Kristus, rèngu bisa mamuri nèti rui-j'aj'èra nèti sasab'a-la'a ra. Dhu lèke kèna.^e

15 Masi ka ja'a dènge hak ho mamuri sèmi èèna, te ngaa ja'a d'èi boe tao sèmi èèna. Ja'a suri boe sasuri ne sèna ka miu hia ja'a ngaa-ngaa. Nèbhu nare sange ne'e, ja'a pakako sasab'a Lamatua hia miu, te ngaa manèngi boe ngaa-ngaa nèti miu. De hua iia risi ja'a madhe, ladhe dhèu pangee, na, ja'a manèngi ngaa-ngaa nèti miu. 16 Masi ka ja'a lole taruu dènge dhèu lula-nèti Lii Lolo Be'a Lamatua, te ngaa èèna j'aj'i boe mi ngaa sa èci, dhu ja'a bisa padedha iisi. Ja'a hud'i lole ku dènge dhèu lula-nèti Lamatua, te Lamatua ka dhu pua ja'a sèmi èèna. Ladhe ja'a sab'a boe madhutu sasab'a ja'a, na dui kore j'aj'èra! Te tatu pasae kore hahuku. 17 Ladhe ja'a sab'a sasab'a ne lula madhutu dhoka dad'èi ja'a mesa ku, na, ngaa dhu ja'a abhu sèra, nuka sèmi gaji dhu dhèu sab'a sèra abhu. Te ngaa ladhe ja'a sab'a sasab'a ne, lula Lamatua pua ja'a, èèna leo. Te Lamatua lèka ja'a ho j'aga mèdha-panyau Na dhu kab'ua. 18 De ladhe sèmi èèna, upa ja'a ngaa? Ja'a parluu boe gaji. Ja'a padhue-padhai Lii Lolo Be'a Lamatua, dhu manèngi boe ngaa-ngaa. Ne'e ka dhu tao ja'a karae, nuka sèmi ja'a abhu le upa. De masi ka ja'a unu rupa-rupa hak, nuka sèmi dhèu leo dhu sasab'a ra padhue-padhai Lii Lolo Be'a èèna, te ngaa ja'a pake aa'i boe hak sèra.

19 Ja'a ne, dhèu bebas dhu sab'a madhutu dad'èi d'ara ja'a. Dhèu dènge boe hak ho pua ja'a tao ne'e, do, tao èèna. Masi ka sèmi èèna, te ngaa ja'a tao ngi'u nuka sèmi ènu, ho dhèu aa'i-aa'i abhu hak ho paleha ja'a. Dènge j'ara ne, ja'a bisa soru-bara dhèu ae, sèna ka ra madhutu Ama Lamatua taruu. 20 De ladhe ja'a pa'èci dènge dhèu Yahudi, na, ja'a tao iisi sèmi dhèu Yahudi, sèna ka soru-bara dhèu Yahudi ho ra tadhe Lamatua. Ladhe ja'a pa'èci ka dènge dhèu dhu kèpe pa'èra Atora Lamatua, ja'a tao madhutu Atora Lamatua, ho ja'a bisa soru-bara si, sèna ka ra tadhe mèu Lamatua, (masi ka ja'a ke'a, na, tao madhutu Atora èèna, bisa boe pabe'a ja'a dènge Lamatua). 21 Ladhe ja'a pakaboko dènge dhèu dhu re'a boe Atora Lamatua, ja'a j'aj'i sèmi rèngu ho lere kèti si asa Lamatua. (Ja'a patabuli boe Atora Lamatua dhu Na hia mai re Musa, te ngaa ja'a mamuri pake Atora Kristus)^f 22 Dènge dhèu dhu d'ara èra boe, na, ja'a tao iisi sèmi dhèu dhu d'ara èra boe kahèi, ho ja'a bisa pamako si sèna ka mai asa Ama Lamatua. Dènge dhèu aa'i-aa'i ra, ja'a tao iisi sèmi rèngu, sèna ka, ladhe bisa, kèti cahag'e asa madha Lamatua. 23 Ja'a tao j'ara aa'i-aa'i se, sèna ka dhèu aa'i-aa'i bisa lèka Lii Lolo Be'a Lamatua. Dènge j'ara ne'e, èdhi bisa abhu pala dhu be'a nèti madha j'ara aa'i-aa'i, dhu Lamatua hia èdhi.

24 Ja'a pakasame dènge pa'uji rai. Dhèu ae-ae madhutu pa'uji rai, te ngaa dhu abhu juara dhoka dhèu èci di. De miu èci-èci mi hud'i rai pa'èra-èra ku ho j'aj'i juara hia Lamatua. 25 Dhèu aa'i-aa'i dhu madhutu pa'uji, hud'i madhutu ku paredha nèti dhèu dhu aj'a rèngu, si? Dhèu se sab'a bia sèmi èèna, lula neo abhu solo juara dhu bèli-camèd'a ele iie. Te ngaa èdhi sab'a sèna ka abhu upa dhu taha toke d'ai mia-mia. 26 De ja'a rai leli boe. Te ngaa ja'a tenge j'ara ho rai pa'èra-èra toke d'ai lane. Ladhe pasoro ja'a sèmi dhèu tuka paj'ubhu, na, ja'a j'ubhu leli boe, te ngaa hud'i j'ubhu palèke ku. 27 Ja'a pa'èra d'ara, aa aj'a ngi'u sèna ka bisa taha taruu. Te be'a boe ladhe ja'a peka dènge dhèu leo lula-nèti Ama Lamatua, aa te ngaa ja'a mesa ku sisu atora, hèia Lamatua kalua eele ja'a nèti d'ara pa'uji rai èèna.